O‘tgan mavsumdagi muvaffaqiyatsiz natijalardan tegishli xulosa chiqargan Italiyaning «Milan» klubi rahbariyati bu galgi sikl oldidan tarkibni sezilarli darajada kuchaytirib oldi. Jamoa safiga yangi kelib qo‘shilganlar safida esa «Chelsi» hujumchisi Kristofer Nkunku ham bor. Garchi fransiyalik 27 yoshli yarim himoyachi joriy mavsum hali samarali harakatlari bilan ajralib turmayotgan bo‘lsada, «rossoneri»lar safidagi faoliyati yorqin kechishidan umidvor. Futbolchi buni DAZN nashriga bergan intervyusida ham alohida ta’kidladi.
— Mavsum avvalida sizga bir necha jamoalardan manfaatli takliflar kelib tushganini bilamiz. Lekin nega aynan «Milan»ni tanladingiz?
— Ha to‘g‘ri, yangi mavsum oldidan «Milan»dan tashqari Angliya va Germaniya klublaridan ham ko‘plab qiziqarli takliflar bildirildi. Lekin bir qarorga kelish u qadar qiyin kechmadi. Chunki «Milan» boy tarixga ega buyuk klub. Uning kelajak loyihasi esa menga juda ma’qul keldi. O‘ylaymanki, «rossoneri»lar chorlovini qabul qilish to‘g‘ri qaror edi va bu yerda ekanligimdan xursandman.
— Italiya futboli haqida qanday fikrdasiz?
— Bu yerda men uchun hamma narsa yangi. Tabiiyki, hali o‘rganishim kerak bo‘lgan jihatlar ham talaygina. O‘ylashimcha, Italiya futboli Fransiya va Angliyanikidan tubdan farq qiladi. O‘z o‘rnida yangicha muhit hamda atmosferani boshdan kechirish imkoniyatiga ega bo‘lganimdan xursandman. Qolaversa, «Milan» taklifini qabul qilishdan oldin Mareska («Chelsi» bosh murabbiyi) bilan biroz gaplashdim. U mamlakat, shahar va «A» Seriya haqida juda ijobiy fikrlar bildirdi.
— Yangi jamoangiz va jamoadoshlaringizdan nimalarni kutyapsiz?
— Ochig‘i, sheriklarim bilan ko‘p vaqt o‘tkazganim yo‘q (suhbat 7 sentyabr kuni o‘tkazilgan — PS). Chunki endigina klub safiga yetib kelganimda ularning aksariyati o‘z terma jamoalari ixtiyoriga jo‘nab ketishdi. Qolganlar bilan esa ancha til topishib oldik. Nasib qilsa, ular yordamida boshqa futbolchilar bilan ham ijobiy monasabat o‘rnata olaman. Asosiysi bo‘lajak o‘yinlarga har tomonlama tayyor bo‘lish va yuqori formaga qaytib olish.
— Hozirgi kundagi sport formangiz qay darajada?
— To‘g‘risi yozgi ta’tilda ro‘y bergan vaziyat tufayli yangi mavsumga munosib tayyorgarlik ko‘ra olmadim. Shu bois hozir eng yaxshi sport formasida emasman, lekin men buning ustida har kungi mashg‘ulotlarda astoydil ishlayapman va tez orada bor salohiyatini namoyish etishga tayyor bo‘laman.
— «Milan» haqida qandaydir xotiralaringiz bormi?
— Agar futbolchilar haqida gapiradigan bo‘lsak, Kaka, Ronaldinyo va Ibragimovich kabi o‘yinchilarni klubda yuqori darajada to‘p surishganini aytishim mumkin. Shuningdek, bir vaqtlar «Milan» sharafini himoya qilgan Tiago Silva bilan «PSJ» va «Chelsi»da birga harakat qilganman. Yaqinda u bilan juda uzoq gaplashdik va Tiago «rossonerri» taklifini qabul qilganimdan juda xursand bo‘ldi.
— «Milan»ga kelgach Zlatan Ibragimovich bilan gaplashish imkoni bo‘ldimi? U sizga asosan nimalarni uqtirdi?
