Futbolda asosan natija uchun o‘ynaladi. Mabodo kerakli natija qo‘lga kiritilsa, olam guliston. Uni hech kim yo‘qqa chiqarolmaydi. O‘yin davomida ming yaxshi o‘yna, chiroyli o‘yin ko‘rsat, natijaga erishilmasa, hammasi bir pul. YEVRO- 2000 finalida yaxshi o‘ynab, oxirida naqd g‘alabani boy bergan Italiya terma jamoasini bilaman. Ular uchrashuvni yaxshi o‘tkazishdi. Ammo qit’a g‘olibi bo‘lish uchun o‘yin oxirida atigi 40 soniyani ushlay bilishmadi. "PSJ" ham "Barcelona"ga qarshi yaxshi o‘yin ko‘rsatdi. Ammo o‘ziga kerakli natijaga erisholmadi. Futbol o‘yinida uchrashuv mobaynida yaxshi o‘ynab mag‘lubiyatga uchrashing bor narsa. Futbol o‘zi shunisi bilan qiziq.
Biroq natijaga hakamlarning xatolari ta’sir ko‘rsatsa-chi. Buni qanday hazm qilish mumkin. Tarixda shunday o‘yinlar kuzatilganki, hakamlar xatolarga yo‘l qo‘yib, o‘yin natijasiga ta’sir ko‘rsatgan. Natija esa tarixda qolgan. 90-daqiqadan keyin hakamning yakunlovchi hushtagi yangradimi, natija degani shu.
Ana shunday vaziyatlardan biri YEVRO-1996dagi Bolgariya-Ruminiya o‘yinida kuzatilgan. Ikkala jamoa ham JCH-1994 qahramonlari, tarkibda Xristo Stoichkov va George Xaji kabi yetakchilar bor. 3-daqiqadayoq Stoichkov bolgarlarni oldinga olib chiqdi. Oradan hech qancha vaqt o‘tmay, ruminlar yarim himoyachisi Dorinel Muntyanuning zarbasi dastlab to‘singa tegib, darvoza ichkarisiga bir metrlar kirgan to‘p tashqariga qaytib chiqdi. 1:0 hisobi o‘yin oxirigacho o‘zgarmadi. Haqqoniy goli inobatga olinmagan Ruminiya terma jamoasi chempionat bilan barvaqt xayrlashdi.
Afrika Millatlar Kubogi-2000 musobaqasi finalida qit’aning 2 kuchli jamoasi — Kamerun va Nigeriya terma jamoalari uchrashdi. O‘yin ham shunga mos o‘tdi. Asosiy va qo‘shimcha vaqtlarda jangovar durang — 2:2 hisobi qayd etildi. Penaltilar seriyasida Nigeriya terma jamoasi hujumchisi Viktor Ikpebaning zarbasi oldin to‘singa tegib, darvoza ichkarisiga bir metrlar kirib, tashqariga chiqib ketdi. Toza golni hakamlar ko‘rmay qolishdi. Natijada Kamerun Afrika chempioni bo‘ldi.
Chempionlar ligasi-2002 yarim finalida "Bayer"- "Manchester Yunayted" bahsida "MYu" yetakchisi Roy Kinning zarbasini "Bayer" himoyachisi darvoza ichkarisidan qaytardi. Natijada "Bayer" (Leverkuzen) o‘z tarixida ilk marta Chempionlar ligasi finaliga chiqdi.
Men asosan, bu joyda to‘p darvozaga kirib, qaytib chiqqan holatlarni nazarda tutyapman. Vaqti kelib bu holatlarga chora topildi — golni aniqlaydigan texnologiya amalda joriy etildi.
Shunday vaziyatlar kuzatilganki, bu yog‘i hakamlarning insofiga bog‘liq bo‘lib qolgan. Chempionlar ligasi-2006 yarim finalida "Milan" va "Barcelona" uchrashdi. Dastlabki o‘yinda "Barselona" 1:0 hisobi bilan ustunlikka erishdi. Javob o‘yinida esa "Milan" hujumchisi Andrey Shevchenkoning toza goli inobatga olinmadi. Bu esa uchrashuv natijasiga o‘z ta’sirini ko‘rsatdi. Natija esa tarixda qoldi.
Uzoqqa bormaylik, O‘zbekiston terma jamoasi Osiyo Kubogi-2007da juda chiroyli o‘yin ko‘rsatdi. Chorak finalda Saudiya Arabistoni terma jamoasiga qarshi ham juda yaxshi o‘ynadik. 6ta zarbamizni ustun va to‘sin qaytardi. Bu ham yetmaganday hujumchimiz Maksim Shaskixning toza goli inobatga olinmadi. O‘yinning videotakrorini ko‘rib chiqqan OFK mutaxassislari buning uchun Federasiyamiz va terma jamoamiz a’zolaridan kechirim so‘rashdi. Ammo natija tarixda qolgandi.
JCH-2018 saralashida ishtirok etayotgan terma jamoamiz bu safar ham tarixda qolishni maqsad qilgan. Buning uchun esa, albatta, natija kerak. Oldimizda turgan o‘yinlarda Eron, Xitoy va Janubiy Koreyani yutib natija ko‘rsatishimiz lozim. Jamoamizga omad tilaymiz!
Safarali Siddiqov
Kiritilgan sana: 03.04.2017 12:19. O'kildi: 13889 marta.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
