Qiziq savol: agar har bir klubning faqat o‘z tarbiyalanuvchilari tomonidan urilgan gollar inobatga olinsa, APL-2024/2025 jadvali qanday ko‘rinish olardi? Sports.ru sayti ijodkorlari ayni shu yo‘nalishda tahliliy-statistik maqola tayyorlashdi. Ular shuning barobarida legioner futbolchilarning gollarini chetga surgan holda ham alohida jadval tuzib chiqishdi. Xo‘sh, natijalar qanday?
«ARSENAL» - CHEMPION!
Ha, agar faqat klub tarbiyalanuvchilari gollari inobatga olinsa, «Arsenal» chempion! Yana biror mag‘lubiyatsiz. Hattoki, gol qo‘yib yubormagan holda. Ha, bu APLning muqobil talqinidir, ammo xayoliy kubokni bemalol sovrinlar vitrinasida «xG bo‘yicha «PSJ» ustidan qozonilgan 3ta g‘alaba», «Deklan Raysning «Real» darvozasiga jarima nuqtasidan urgan 2ta chiroyli goli» va albatta, «Manchester Siti» bilan o‘yindagi 5:1» kabi «sovrin»lar qatoriga qo‘yish mumkin. Ushbu virtual ligada «MYU» ham yengilmas maqomiga ega. Biroq mag‘lubiyatsiz mavsum «qizil iblislar»ga kuchli uchlikka kirishnigina kafolatladi. Umuman, 20ta klubdan 8tasining gol ustunida «0» porlab turibdi. Ya’ni shuncha ishtirokchida gol uradigan tarbiyalanuvchi topilmagan. Afsus, bugungi transferlar bozori jamoalarni o‘z yulduzlarini rivojlantirishga undolmaydi, hatto moliyaviy «feyr-pley» qoidalari ham ojiz...
FIL FODEN - BOSH TO‘PURAR!
«Manchester Siti» vakili Fil Foden o‘z darajasi bo‘yicha omadsiz mavsum o‘tkazganiga qaramay, klublar tarbiyalanuvchilari orasida yaqqol to‘purar. Top-10 shaklidagi ro‘yxatda 1 yil muqaddam ham deyarli eshitilmagan ism-familiyalar ko‘p: Jek Xinshelvud, Itan Nvaneri, Tayler Dibling. «Chelsi»ning markaziy himoyachisi Livay Koluill esa yakunlangan mavsum «Spartak» (Moskva)dagi adashi Livay Garsiyadan ikki baravar ko‘p gol urdi.
FAQAT MAHALLIY FUTBOLCHILAR GOLLARI BILAN
Agar faqat angliyalik futbolchilarning gollari inobatga olinsa, unda «Aston Villa» 69 ochko bilan turnir jadvalining 1-qatoriga joylashadi. Birmingem jamoasida gollarning yarmidan ko‘pi mahalliy futbolchilar hisobiga yozildi. E’tiborli fakt: Olli Uotkins va Morgan Rojers birgalikda 24ta gol urishdi. Bu esa APLdagi 17ta jamoaning jami «inglizcha» golidan ko‘pdir. Bunday jadvalda «Chelsi» ishonch bilan 2-o‘rinni egallaydi. Asosan Koul Palmer (15ta gol), Noni Madueke (7ta gol) va Jeydon Sancho (3ta gol) tufayli. Qizig‘i, legionerlarning gollari chetga surib qo‘yilsa, Chempionshipga tushib ketgan «Ipsvich» naq 7-o‘ringa ko‘tarilardi. Biroq jamoaning «inglizcha» gollarining yarmidan ko‘pi (12ta)ni urgan Liam Delap ketishga ulgurdi - u endi «Chelsi»ga tegishli. Bu jadvalda «Tottenxem» va «MYU»ning asl pozisiyasi biroz o‘zgaradi, asosiysi, har ikki klub quyi ligaga tushib ketmaydi virtual hisob-kitob bo‘yicha. Amaldagi chempion «Liverpul»ga qarang: Arne Slot jamoasi atigi 4ta g‘alaba va 7ta gol bilan 15-o‘rinda. Boz ustiga, gollarning deyarli yarmi ayni payt Mersisaydning qizil tomonida ismini talaffuz qilish taqiqlangan futbolchi tomonidan urilgan. Jadvalni «Sautgempton», «Brentford» va «Vulverxempton» yopib turibdi. «Bo‘rilar» hisobida hattoki, 1ta ham «inglizcha» gol yo‘q. Klubda markaziy himoyachi Kreyg Douson atigi 1032 daqiqalik o‘yin vaqti bilan angliyaliklar orasida eng ko‘p amaliyot olgan futbolchi bo‘lganini hisobga olsak, bunda ajablanadigan tomoni yo‘q.
OLLI UOTKINS RAQOBATDAN XOLI
Olli Uotkins angliyalik to‘pararlar orasida mutlaq peshqadam. Koul Palmer undan 3ta gol darajasida orqada. APL faxriylari Danni Uelbek va Jeymi Vardini alohida e’tirof etish kerak. Ushbu ro‘yxatga nazar tashlasak, angliyalik funksionerlarning legionerlarga nisbatan cheklov o‘rnatish haqida jiddiy o‘ylab ko‘rishlari kerakdek tuyuladi. Deylik, boshqa chempionatlarda sinovdan muvaffaqiyatli o‘tgan «6+5» shaklida. Biroq APLda ob-havoni aynan xorijliklar belgilayotganlarini unutmaslik kerak...
Jahongir MIRZO tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
