O‘tgan haftadan O‘zbekiston milliy terma jamoasi Tailandga qarshi o‘tkaziladigan o‘rtoqlik, Eron bilan bo‘lib o‘tadigan JCH-2018 saralash o‘yiniga tayyorgarlikni boshladi. Dastlabki kungi mashg‘ulotlar «Jar» stadionida o‘tkazildi. Xabaringiz bor, Samvel Babayan jamoasi «A» guruhi 8-turi doirasidagi o‘yinda Eron termasi bilan to‘qnash keladi. Ushbu uchrashuv 12 iyun kuni muhtasham «Ozodi» stadionida bo‘lib o‘tadi. Undan avval esa terma jamoamiz bugun «Bunyodkor» stadionida Tailandga qarshi o‘rtoqlik o‘yinida maydonga tushadi. Mazkur bahs bevosita Eron bilan bo‘lib o‘tadigan muhim uchrashuvga tayyorgarlik vazifasini o‘tab beradi. Samvel Babayan bo‘lajak o‘yinlarga 28 futbolchini jalb qildi. Ular orasida yangi nomlar va shu bilan birga anchadan beri milliy terma jamoaga chaqirilmay qo‘ygan futbolchilar ham bor.
Jumladan, Akmal Shorahmedovni bosh jamoada ko‘rmaganimizga ancha bo‘lgandi. Har holda, mundial saralashining bu siklida uni murabbiylar terma jamoaga chaqirishmagandi. Tajribali himoyachi «Nasaf»ga o‘tganidan keyin yanada ishonchli o‘yin ko‘rsata boshladi. Jamoasining har bir hujumida faol ishtirok etyapti. Ayniqsa, «Paxtakor» bilan O‘zbekiston kubogi doirasidagi Toshkentda o‘tgan uchrashuvda o‘yin qahramonlaridan biriga aylandi. Uning o‘ng qanotdan hujumga faol qo‘shilishi va jarima maydonchasiga aniq to‘p uzatishlari terma jamoa murabbiylarini befarq qoldirmadi. O‘sha o‘yinni Samvel Babayanning o‘zi ham bevosita «Paxtakor» stadionidan tomosha qilgandi. Akmalga o‘zini ko‘rsatishi uchun yaxshi imkoniyat taqdim etildi. Lekin Babayan Shorahmedovni maydonga tushirarmikan? Chunki «Paxtakor» klubida bu chiziqni yopishi mumkin bo‘lgan himoyachilar bor-ku! Agar ayni paytdagi o‘yin holatidan kelib chiqilsa, Shorahmedov o‘ng qanotda o‘ynashga har tomonlama haqli. Boz ustiga, Islom To‘xtaxo‘jayev jarohat olgan. Afsuski, chap qanot himoyachimiz Vitaliy Denisov ham «Lokomotiv» tarkibida jarohat orttirib oldi va u ham terma jamoamizga yordam bera olmaydi. Shuning uchun bo‘lsa kerak, Samvel Vyacheslavovich «Nasaf» jamoasi a’zosi Farrux Sayfiyevni yig‘inga chaqirdi. Yangi futbolchilardan Islomjon Qobilov ham ilk bor terma jamoadan chaqiruv oldi.
Yarim himoya chizig‘ida ham o‘ziga xos o‘zgarishlar bor. Yaponiya J-ligasida o‘ynagan birinchi va hozircha yagona futbolchimiz Fozil Musayev nihoyat, terma jamoadan taklif oldi. Universal yarim himoyachi «Jubilo Ivata» tarkibida ancha mazmunli o‘yin ko‘rsatyapti. Azizjon G‘aniyev, Odil Hamrobekov va Javohir Siddiqov singari yoshlarga ham e’tibor qaratildi. Ayniqsa, Siddiqov «Qo‘qon-1912» jamoasi safidagi o‘yinlari bilan muxlisu mutaxassislarda katta taassurot qoldirmoqda. Bejizga ijarada o‘ynayotgan futbolchi mavsum o‘rtasidayoq yana «Paxtakor»ga qaytarilmayapti.
Hujumchilar masalasida kutilgan trio. Igor Sergeev «Paxtakor» tarkibida bu yil ham sermahsullik ko‘rsatmagan bo‘lsada, asosiy hujumchimiz sifatida yig‘inda ishtirok etyapti. Temurxo‘ja Abduxoliqov Qatarning «Al-Sayliya» klubi safida to‘purarlik mahoratini namoyish etdi. Temurxo‘ja Suriya bilan o‘yinda terma jamoaga chaqirilgandi. Lekin uni o‘yinga moslashib ketishi uchun ozgina vaqt kerak. «Sehrli tayoqcha» sifatida e’tirof etilgan Adeksandr Geynrix hujumchilar uchligini yakunlab berdi. Yarim himoyachilar ro‘yxatiga kiritilgan Marat Bikmayevning ham hozir ayni «ochilgan» payti. Albatta, maydonga kimni tushirishni bosh murabbiy hal qiladi. Bizni quvontirgani, terma jamoada yangi nomlar bor, anchadan beri ko‘rinish bermagan futbolchilar chaqirilgan. Lekin ularning maydonga tushirilishi bu boshqa masala.
Xullas, sizu bizni oldinda iyun oyining qaynoq haftasi kutyapti. Eron bilan bo‘lib o‘tadigan o‘yin guruhda ko‘p savollarga javob beradi. Buni Karlush Keyrush ham o‘z intervyusida ta’kidlab o‘tdi. Bu mutaxassis O‘zbekistonga qarshi kechadigan uchrashuvni Eron uchun jahon chempionati finaliga qiyosladi. Bundan avvalgi JCH saralashida biz Tehrondan g‘alaba bilan qaytganmiz. Bu natijani yana bir bor takrorlash kerak.
Ma’lumot uchun, JCH-2018 3-saralash bosqichi «A» guruhi 7-turidan keyin Eron 17 ochko bilan peshqadamlik qilyapti. Janubiy Koreya 13 ochko bilan ikkinchi, O‘zbekiston 12 ochko bilan uchinchi o‘rinda bormoqda. Demak, ko‘rinib turibdiki, vaziyat ancha chigal. Uni yanada chigallashtirib olmaslik uchun «Ozodi»dan g‘alaba bilan qaytish kerak. Hech bo‘lmaganda durang hisob ham biz uchun yomon bo‘lmasdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
