Bugun, OFK qarorgohida Osiyo Futbol Konfederasiyasi hamda O‘zbekiston futzal federasiyasi vakillarining uchrashuvi bo‘lib o‘tdi.
Unda Osiyo Futbol Konfederasiyasining futzal va sohil futbolini rivojlantirish texnik Departamenti rahbari Takaxiro Komori, Futbol operasiyalari Departamenti Musobaqalar va futbol tadbirlari bo‘limi rahbari Raymond Bxaskaran, futzal va plyaj futbolini rivojlantirish texnik Departamenti ma’muriy xodimi Aziz Kifax, O‘FF bosh kotibi Baxodir Mamatnazarov hamda O‘FF xalqaro aloqalar va marketing bo‘limi boshlig‘i G‘ayrat Azizxodjayev ishtirok etdi.
Uchrashuv ishtirokchilari har ikkala tomon manfaatlariga mos strategik yo‘nalishlar hamda istiqbolli rejalar bo‘yicha fikr almashdilar.
O‘FF bosh kotibi O‘zbekistonda futzalni yanada ommalashtirish, terma jamoalarning xalqaro musobaqalardagi ishtiroki hamda natijalarini yanada yaxshilash, shuningdek, ayollar futzali, sohil futboli taraqqiyoti yo‘lida tashlanayotgan yangi odimlar haqida to‘xtaldi. O‘z navbatida ichki chempionat saviaysini oshirish, klublar infratuzulmasini mustahkamlash, o‘sib kelayotgan istiqbolli yoshlarga barcha zarur shart-sharoitlarni yaratib berish borasida amalga oshirilayotgan islohatlar, O‘FF ning O‘zbekiston futbol assotsiatsiyasi, Milliy Olimpiya qo‘mitasi hamda Sport vazirligi bilan mamlakat futzali taraqqiyoti yo‘lidagi doimiy hamkorligi, bunyodkorlik ishlari bo‘yicha ma’lumot berdi.
Ushrashuv chog‘ida tomonlar O‘zbekiston Respublikasi Prezidenti tomonidan mamlakatda sportni, jumladan futbolni rivojlantirishga juda katta e’tibor qaratilayotgani, buning natijasi o‘laroq O‘zbekiston milliy terma jamoasi mamlakat futboli tarixida birinchi marta jahon chempionati yo‘llanmasini qo‘lga kiritganini ta’kidlab o‘tishdi. OFKning futzal va sohil futbolini rivojlantirish texnik Departamenti Bekzod Mamatqulov boshchiligida yangi tashkil etilgan O‘zbekiston futzal federatsiyasi faoliyatini katta qiziqish va sinchkovlik bilan kuzatib borayotganini, mazkur turni O‘zbekistonda yanada rivojlantirish va ommalashtirish borasida doimiy hamkorlikka tayyor ekanliklarini ta’kidlashdi. Bu yo‘lda qit’a futboli mutasaddilari O‘zbekiston futzal federatsiyasi bilan hamkorlikda turli darajadagi o‘quv-mashg‘ulot yig‘inlari, musobaqalar, seminarlar va murabbiylarni malakasini oshirish kurslarini tashkil qilish borasida maslahatlashib olindi.
Jumladan, Osiyo Futbol Konfederasiyasi (OFK) va O‘zbekiston futzal federasiyasi (O‘FF) vakillari 2025 yil oktyabr oyida fitnes hamda darvozabonlar murabbiylari uchun malaka oshirish kurslarini O‘zbekistonda tashkil etish masalasi muhokama qilindi va ushbu tashabbusni yaqin vaqt ichida amalga oshirish bo‘yicha kelishuvga erishildi.
Muloqot davomida, O‘FF vakillari O‘zbekistonning erkaklar o‘rtasidagi navbatdagi Osiyo Kubogini qabul qilishga tayyorligi, bu borada tez orada rasmiy ariza taqdim etilishini ma’lum qilishdi. Konfederasiya mas’ullari bildirilgan taklif va mulohazalarni mamnuniyat bilan qabul qilishdi.
Bundan tashqari klublar o‘rtasidagi Osiyo Chempionlar Ligasini qayta tiklash masalasi ham ko‘rib chiqildi. Ushbu musobaqani 2027 yilda tashkil etish rejalashtirilayotgani va zarurat tug‘ilgan taqdirda, O‘zbekiston uni qabul qilishga tayyorligi bildirildi. OFK vakillari mazkur masala yuzasida O‘zbekistondan tashqari Eron, Yaponiya va Tailand kabi qit’aning yetakchi futzal mamlakatlari ham befarq emasligini, OFK tez orada bir to‘xtamga kelishini ta’kidlashdi.
Uchrashuv so‘ngida O‘FF bosh kotibi OFK futzal va sohil futbolini rivojlantirish texnik Departamenti rahbari Takaxiro Komoriga O‘zbekiston futzal federasiyasi Prezidenti nomidan esdalik sovg‘asini topshirdi. Do‘stona ruhda o‘tgan uchrashuv yakunida OFK vakillari O‘zbekistonda futzalni rivojlantirish va ommaviyligini oshirish borasida amalga oshirilayotgan samarali ishlar uchun O‘FF rahbariyatiga tashakkur izhor etib, bu yo‘lda omad va zafarlar yor bo‘lishini tilashdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
