Milliy terma jamoamiz Suriyadan mag‘lub bo‘lgandan keyin hamma qatori men ham iztirobga tushdim. Turli mavzudagi maqolalarni o‘qiyapman, har kim o‘z fikrini oshkora aytyapti. Shu jumladan, men ham o‘z fikrimni bildirgim keldi.
Xo‘sh, o‘zi bizning oyog‘imizdan tortib qolayotgan kamchiliklarimiz nima? Bu haqda bir necha oy oldin "Bizning uslub" degan maqola yozgandim. Ha, bizning hech qachon foydasi tegmasa-da, voz kecha olmayotgan "sevimli uslubimiz" bor.
Bu nima bo‘lsa bo‘ldi, hujumlar qilaverib omadni raqib darvozasi yonidan izlayveramiz deydigan uslub. Hujumlar qilaveramiz, hujumlar qilaveramiz... Kutilmaganda raqibni shoshirib qo‘yish, taktik ayyorlik degan narsa umuman yo‘q. Bu formulamiz allaqachon Osiyo grandlariga, ayniqsa, arab jamoalariga ma’lum bo‘lib ulgurgan. Ular ana shu uslubda o‘ynashimizni oldindan sezaldilar-da, iloji bo‘lsa himoyada "avtobus" qo‘yib olib bitta xatomizdan unumli foydalanib, g‘alabani ilib ketishadi. Savol: bu "sevimli uslub" bilan biz JChda qandoq o‘ynaymiz?
Yana bitta savol: bizda avlodlar almashinuvi davri qanday kechyapti? 33 yoshli Aleksandr Geynrix, 35 yoshli Server Jeparov kabilarga munosib o‘rinbosarlar topildimi-yo‘qmi? Axir yoshlar va o‘smirlar terma jamoalarimiz o‘z yosh toifalarida JChlarda ishtirok etib qaytdi.
O‘smirlar terma jamoamiz Osiyo chempioni bo‘ldi. Bu jamoalar safida to‘p tepgan futbolchilar nega shu paytgacha milliy terma jamoamizga jalb etilmadilar. Biz Abbos Maxsitaliyev, Temur Hakimov, Oleg Zoteev, Sunnatilla Mamadaliyev, Davron Mirzayev, Sherzod A’zamov, Sherzod Karimov kabi nomlardan ko‘p narsa kutgandik. Achinarli tomoni, bularning orasida shu paytgacha terma jamoaga nomzod bo‘lish u yoqda tursin, terma jamoamiz eshigidan bo‘ylab ko‘rmaganlari bor. Demak, yosh futbolchilarimiz orasida o‘z iqtidorlarining qadriga yetmaydiganlari, o‘z ustida ishlamaydiganlari talaygina.
Yoki keyingi yillarda futbolimizda Sanjar Tursunov, Sardor Rashidov, Shohrux Gadoyev, Shuhrat Muhammadiyev kabi yangi nomlar kashf etildi. Hozir nega ularni ana shunday mas’uliyatli o‘yinlarda terma jamoamizga yordam berishmayapti? Yoki ular o‘sishdan to‘xtab qolishdimi?
Ana endi raqibimiz bo‘lgan Eron terma jamoasidagi avlodlar almashinuvi jarayoniga qarang. Bir vaqtlar, Ali Dayi, Aziziy, Karim Bageriy kabi mahoratli ijrochilar yetishib chiqqan yurt jamoasida bugun yangi nomlar kashf etilgan. Ular JCH-2018 tomon dadil odimlashmoqda.
Biz ham kelgusi o‘yinlarda yangilik yaratib, mundial sari odimlaylik-da endi. Buning uchun, eski hammom, eski tos — eski uslubdan voz kechaylikda, yosh iqtidorlarni MTJga jalb etaylik. Yoshlarga talabimiz - sizlar bir vaqtlar o‘tmishga aylanib ketgan yoshlar yoki o‘smirlar o‘rtasidagi ishtirok bilan mag‘rurlanib yurmanglar-da, ana endi milliy terma jamoamiz sharafini, jonajon O‘ZBEKISTON sharafini jahon maydonlarida munosib himoya qilishga kirishinglar.
SAFARALI SIDDIQOV
Kiritilgan sana: 27.03.2017 21:44. O'kildi: 12220 marta.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
