Oliy liga klublari oraliq tanaffusda o‘z oldiga jiddiy maqsadlarni qo‘ygan klublar tarkiblarini kuchaytirishga harakat qilishdi.
Ayniqsa, «Bunyodkor» va «Paxtakor»da o‘zgarishlar ko‘lami kengroq bo‘ldi. Jumladan, Mirjalol Qosimov o‘zi bilgan tajribali futbolchilarni jamoaga qaytardi. Ulardan biri «Obod» himoyachisi Anvar G‘ofurovdir.
Biz ushbu futbolchidan intervyu oldik.
- Anvar, ma’lum muddatli tanaffusdan so‘ng «Bunyodkor»ga qaytdingiz. Bu o‘tish qanday amalga oshdi?
- Tan olaman, bu kutilmagan chorlov bo‘ldi, juda quvondim. Meni esdan chiqarishmagani uchun klub rahbariyati va Mirjalol Qosimov boshchiligidagi murabbiylar shtabiga minnatdorchilik bildiraman. Ko‘p yillik tajribamga tayangan holda jamoaga yordam berishga harakat qilaman.
- Davralar oralig‘ida «Obod»da yuzaga kelgan vaziyatga munosabatingiz qanday?
- Ochig‘i, nima deyishni ham, gapni nimadan boshlashni ham bilmayman. Bu klubdagi mashmashalar birinchi davraning o‘rtalaridayoq yuzaga kelgandi. Lekin bir narsani aniq ayta olamanki, bo‘lib o‘tgan voqealar men uchun yaxshigina saboq bo‘ldi.
- «Obod» rahbarlari birinchi davra uchun hisob-kitob ishlarini to‘liq amalga oshirishdimi yoki qarzdorlik saqlanib turibdimi?
- Bu masalada ham bir gap aytaman. Shu fikrimdan so‘ng muxlislar nimaga sha’ma qilayotganimni tushunib olsalar kerak. «Obod» klubiga nisbatan hech qanday e’tirozim yo‘q. Chunki klub rahbarlari va’da berganlaridek, amaldagi shartnomamni bekor qilib, boshqa jamoaga ozod agent sifatida o‘tishimni ta’minlashdi. Aslida, kelishuv muddati yil oxirida yakunlanardi. Umuman, «Obod»dagi o‘zgarishlar haqida gapirishni xohlamayman.
- Istaysizmi-yo‘qmi, baribir, yosh o‘z ta’sirini o‘tkazmay qolmaydi. Shu ma’noda, hozirgi jismoniy holatingiz 90 daqiqa o‘ynashga imkoniyat beryaptimi?
- Bu fikrga to‘liq qo‘shilaman. Yillar insondan o‘z ulushini oladi. Menda ham yosh o‘tayotgani sezilyapti. Maydondagi harakatlarimda buni o‘zim ham anglab yetyapman.
Lekin boshqa tomondan, zamonaviy futbolda hech kimga oson emas. U xoh navqiron bo‘lsin, xoh yoshi katta, tezkor o‘yin hammadan katta kuch talab qilyapti.
Shu narsani ishonch bilan aytishim mumkinki, hozir 90 daqiqa o‘ynashga tayyorman. Birinchi davrada va kubok bahsida ham maydonda to‘liq harakat qildim.
- «Bunyodkor» O‘zbekiston kubogi yarim finalida «Dinamo» bilan kutilmaganda durang o‘ynadi. Tajribali himoyachi sifatida raqib jamoaning himoya qo‘rg‘oni va umuman, o‘yini haqida nima deya olasiz?
- Bizda hisobni ochish uchun yetarlicha qulay vaziyatlar yuzaga keldi. Afsuski, ulardan unumli foydalana olmadik. «Dinamo» juda yaxshi shakllangan jamoa.
Himoyada murabbiylar talab qilgandek, bexato o‘ynashdi. Qolaversa, jamoaviy o‘yin to‘g‘ri yo‘lga qo‘yilgan. Buni ular bizga qarshi kechgan uchrashuvda ham isbotlashdi.
Futbolchilar bir-birlarini tushunib harakat qilishyapti. Ha, durang biz uchun kutilmagan natija bo‘ldi. Lekin tushkunlikka tushishga aslo hojat yo‘q. Hali oldinda javob uchrashuvi bor. Ishonamanki, safarda o‘zimiz uchun kerakli natijaga erishamiz.
- Lekin «Dinamo» futbolchilari ham qarab turishmaydi. Samarqanddagi o‘yindan nimalar kutyapsiz?
- Hali javob bahsi sanasi ma’lum emas. Oldinda chempionat o‘yinlari bor. Birinchi galda oliy ligadagi ishtirokimizga e’tibor qaratib, jiddiy yondashuv asosida tayyorgarlik ko‘rishimiz lozim. Ikkinchi davra uchrashuvlari hech bir jamoa uchun oson kechmasligi aniq.
- Menimcha, oliy ligada chempionlik masalasi hal bo‘lgan. Har holda, «Lokomotiv» 8 ochkolik farqni boy bermasa kerak. Shu nuqtai nazardan qaraganda, «Bunyodkor» ikkinchi davrada kumush medallar uchun kurasha oladimi?
- Bilmadim, shaxsan men boshqacharoq fikrdaman. Bu - futbol, unda oldindan nima bo‘lishini hech kim bilmaydi. Chempionatning dastlabki qismida kutilmagan natijalar yetarlicha qayd etildi.
Ikkinchi davra shiddat va keskinlik bobida birinchisidan keskin farq qiladi. «Olmaliq», «Buxoro», «Qo‘qon-1912» jamoalari peshqadamlarga yaxshigina boshog‘rig‘i bo‘lishadi. Bunga ishonaman.
Biz esa har bir o‘yinga alohida tayyorgarlik ko‘rib, faqat g‘alaba ilinjida maydonga chiqamiz. Medallar uchun kurashayotgan ekanmiz, ochko yo‘qotishga aslo haqqimiz yo‘q. Aks holda, oldimizga qo‘yilgan maqsad manzilidan uzoqlashaveramiz.
- Bu yil futbolchilik faoliyatingizdagi so‘nggisi emasmi?
- Ochig‘i, bilmadim. Bu savolga ikkinchi davradagi o‘yinlarim javob beradi. Lekin niyat qilamanki, joriy mavsum faoliyatimdagi so‘nggisi bo‘lmaydi. Hali futbolda erishmagan yutuqlarim bor. Sevimli kasbdan ketish hamisha og‘ir bo‘lgan. Lekin bu - hayot. Uni o‘z izmimizga bo‘ysundira olmaymiz.
- Shunga qaramay, baribir, murabbiylar faoliyatini kuzatyapsizmi? Ularning ish uslublarini yon daftarchangizga yozib boryapsizmi?
- Albatta, kuzatib boryapman. Bu narsa murabbiylik faoliyatimni boshlaganimda asqotishi aniq. Boisi, futbolchilik davrimda tajribali mutaxassislar bilan ishlash baxti nasib etdi.
- Vaqti kelib, bolalar futbolida ishlash istagidamisiz yoki katta futbolda?
- Katta futbolda ishlasam kerak. Shu menga yaqinroq va tanishroq tuyulyapti.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
