Argentinaning «River Pleyt» klubi akademiyasi tarbiyalanuvchisi Franko Mastantuono professional futbolda debyut qilganiga unchalik ko‘p bo‘lmadi (2024 yil 28 yanvar). Biroq u qisqa fursatlarda «Barselona» va «Real Madrid» kabi jahonning grand jamoalari e’tiboriga tushishga erishdi hamda joriy yil 13 iyun kuni «qirollik klubi» bilan 6 yillik bitim imzoladi. Aytish kerak, futbolchi o‘zining tanishtiruv marosimida jurnalistlar bilan ham muloqot qildi va jahonning eng kuchli futbolchisi kim deya berilgan savolga «Messi» deb javob qaytardi. Quyida ana o‘sha suhbatning to‘liq mazmuni bilan tanishasiz.
Hissiyotlar haqida:
- «Real» bilan rasmiy bitim imzolagan paytim hamon «River Pleyt»da o‘ynayotganim bois o‘y-xayollarim faqatgina shu jamoa manfaatlari bilan band edi. Madridga ko‘chib o‘tgach esa o‘zimni dunyodagi eng baxtiyor futbolchilar qatorida his qildim. Zero, bolaligimdanoq mana shunday buyuk klubda o‘ynashni orzu qilganman, biroq buning amalga oshishini ko‘rish, ayniqsa 18 yoshga to‘lgan kunim «Madrid» futbolchisi sifatida tanishtirilishimni xayolimga ham keltirmagandim. Albatta, bu aql bovar qilmaydigan xursandchilik. Shu bilan birga meni bu yerda iliq kutib olgan muxlislar ham alohida e’tirofga loyiq.
O‘yin uslubi haqida:
- Men aslida chap qanot hujumkor yarim himoyachisiman va shu nuqtada o‘zimni ancha erkin his qilaman... Biroq birinchi navbatda murabbiylar fikriga quloq tutaman va maydonga tushganimda ularning ko‘rsatmalarni sidqidildan, mukammal bajarishga harakat qilaman. Aslini olganda o‘yinim haqida gapirishni unchalik yoqtirmayman, bunga boshqalar baho bergani to‘g‘riroq bo‘lardi. Maqsadim - har qanday holatda ham jamoaga yordam berish va madridliklarni xursand qilish uchun qo‘limdan kelganini qilish.
«River Pleyt»dan ketish haqida:
- Futbolchi sifatidagi birinchi orzuim Janubiy Amerikaning eng kuchli jamoasi hisoblangan «River Pleyt»da o‘ynash edi va bunga erishdim. Galdagi maqsad - Yevropaning qudratli klublaridan biriga o‘tish hamda yuqori marralarni zabt etishga qaratilgandi. Ayniqsa, futbol olami va «Real»ning muvaffaqiyatlariga juda katta hissa qo‘shgan afsonaviy Di Stefanoning izidan borib, «River»dan dunyoning eng kuchli klubiga o‘tishni qattiq xohlagandim. Qolaversa, Xabi Alonsoning men bilan bog‘lanib, o‘z jamoasida ko‘rishni istayotganini aytishi ishtiyoqimni ikki hissa oshirdi. O‘ylashimcha, yangi chaqiriqlarga tayyorlanayotgan har qanday futbolchi uchun bosh murabbiy ishonchini his qilishi juda muhim.
«Madrid»dagi argentinaliklar va dunyoning eng yaxshi futbolchisi haqida:
- Shubhasiz, hozirgi zamon futbolida Messi «Barselona» va uning muxlislari hayotida juda katta ahamiyatga ega. Lekin Ispaniya futbolida yorqin iz qoldirgan argentinalik boshqa nomdor futbol kishilari ham borki, ularni mutlaqo safdan chiqarib bo‘lmaydi. Ayniqsa, «Madrid»dagi argentinaliklarning taraqqiyotini ko‘rish ajoyib. Bunga Di Mariya, Iguain va boshqalarni misol qilib keltirishim mumkin. Ha, men uchun dunyoning eng yaxshi o‘yinchisi - bu Messi. Men argentinalikman va uni jahonning eng yaxshi futbolchisi deb o‘ylayman. Umid qilamanki, men ham bu mamlakatda vatandoshlarim erishgan natijalarni qo‘lga kirita olaman. Birinchi navbatda esa madridlik muxlislarni maydonda ko‘rsatayotgan o‘yinimdan zavq olishlarini istayman.
