O‘zbekiston terma jamoasi JCH- 2018 da ishtirok etish uchun hali ham yaxshi imkoniyatga ega bo‘lib turibdi. Keyingi o‘yinlarda Xitoy va Janubiy Koreyani yutsak olam guliston. Necha yillardan buyon "qo‘shiq" qilib yurganimiz Jahon chempionatiga ham ishtirok etamiz. Ammo buni uddalash mumkinmi? Marchello Lippiday murabbiyni olib kelib o‘tirgan Xitoy, 1986 yildan buyon Osiyo nomidan muntazam JChlarda ishtirok etib kelayotgan Janubiy Koreya bunga ko‘narmikan.
O‘zbekiston terma jamoasi o‘zi JCh saralashida katta shasht bilan yo‘lga chiqadi. Dastlab ular Xitoy Taypeyi kabi jamoalarni 9:0 ga yutadi, Osiyoning futboli unchalik taraqqiy etmagan mamlakatlari terma jamoalarini osongina yutib, o‘sha paytlarda "biz Jahon chempionatiga qatnashmoqchimiz" deya doston qilib yuradi. Asosiy bosqichga kelganda esa, birinchi bosqichdagi jamoadan asar ham qolmaydi. Mabodo bizga Yaponiyami, Janubiy Koreyami, Avstraliyami to‘g‘ri kelib qolsa bormi, "bu raqiblar bizdan kuchli" degan xayolga boramiz-da, ulardan mag‘lubiyatga uchrashimiz uchun o‘zimiz zamin hozirlab beramiz. O‘z-o‘zidan qimmatli ochkolarni boy berib, boshqa jamoalar haqida o‘ylab ketamiz. Biroq Yaponiya yoki Janubiy Koreyadan qaqshatqich zarbani qabul qilib olganimizdan keyin biz ruhan sinamiz. Shunda bizni boshqa raqiblar ham osongina yutib ketadi. Eron, Janubiy Koreyaga o‘xshagan raqiblarga kutilmagan "sovg‘a" tayyorlashni bilmagan jamoa qayoqdan ham Jahon chempionatiga qatnashsin...
Biz birinchi bosqichni har doim ham ko‘ngildagidek o‘tkazganmiz. Masalan, JCH-2006 saralash bosqichida bizga Iroq raqib bo‘ldi. Iroq bizni Toshkentda yutib ketishiga bir bahya qoldi. Guruh g‘olibigina asosiy bosqichda ishtirok etadi. Buning uchun safarda Iroqni yutishimiz shart. Iroq o‘shanda xuddi shu tarkibi bilan Afina-2004 Olimpiadasida ishtirok etgan va yarim finalda Paragvayga yutqazgan edi. Bu jamoa ancha shakllangan bo‘lib, keyinchalik bizga raqib bo‘lgan Saudiya Arabistoni, Bahrayn, Quvayt kabi jamoalardan ham kuchli edi. Ammo biz o‘sha o‘yin uchun hayot-mamot jangiga kirgandek tayyorlandik. Chunki hali bu birinchi bosqich edi-da. Terma jamoamiz o‘sha o‘yinda ancha mazmunli o‘yin namoyish etdi. Kuchli raqibni safarda mag‘lub etdi — 2:1. Ha, o‘shanda Iroq juda kuchli edi. Ular buni 2 yildan keyin o‘tkazilgan Osiyo kubobi-2007da isbotlashdi. Chempion bo‘lishdi. Biz dastlabki bosqichdayoq kurashni to‘xtatib sharmanda bo‘lmaslik uchun ana shunday raqibni yo‘ldan olib tashlaganmiz. Asosiy bosqichda esa o‘sha Iroqqa qarshi ko‘rsatgan o‘yinimizdan asar ham qolmadi. Bizning ruhiyatimizda o‘rnashib olgan mag‘lublik hissi jahon chempionatiga qatnashishimizga yo‘l bermadi.
O‘shanda biz juda ko‘p qimmatli ochkolarni yo‘qotgandik va hozirgi holatimizning yarmicha ham imkoniyatga ega emasdik. Buni qarang, biz asosiy bosqichdagi 8 o‘yinning 4 tasi yutdik, 4 tasida esa mag‘lubiyatga uchradik. Shu bilan ham JCH- 2018 ga qatnashish uchun qulay imkoniyatga ega bo‘lib turibmiz. Bu holat menga terma jamoamizning Osiyo Kubogi- 2000 dagi holatini eslatib yuboryapti. O‘shanda biz Yaponiyadan 1:8 hisobida mag‘lubiyatga uchrab butun dunyoga sharmanda bo‘lganimizdan keyin ham keyingi o‘yinda Saudiya Arabistonini yutsak guruhdan chiqardik. Ammo arablar bizning kuchimiz nimaga yetishini o‘shanda ko‘rsatib bergandi — 0:5.
Endigi imkoniyatimiz ham shunga o‘xshab ketadi. O‘zi Xitoy va Janubiy Koreyani yutadigan jamoa bormi. Hali ikki yarim oy vaqt bor. Bemalol jamoani o‘yinlarga ruhan tayyorlab olsa bo‘ladi. Ammo ong-u shuurimizga o‘rnashib qolgan pessimistik kayfiyat bunga yo‘l berarmikan. Biz Janubiy Koreyani hatto Toshkentda ham yutolmasligimizni avvaldan bilamiz. Mana shu bosqich biz uchun oxirgi manzil ekanligini oldindan his etib ulgurganmiz. Buzoqning yugurigi somonxonagacha bo‘lib qoldi bu yog‘i. Har qanday raqibni yengish mumkinligini bizga Qatar terma jamoasi ko‘rsatib berdi-ku. Nega endi biz Xitoy va Janubiy Koreyani yutib JChga qatnashmasligimiz kerak. Ammo Eronga qarshi o‘yin shuni ko‘rsatdiki, bizda bu raqiblarni yutib JChda ishtirok etadigan jamoa umuman yo‘q! To‘g‘risi...
Safarali SIDDIQOV
Kiritilgan sana: 21.06.2017 12:07. O'kildi: 8288 marta.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
