Ueyn Runining 100-sariq kartochkasi. «Everton» hujumchisi Ueyn Runi Angliya chempionati 4-turida ligadagi faoliyati davomida bosh hakam tomonidan 100-marta ogohlantirildi.
Eng qizig‘i, jonajon klubiga qaytgan «shrek» shu bilan APL tarixida 100 marta yoki ko‘proq «sariq»qa mubtalo bo‘lgan ikkinchi futbolchiga aylandi.
Ha, hujumchining bunday salbiy yubileyni ikkinchi raqam ostida «nishonlagani» g‘alati. Harqalay, zamonaviy futbolda himoyachilar ko‘proq qo‘pollik ishlatishga majbur bo‘lishadi.
Biroq APLning sariq kartochka reytingida oldingi 5ta o‘rinni egallab turgan «bezori»lar orasida orqa chiziq vakillari yo‘q! Qoyilmisiz?
Xo‘sh, unda jahonning eng kuchli birinchiligida «sariq» ishlash bobida kimlar yetakchilik qilishmoqda? Marhamat, «SSF» nashrining quyidagi maqolasi orqali shu haqda ma’lumot olishingiz mumkin.
1-o‘rin. Garet Berri («Vest Bromvich») - 119ta sariq va 6ta qizil kartochka. Abadiy «yosh» Garet - har qanday hakamni cho‘ntagidan sariq tusli qog‘oz chiqarishga majbur eta oladigan futbolchi. Ingliz yigiti maydonda necha daqiqa to‘p surishidan qat’iy nazar, kartochkaga munosibligini namoyish qilishni sira paysalga solmaydi.
Berri pozisiya bo‘yicha - tayanch yarim himoyachisi. Demakki, o‘yinning borishi uni tez-tez qoidaga xilof ravishda ish tutishga majbur etadi. Garet o‘zini oqlash uchun bitta faktni aytishi mumkin: «Vest Bromvich» vakili faoliyatini chap qanot himoyachisi sifatida boshlagan va maydon markaziga ko‘chib o‘tgach, hammasiga birdaniga ko‘nikishi qiyin kechgan. Barrining joriy mavsum «Albion» safidagi dastlabki 3ta o‘yinda «sariq»dan tiyilgani ham diqqatga sazovor holat hisoblanadi.
2-o‘rin. Ueyn Runi («Everton») - 100ta sariq va 3ta qizil kartochka. Maydonda chinakam jangchilarga xos xarakteri bilan ajralib turuvchi Ueyn Runi o‘yin davomida tez-tez noqulay vaziyatlarga aralashib qoladi. Qolaversa, kurashga chanqoq hujumchi ko‘pincha raqiblarni maydon markaziga qadar ta’qib qilib keladi va harakatlari samara bermagach, shunchaki, qoidani buzadi-qo‘yadi.
Bolalikdagi sevimli jamoasi - «Everton»ga qaytgan Runi ilk o‘yinlardanoq o‘z nonini halollab olishga qodirligini ko‘rsatdi. Angliya termasining sobiq sardori hattoki, «Tottenxem»ga qarshi kechgan va katta omadsizlik bilan tugagan uy uchrashuvida ham jamoadoshlari orasida yaqqol ko‘zga tashlandi.
U shuning barobarida dastlabki 3ta o‘yinda ham sariq kartochka ishladi. Aytish o‘rinli, APL reglamentiga ko‘ra, futbolchi har 5ta ogohlantirishdan so‘ng 1ta o‘yinni o‘tkazib yuboradi.
3-o‘rin. Li Boyer (faoliyatini yakunlagan) - 99ta sariq va 4ta qizil kartochka. «APLning bosh bezorisi» maqomiga asosiy da’vogarlardan biri sanalgan yarim himoyachi Li Boyer bu reytingda atigi 3-qatorni egallab turibdi. Angliyalik futbolchining sariq kartochkalar soni bo‘yicha 100talik marraga yetishiga bittagina ogohlantirish hushtagi yetmagan. Boyer nafaqat maydondagi «iflos» harakatlari, balki uning tashqarisida ko‘rsatgan xurmacha qiliqlari bilan ham tanilgan.
G‘u-ruri baland futbolchi har doim va har joyda mushtlashishdan o‘zini tiymagan, hattoki, o‘z jamoadoshlariga ham qo‘l ko‘targan. Deylik, bir safar Kiron Dayer bilan orani mushtlar vositasida ochiq qilishga uringan va u kabi diskvalifikasiyaga uchragandi.
Li shuningdek, raqiblarni ayovsiz qarshi olishni xush ko‘rardi. Xususan, shunday yondashuvi oqibatida Bakari Sanya jarohatga yo‘liqqandi. Umuman, ingliz yarim himoyachisi futbol olamidagi eng asosiy «bezori»lar ro‘yxatiga bejiz kirmaganini uning kartochkalar borasidagi statistikasi ham tasdiqlab turibdi.
4-o‘rin. Kevin Devis (faoliyatini yakunlagan) - 99ta sariq va 2ta qizil kartochka. Hujumchi Kevin Devis hisobidagi «sariq»lar Li Boyerniki bilan teng, ammo unda «qizil»lar 2ta oz. «Bolton» afsonasi hujum vaqti jismoniy kuchga tayanib to‘p surardi.
Ueyn Runi ijrosidagi o‘yin uslubiga xos qaysidir jihatlar aynan Devis harakatlarini eslatib yuboradi. Qarangki, ayni payt ikkisining «sariq guldasta»si ham deyarli bir xil. Statistika bo‘yicha aytsak, Kevin Devis Angliya premyer-ligasi tarixida eng ko‘p qoida buzgan (qo‘pollik qilgan) futbolchi hisoblanadi.
Adolat yuzasidan faqat shuni qo‘shimcha qilish kerak, «Bolton» yulduzining o‘zi ham raqiblar qo‘polligidan yetarlicha jabrlangan.
5-o‘rin. Pol Skoulz (faoliyatini yakunlagan) - 97ta sariq va 4ta qizil kartochka. Agar «ilohiy qo‘l» laqabi Diyego Maradonaga tegishli bo‘lsa, Pol Skoulz «yarim ilohiy qo‘l» ta’rifiga to‘la haqlidir. «Manchester Yunayted» faxriysi to‘pga qo‘l bilan teginishni xush ko‘rardi, shekilli. U buning uchun 2 marta adolatli ravishda jiddiy jazolangan ham. Muxlislar «Yunayted»ning UYEFA superkubogi doirasida «Zenit»ga qarshi o‘tkazgan o‘yinini yaxshi eslashsa kerak.
O‘shanda Skoulz qoidada ko‘zda tutilmagan usulni qo‘llagani uchun ikkinchi sariq kartochkani olib, maydonni erta tark etgandi. «Mallavoy» ke-yinroq mankunianliklarning «Fulxem» bilan o‘yinlari chog‘i o‘z jamoasi jarima maydoni ichida darvozabon vazifasini bajardi. Ya’ni to‘pni qo‘li bilan qaytarib yubordi. Skoulz APLdagi 4ta qizil kartochkasidan birini shu tariqa olgandi.
Yana bir fakt shuki, «Manchester Yunayted» sobiq yarim himoyachisi yangilangan «Uembli» stadionida maydondan chetlashtirilgan birinchi futbolchidir. Ha, ko‘plab ijobiy ko‘rsatkichlari orasida shunday o‘ziga xosi ham yo‘q emas.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