— Asosiysi, faol bo‘lish va g‘alaba qozonish, raqibni tom ma’noda mag‘lub etishga intilish kerakligini tushuntirdi. Ibragimovich bilan kechgan suhbatda shuni tushunib yetdimki, uning karyerasi o‘ziga xos xarakteriga asoslangan, bu aniq. Zlatan menga har bir mashg‘ulotda va har bir o‘yinda talabchan bo‘lishni o‘rgatdi: muvaffaqiyatga esa aynan shu mentalitet yetaklaydi.
— Sizning fazilatlaringiz «Milan»ning boshqa hujumchilarinikiga qay darajada mos keladi deb o‘ylaysiz?
— Aslini olganda men moslashuvchan futbolchiman va bir nechta o‘yin uslubiga ortiqcha qiyinchiliklarsiz ko‘nikib keta olaman. Shu bois yangi jamoadoshlarim bilan maydonda til topishib ketish u qadar murakkab bo‘lmaydi. Oldinda o‘yinlar ko‘p, nasib qilsa tez orada ritmga tushib olaman. Bu borada muammo ko‘rmayapman.
— Aytgancha, «Milan» tarkibida fransuz futbolchilar ham bor: Menyan, Fofana, Rabyo... Italiyaga kelishdan oldin ular bilan maslahatlashdingizmi?
— Ha, albatta bir qarorga kelishdan avval ular bilan batafsil gaplashib fikr almashganmiz. Albatta, bu jamoada hamyurtlarim borligi men uchun yaxshi, lekin muhimi ular emas, balki jamoa. Chunki birgina fransiyaliklarga emas, hammaga birdek moslashishim kerak. Faqat shundagina ko‘zlab qo‘ygan rejalarimga osonroq yetishaman. Asosiysi barcha yigitlar bilan samimiy munosabat o‘rnata olishim kerak.
— Yangi jamoadoshlaringizdan qaysi biri bilan o‘ynash sizni hayajonga solishi mumkin?
— Yuqorida aytib o‘tganimdek, eng muhimi — jamoa. Shuningdek, har bir futbolchining jamoada o‘ziga yarasha muhim roli bor. Ammo bitta o‘yinchi nomini aytishimni so‘rasangiz, Modrichni e’tirof etgan bo‘lardim. Men u bilan hech qachon o‘ynamaganman, lekin Luka qanchalik katta salohiyatga ekanini juda yaxshi bilaman.
— Leao bilan til topishib oldingizmi?
— Biz u bilan ilk bor kiyim almashtirish xonasida uchrashdik. Meni hayron qoldirgani Rafaning fransuz tilida juda ravon gapirgani bo‘ldi. Natijada dastlabki suhbatimiz juda ajoyib ruhda o‘tdi. Shundan beri Leao bilan mashg‘ulotlarda ham juda ko‘p gaplashyapmiz.
— Fransiya terma jamoasidagi so‘nggi xalqaro o‘yiningiz «San-Siro»da Italiyaga qarshi bo‘lgandi. Nima deb o‘ylaysiz, «Milan» terma jamoadan yana chaqiruv olish uchun to‘g‘ri tanlovmi?
— Ha, mutlaqo. Bundan tashqari, terma jamoadan chaqiruv olish uchun klubda yaxshi o‘yin ko‘rsatish va har hafta o‘zining nimalarga qodirligini isbotlash kerak, deb o‘ylayman. Lekin hozir bor fikru-xayolim yangi jamoamda, sheriklarim bilan tezroq til topishish hamda yangi muhitga moslashib ketish bilan band.
— Sizda golni nishonlashning noodatiy uslubi bor. Aytingchi, maydondagi muvaffaqiyatni o‘zgacha uslubda ko‘z-ko‘z qilishning sababi nima?
— Ochig‘ini aytsam, bu ishlarning barchasini o‘g‘lim uchun qilaman. Aniqrog‘i, u juda kichkinaligidanoq to‘p bilan o‘ynashni xohlardi, lekin oddiy koptok bilan biror nima qilishga kuchi yetmasdi. Shuning uchun asosan sharlar bilan o‘ynashini ta’minlardik. Uning quvnoq harakatlarini kuzata turib esa agar gol ursam, xudi shunday nishonlayman, deb o‘ylab qo‘yardim. Xullas, hammasi shundan boshlangan.
— Bu an’anani «Milan»da ham davom ettirasizmi?
— Umid qilamanki ha. Lekin buning uchun birinchi navbatda gol urishim kerak (kuladi).
Xurshid YUSUPOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
