«Qo‘qon-1912» darvozaboni Nikita Ribkin Interfutbol nashriga intervyu berdi.
- Nikita, tayyorgarlik jarayonidan ko‘nglingiz to‘lyaptimi? Mashg‘ulotlarda nimaga ko‘proq e’tibor qaratilmoqda?
- O‘quv-mashg‘ulotlar yig‘inini reja asosida davom ettiryapmiz. Kuniga ikki mahal tashkillashtirilayotgan mashg‘ulotlarda avvalo, jismoniy tayyorgarlikni maromiga yetkazish ustida ishlayapmiz. Yig‘in doirasida o‘rtoqlik uchrashuvlarida ham maydonga tushyapmiz, albatta.
- Mashg‘ulotlarda qatnashayotgan yangi futbolchilar xususida nima deya olasiz?
- «Obod»ning 3 nafar vakili ko‘rikka kelgandi va ulardan Doniyor Hasanov bilan shartnoma tuzildi. Lekin tarkibni yanada kuchaytirish talab etiladi. Zero, ikkinchi davra bahslari yanada shiddatli kechishini taxmin qilish qiyin emas. Yetakchi jamoalardagi katta o‘zgarishlarga e’tibor berish kifoya... Ko‘pchilik «Qo‘qon-1912»ni birinchi davra kashfiyoti sifatida ta’riflayapti. Ha, darhaqiqat, chakki taassurot qoldirmadik. Tanaffusga 2-o‘rinda chiqqanimiz ko‘p narsadan dalolat. Bu biz uchun ajoyib natija. Agar ba’zi o‘yinlarda kutilmagan yo‘qotishlarga uchramaganimizdami, hozir «Loko»ga ochko bo‘yicha ham ancha yaqin turardik. Masalan, Muborakda «Mash’al»ga qarshi kechgan o‘yinning so‘nggi daqiqasida gol qo‘yib yubordik. Keyin ketma-ket 3ta uchrashuvda durangga rozi bo‘ldik.
- O‘zi birinchi davra shunday kutilmagan natijalarga boy bo‘lishini kutganmidingiz?
- Ha, chempionatda «syurprizlar» keti uzilmayapti. Demak, ikkinchi davrada ham shunday noodatiy holatlarga tayyor turishimiz kerak. Ochig‘i, mavsum boshida bunaqasini o‘ylab ham ko‘rgan emasdim. «Bunyodkor» va «Paxtakor» jamoalariga qarang - ular birinchi davraning o‘zida avvallari butun mavsum davomida boy beradiganlaridan ham ko‘proq ochko yo‘qotishdi. Faqat grandlar emas, sovrinli o‘rinlarga da’vogar jamoalarda ham shu holat. Lekin chempionatimiz aynan shunisi bilan kuchli qiziqish uyg‘otmoqda.
- Xo‘sh, shaxsan o‘zingiz «Qo‘qon-1912»ni bosh kashfiyot sifatida ko‘rsata olasizmi?
- Xulosa chiqarishga hali erta. Turnir jadvaliga e’tibor qaratsangiz, jamoalar joylashuvi juda zich. Ya’ni ishtirokchilarni bir yoki ikki ochko ajratib turibdi. Demakki, bitta tur natijalari turnir jadvalini keskin o‘zgartirib yuborishi hech gap emas. Bordiyu, biror klub ketma-ket 2ta o‘yinda ochko ololmasami, jadvaldagi mavqesini boy beradi-qo‘yadi.
- «Qo‘qon-1912»ning muvaffaqiyatli ishtirokini avvalo, qaysi asos bilan izohlaysiz?
- Takror aytaman, ayni holatda qandaydir muvaffaqiyat haqida gapirishga erta. Hozirgi natijalarimizga kelsak, shunchaki, murabbiylar ko‘rsatmalarini sifatli bajaryapmiz.
- Bosh murabbiyning asosiy talabi nima - hujumkor futbolmi?
- Xuddi shunday. Lekin har doim ham hujumkorlikka tayanish to‘g‘ri kelmaydi. No‘’mon Hasanov futbolchilik davrida hujumkor yarim himoyachi sifatida to‘p surgan va bizdan ham shunday o‘ynashni so‘ramoqda. Lekin taktika raqibga qarab tanlanadi, albatta. Murabbiy ko‘rsatmalarini bexato bajarayotganimiz isboti shuki, birinchi davrada faqat «Olmaliq» darvozasini ishg‘ol qilolmadik. Qolgan barcha o‘yinlarda kamida 1ta gol urdik.
- Mavsum boshlanishi oldidan jamoa oldiga qo‘yilgan vazifa o‘zgarmadimi? Harqalay, hozirgi holatda sovrindorlar safida qolish uchun yaxshigina imkoniyatga egasizlar...
- Ha, shunday. Xullas, eng oliy maqsadlar sari intilishimiz aniq.
- Bu maqsad OCHL yo‘llanmasini yutishmi yoki...?
- Har bir jamoa xalqaro arenaga chiqishni xohlaydi, shu jumladan, biz ham.
- Faoliyatingizning kattagina qismi «Paxtakor»da o‘tdi va bu klub yuragingizga ancha yaqin bo‘lsa kerak. Qachonlardir «uy»ga qaytish rejangiz bormi?
- Oxirgi oylarda «Paxtakor» katta islohotlarni amalga oshirdi. Aniqrog‘i, klubda deyarli hamma narsa o‘zgardi. «Qo‘qon-1912» esa faoliyatimdagi uchinchi klub hisoblanadi va qariyb bir yildan buyon uning sharafini himoya qilyapman. Ochig‘i, ayni payt menga «Paxtakor»dan ko‘ra, «Qo‘qon-1912» yaqinroq.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
