O‘zbekiston milliy terma jamoasi va Eronning “Istiqlol” klubi yetakchisi Jaloliddin Masharipov futbolchilik faoliyatini yakunlaganidan so‘ng murabbiylikda o‘zini sinab ko‘rmoqchi ekanini ma’lum qildi. Masharipov bu haqda “90 minut” loyihasiga bergan intervyusida aytib o‘tdi.
“Kelajakda murabbiy bo‘laman. Buning asosiy sababi – faoliyatim davomida ko‘plab mutaxassislar bilan ishladim. Ayrim mutaxassislarni kamsitmagan holda ayta olamanki, aqlim ulardan kam emas”, deydi Masharipov.
Futbolchi murabbiylik sohasida “eski maktab” vakillari va zamonaviy futbol masalasiga ham to‘xtaldi:
“Avvalgi avlod murabbiylarining o‘ziga xos maktabi bo‘lgan, biroq bugun futbol o‘zgarib bormoqda. Yosh murabbiylar zamonaviy futbolni yaxshiroq biladi, tushunadi. Afsuski, bugun ham o‘zining qotib qolgan prinsiplaridan voz kecha olmaydigan mutaxassislar yo‘q emas. Bunday yondashuv rivojlanishga to‘sqinlik qiladi va murabbiyni ma’lum bir qolipga solib qo‘yadi. Shuning uchun eski uslubni unutish kerak. Masalan, nega Gvardiola doim izlanishda va zamonaviy futbol tarafdori? Chunki u zamonga tez moslashadi, shuning uchun u har doim boshqalardan oldinda yuradi. Hozir eski uslub bilan haligacha natija qilib yurgan birorta murabbiyni bilmayman”.
Masharipov, shuningdek, “Neftchi” bosh murabbiyi Islom Ismoilov va Samvel Babayandan so‘ng “Andijon”ni boshqarayotgan Islom Ahmedovning ishiga yuqori baho berdi.
“Zamonaviy murabbiylarda ko‘proq xohish bor – ular aqli, ko‘rgan va o‘rgangan bilimlarini aralashtirib, natija ko‘rsata olyapti. Masalan, “Andijon” bosh murabbiyi Islom Ahmedov ham bunga misol bo‘la oladi. Bundan tashqari Islom Ismoilov “Neftchi”da faqat zo‘r futbolchilar borligi uchun g‘alabalar qayd etyapti deyish noto‘g‘ri. Chunki Saudiya Arabistonidagi U-17 Osiyo chempionatida ham u o‘z darajasini ko‘rsatdi. O‘sha tarkibdagi futbolchilar ham jamoa sifatida zo‘r edi”, deydi milliy jamoa yetakchisi.
33 yoshli futbolchi murabbiy uchun kuchli yordamchi mutaxassis zarur ekanini ta’kidladi:
“Men biror jamoaga bosh murabbiy bo‘lganimda, yordamchi sifatida o‘zimdan kuchliroq mutaxassisni taklif qilaman. Bosh murabbiy uchun uni yaxshi tushuna oladigan, taktik tomondan maslahat beradigan yordamchi bo‘lishi zarur. Yakuniy qaror bosh murabbiy tomonidan qabul qilinadi. Kuchli yordamchi siz e’tibor bermagan jihatlarni ko‘ra oladi. “Paxtakor” futbolchisi bo‘lgan vaqtimda Shota Arveladze shunday yo‘l tutgan. U Piter Xyustradan ko‘p fikr so‘rardi. Agar yoningizda kuchli mutaxassis bo‘lmasa, o‘sish imkonsiz, o‘z g‘oyalaringiz bilan ortda qolib ketishingiz mumkin. Jismoniy, taktik va tahlilchi murabbiylarni jamoaga jalb etish zarur”, dedi “Istiqlol” futbolchisi.
Masharipov jamoadoshlari orasidan qaysi futbolchilarni o‘z shtabiga jalb qilishi haqidagi savolga quyidagicha javob berdi:
“Jamoadoshlarimdan kimlarni yordamchi sifatida taklif qilar edim: Jamshid Iskanderovdan aqlli fikrlar chiqadi. Jismoniy tayyorgarlik bo‘yicha Farruh Sayfiyevni olishim mumkin. U juda ko‘p yuguradi, hatto futbolni tugatganidan keyin ham. Darvozabonlar murabbiyi sifatida – O‘tkir Yusupov. Biroq bu ularning keyingi faoliyatiga bog‘liq”.
Jaloliddin Masharipov suhbat davomida jarohatidan tiklanish jarayoni yaxshi o‘tganni va Jahon chempionatiga qadar eng yaxshi holatda maydonga qaytishga harakat qilayotganini ta’kidladi.
Bundan tashqari, u O‘zbekiston milliy terma jamoasidagi raqobat, bosh murabbiy Fabio Kannavaroning ish uslubi va o‘yinchilarga munosabati haqida o‘z fikrini bildirdi.
Ma’lumot uchun, Masharipov jarohati sabab uzoq muddat Eronning “Istiqlol” klubi hamda O‘zbekiston milliy terma jamoasi o‘yinlarida ishtirok eta olmagan edi.
U 2026 yil 1 yanvar kuni Eron Proligasi doirasida “Sepahon”ga qarshi bahsning 73-daqiqasida maydonga tushirilgan va 90-daqiqada yana almashtirilgan. Ma’lum bo‘lishicha, Masharipovda tizzasidagi jarohat qaytalanishi kuzatilgan va futbolchi 31 yanvar kuni operasiya qilingan.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
