«Bunyodkor»ning sobiq hujumchisi Bahodir Nasimov faoliyatini yana xorijda davom ettiradi.
Futbolchi Janubiy Koreyaning «Ansan Griners» klubi bilan shartnoma imzoladi. Qolaversa, hamyurtimiz «Ansan Griners» safida o‘rtoqlik uchrashuvida maydonga tushib, yirik hisobdagi g‘alaba (4:0)ga 2ta goli bilan munosib hissa qo‘shdi. Shu tariqa, murabbiylar shtabida yaxshi taassurot qoldirgan hujumchimiz yakunda koreys klubi bilan 2 yillik kelishuvga erishdi. Nasimov hujjatlarni rasmiylashtirib, yurtimizga qaytganidan so‘ng muxbirimiz undan safar taassurotlari haqida so‘zlab berishini so‘radi.
«Bunyodkor»dan ketish va takliflar
- O‘tgan yilning 31 dekabr kuni «Bunyodkor» klubi bilan tuzilgan shartnomam o‘z kuchini yo‘qotdi, - deya so‘z boshladi Nasimov. - Kelishuvga muvofiq, «qaldirg‘ochlar» tarkibida bir yil to‘p surishim lozim edi. O‘ylaymanki, o‘tgan vaqt ichida klub manfaati uchun qo‘limdan kelgan barcha ishni bajardim. Aslini olganda, «Bunyodkor»da qolishim ham mumkin edi. Lekin mavsum yakunlangach, manzilimga xorij klublaridan bir emas, bir nechta takliflar kelib tushdi. Lekin ularning aksariyati jiddiy emasdi. Shu bois, Koreya klubidan bo‘lgan aniq taklifni qabul qildim. To‘g‘risini aytsam, legioner sifatida xorij klublarida o‘ynashning gashti boshqacha, baribir.
«Ansan Griners»ga kelsak, Koreyaning bu klubi bir yarim oy avval menga qiziqish bildirgandi. E’tiborlisi, koreyslar hech qanday ko‘riksiz, to‘g‘ridan-to‘g‘ri shartnoma taklif qilishdi. Aniqroq aytganda, taklifdan so‘ng Koreyaga borib, bitta o‘rtoqlik uchrashuvida maydonga tushdim. Bu o‘yinda jamoamiz yirik hisobda g‘alaba qozondi, men esa gollarning ikkitasiga mualliflik qildim. Shundan so‘ng «Ansan Griners» vakillari kelishuvni rasmiylashtirishga qaror qilishdi.
Transfer tafsilotlari
- Koreys klubi men bilan agent vositasida aloqagacha chiqdi. Boshqacha aytsak, transfer ularning agenti tashabbusi orqali amalga oshdi. Kelishuvimiz ikki yilga mo‘ljallangan. Agar jamoa «K»-ligasiga chiqsa, shartnoma bandida ko‘rsatilgan qo‘shimcha bonuslarga ega bo‘laman. Tabiiyki, bunga moliyaviy shartlar ham kiradi. Bir so‘z bilan aytganda, shartnoma bandlaridan ko‘nglim to‘q. «Ansan Griners»ning taklifi meni shunisi bilan o‘ziga tortdiki, ochig‘ini aytganda, Janubiy Koreya chempionatining saviyasi biznikidan ancha yuqori. Terma jamoasi ham kuchli. Futbolchilari Yevropaning ko‘zga ko‘ringan klublarida to‘p tepishyapti. Yangi klubim oldiga kuchlilar safiga qaytish vazifasi qo‘yilgan. Umid qilamanki, bu vazifani uddalaymiz.
Ansandagi o‘zbeklar
- Ansandan Seulgacha mashinada 30 daqiqalik yo‘l ekan. Boz ustiga, shaharda o‘zbeklar juda ko‘p. Xullas, bu yerda o‘zimni begonadek his qilmayapman. Lekin ayni paytda biz jamoa bilan boshqa shaharda o‘quv-mashg‘ulot yig‘inini o‘tkazyapmiz. Butun jamoa mehmonxonada yashayapti. 23 fevralda Ansanga qaytamiz. Shartnomaga binoan, shahardan menga alohida uy va mashina berishlari kerak. Aytgancha, yangi jamoamda hali o‘zimga raqam tanlamadim. Ansanga borganimizdan keyin taqdimot marosimi o‘tkazilishi rejalashtirilgan. Ushbu marosim o‘tganidan so‘ng, aniqrog‘i, 4 mart kunidan boshlab, K Challenge league deb nomlangan chempionatga start beriladi.
Dastlabki taassurotlar
- Hali rasmiy o‘yinlarda maydonga tushmagan bo‘lsam-da, chempionatining kuchli ekanligiga ishonchim komil. Buni mashg‘ulotlardan ham bilib olsa bo‘ladi. Koreyaliklar mashg‘ulotlarda juda ko‘p yugurishar ekan. Kross - yugurishlar mashg‘ulotning katta qismini egallaydi. Mashg‘ulotning o‘zi ikki yarim soatga yaqin davom etyapti. Bilasiz, oliy ligamizdagi klublarlarda nari borsa, bir yarim soat mashg‘ulot o‘tkaziladi. Bejizga koreyalik futbolchilar 90 daqiqa maydonda bir maromda o‘ynamas ekan. Jismoniy holatga e’tibor juda katta. Uncha-buncha futbolchi jismoniy yuklamalarni ko‘tara olmaydi.
Klubda mendan tashqari yana uch nafar legioner bor. Ular Braziliya, Urugvay va Chernogoriya mamlakatlaridan.
Vazifalar
- Bilasizmi, «Ansan Griners» klubi o‘tgan yili ham ligada 1-o‘rinni egallagan ekan. Lekin jamoaning nomi «Ansan Police» bo‘lgani uchun ularga K-ligada ishtirok etishga ruxsat berilmagan. Shundan so‘ng klubning nomi «Ansan Griners»ga o‘zgartirilgan. Darvoqe, o‘tgan yili klub tashkil etilganining 20 yilligi keng nishonlanibdi. O‘zaro munosabatlarga kelsak, bosh murabbiy bilan tezda chiqishib ketdik. U bizdan nima talab qilinishini juda yaxshi tushuntiryapti. Til masalasida qiyinchilik yo‘q. Bu yerda menga maxsus tarjimon biriktirilgan. Uning yordamida barcha bilan aloqalarni mustahkamlayapman. Maqsadim - «Ansan»ni «K»-ligasiga olib chiqish uchun bor imkoniyatlarni ishga solish.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