Tug‘ilgan kunida imzolangan shartnoma haqida:
- To‘g‘risi, qachondir tug‘ilgan kunimni «Madrid»dek buyuk jamoa libosini ilk bor kiygan holda nishonlash hayolimga ham kelmagandi. Navqiron yoshimdayoq bolalikdagi orzularimni amalga oshirish imkonini bergan klub rahbariyatidan, hamisha minnatdorman. Qolaversa, meni ko‘p yillik qadrdonlarday iliq kutib olgan, o‘zimni xuddi uydagiday his qilishim uchun yordamini ayamagan jamoadoshlarimga ham alohida rahmat aytaman. Ular bilan chin ma’noda faxrlanaman.
Kelasi yilgi jahon chempionati haqida:
- Albatta, eng katta orzu va maqsadimlarimdan biri - jahon chempionatida ishtirok etish hamda g‘olib bo‘lish. To‘g‘ri, Argentina bu galgi mundialga amaldagi chempion sifatida boradi. Ammo ushbu titulni o‘zimizda saqlab qolish nihoyatda qiyin bo‘lishi tabiiy. Zero, tarixda ilk bor 48ta terma jamoa ishtirok etadigan turnirda muvaffaqiyat qozonish juda katta raqobat, mehnat va intilish talab etadi. Umid qilamizki, biz bu vazifani uddalaymiz. Biroq, bu musobaqagacha hali biroz vaqt bor, hozirgi o‘y-xayolim esa faqat «Real Madrid» muvaffaqiyatlariga qaratilgan. Men bu jamoada ertagayoq sovrin yutishni xohlayman.
Tashqi omillar tasiri haqida:
- Telefonimga ko‘p qaramaslikka harakat qilaman. Yaxshiyamki, yaqinlarimning aksariyati yonimda va ular bilan vaqt o‘tkazaman. Albatta, ko‘plab sobiq jamoadoshlarim hamda terma jamoa a’zolari bilan tez-tez gaplashib o‘yinimni muhokama qilib turamiz. Lekin chetdan bo‘ladigan ortiqcha ta’rif va e’tiroflarga e’tibor qaratmayman. Chunki endigina 18 yoshdaman va hali oldinda qiladigan ishlar ko‘p.
Boshqa klublardan bo‘lgan qiziqishlar haqida:
- To‘g‘ri, so‘nggi bir yil ichida menga ko‘plab jamoalar qiziqish bildirishdi va qator takliflar berildi. Ular orasida «Barselona» va «PSJ» kabi grand klublar ham bor edi. Muzokaralar jarayonida esa, parijliklar bosh murabbiyi Luis Enrike bilan gaplashish baxtiga ham muyassar bo‘lganimdan xursandman. Juda samimiy hamda ochiq kechgan suhbat chog‘ida uning nechog‘lik salohiyatli mutaxassis ekanligi yaqqol sezilib turdi. Lekin yuragim kun sayin Madrid tomon talpinayotgani bois, barcha taklif bildirganlarga e’tibor uchun rahmat aytgan holda «Real»ni tanladim.
Yevropa futboli haqida:
- Ispaniya chempionatida to‘pga egalik qilish va taktik futbolga alohida e’tibor qaratiladi. Yevropa futbolidagi eng qiyin narsa esa - bu temp. Umid qilamanki, bunga har tomonlama tayyorman va jamoaga yordam berish uchun bor kuch-salohiyatimni ishga solaman. Bir so‘z bilan aytganda, maydonda zimmamga qanday vazifa yuklatilsa, shuni sidqidildan bajarishga, murabbiylar va muxlislar ishonchini oqlashga va imkon qadar yaxshi o‘yin namoyi etishga harakat qilaman.
Xurshid YUSUPOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
