Faoliyatini Amirliklarning «Al-Jazira» klubida davom ettirishga qaror qilgan va ikki yillik shartnomaga imzo chekkan Sardor Rashidov «Interfutbol» gazetasiga intervyu berdi.
Rashidovning oldida Qatar va Amirliklarning boshqa klublaridan ham takliflar bor bo‘lsa-da, futbolchi mamlakatning amaldagi chempioni safida o‘ynashni afzal bildi. Jurnalist Kamoliddin Alimovning birinchi savoli nega aynan «Al-Jazira» deb boshlandi.
«Shaxsan klub prezidenti va bosh murabbiy meni jamoa safida ko‘rishni istadi. Bu birinchi muhim omil bo‘ldi. «Al-Jazira»ning klublar o‘rtasidagi Jahon chempionatida qatnashishi bir to‘xtamga kelishimni osonlashtirdi. Salohiyatimni dunyoning grand klublariga qarshi o‘yinlarda sinab ko‘rish xohishi kuchlilik qildi. «Al-Jazira» mavsum yakuniga ko‘ra BAA chempioni ham bo‘lgandi. Hammasi bir bo‘lib, shu taklifni qabul qildim. Bundan xursandman» - dedi Sardor Rashidov.
Rashidov nima sababdan Qatarda qolishni istamagani borasida ham tushuntirish bergan. Shuningdek, u to‘p surgan «Al-Jaish» klubining «Lahviya» bilan qo‘shib yuborilishini tanqid ostiga olgan.
«Qatarda qolishni istamadim. Faoliyatimda burilish yasashni xohladim. Agar Yulduzlar ligasida qolganimda, hozirgi imkoniyatga ega bo‘lmasdim. O‘zimni boshqa chempionatda sinab ko‘rish istagi balandroq edi. Qatarning ikki yetakchi klubini birlashtirish g‘oyasi mamlakat futbol federasiyasidan chiqqani aniq. Menimcha bu unchalik to‘g‘ri qaror bo‘lmadi. Birlashishda ma’no ko‘rmayapman.
«Al-Jaish» Chempionlar ligasida muvaffaqiyatli ishtirok etadigan klublardan biri edi. Federasiyaning qarori bilan chempionatdagi raqobatga ham ma’lum darajada putur yetadi. Axir «Jaish» chempionlik uchun kurashadigan 3—4 jamoa qatorida gavdalanayotgandi. Endi esa faqatgina «As-Sadd» va yangi tuzilgan jamoa qoldi. Xulosam shu — bu qaror Yulduzlar ligasida saviya pasayishiga olib keladi. Shu bois Qatarda qolish variantiga ijobiy qaramadim» - dedi Sardor Rashidov.
Avvalroq Sardor «Al-Ayn» yetakchisi, Osiyoning 2016 yildagi eng yaxshi futbolchisi Umar Abdulrahmon ikki marta qo‘ng‘iroq qilib, jamoadosh bo‘lishni taklif qilgani borasida aytgandi. Shunga qaramay, o‘zbekistonlik futbolchi bu taklifni qanoatlantirmadi.
«Bilishimcha, Umar Abdulrahmon klub rahbarlariga meni xarid qilishni tavsiya etgan va ular nomzodimga qiziqib qarashgan. Lekin «Al-Ayn» kelasi mavsum Chempionlar ligasida qatnashmaydi. Klub BAA chempionatini bor-yo‘g‘i 4-o‘rinda yakunladi» - dedi Sardor Rashidov.
Futbolchining tan olib aytishicha, moliyaviy tomondan olib qaraganda «Al-Jazira»ning taklifi «Al-Jaish»nikidan yaxshiroq. Shu boisdan ham Rashidov yangi shartnomaga imzo chekishni ortiq paysalga solib o‘tirmagan.
Rashidov «Al-Jazira»da 10-raqamni qo‘lga kirita olmadi. Bu raqam Odil Ahmedovning «Anji»dagi jamoadoshi Mubarak Bussufaga tegishli. 14 iyul kuni Sardor «Al-Jazira» safiga yetib boradi. U bilan birgalikda klub mashg‘ulotlariga mashhur Lassana Diarra ham qo‘shiladi.
«Al-Jazira» bazasi masalasida qandaydir shubhaga o‘rin yo‘q. «Manchester Siti»da qanday sharoit yaratilgan bo‘lsa, «Jazira»da ham xuddi shunday. Chunki klub aynan «Manchester Siti» xo‘jayiniga tegishli» - dedi Sardor Rashidov.
O‘zbekiston milliy terma jamoasi a’zosi «Al-Jazira» bosh murabbiyi bilan gaplashib ulgurmagan. Har ikki tomon ta’tildan qaytishgach, Dubayda bu ish amalga oshadi. Shuningdek, Sardor Rashidovga Amirliklardan uy berilish masalasi ham ko‘rib chiqiladi.
Intervyu yakunida Rashidov Krishtianu Ronaldu «Real»dan ketmasligini istashi haqida aytib o‘tgan. Chunki portugaliyalik klubida qolsa, Jahon chempionatida unga qarshi o‘ynash uchun imkoniyat bo‘lishi mumkin.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
