2024 yilda «Komo» yana «A» Seriyaga qaytdi. Qisqa vaqt ichida bu jamoa Italiyaning eng qiziqarli va uslubiy jihatdan o‘ziga xos klublaridan biriga aylandi. Italiya shimolida joylashgan Komo shahri uzoq yillar davomida faqat o‘zining mashhur ko‘li va hashamatli hayoti bilan tanilgan edi. Endi esa bu yerda butun futbol jamoatchiligining e’tiborini tortgan klub bor.
2016 yilda klubni bankrotlikdan Akosua Puni Essyen — Maykl Essyenning rafiqasi qutqarib qolgan. 2019 yilda nazorat paketi Djarum Group tomonidan sotib olindi. Minoritar aksiyadorlar orasida Tyerri Anri va Sesk Fabregas ham bor.
Aynan Sesk Fabregas — «Komo»ga bo‘lgan katta qiziqishning asosiy sabablaridan biri. Bu yerda gap faqat uning mashhurligida emas, balki natijalarda ham. O‘tgan mavsumda jamoa 10-o‘rinni egallagan bo‘lsa, hozirda 4-pog‘onada bormoqda va ilk bor yevrokuboklarda, hatto Chempionlar ligasida ishtirok etishga yaqin.
So‘nggi oylarda jamoa muxlislarini ayniqsa quvontirdi: «Komo» ketma-ket beshta g‘alabaga erishdi, jumladan, «Yuventus» va «Roma» ustidan ham g‘alaba qozondi.
Statistika ham ta’sirli: «Komo» Yevropaning top-5 ligalarida o‘rtacha ochko to‘plash bo‘yicha 15-o‘rinda, o‘rtacha zarbalar soni bo‘yicha esa 16-pog‘onada.
Taktik tafsilotlar
Endi «Komo» muvaffaqiyati sabablarini qisqacha ko‘rib chiqaylik. Asosiy omillar — to‘g‘ri seleksiya va Sesk Fabregas joriy qilgan zamonaviy futbol.
Jamoa to‘psiz o‘yinda raqibni «bo‘g‘adi»: pressing va yuqori intensivlik — asosiy tamoyillar. Fabregas to‘pga egalik qilishni, tartibli va nazoratli o‘yinni afzal ko‘radi.
Futbolchilar maydonda zonalarni muvozanatli to‘ldiradi. Bu esa raqib himoyasini cho‘zish va uning zaif nuqtalarini ochish imkonini beradi. Fabregas hujumlarni ortiqcha tezlashtirishdan qochadi — bu uning futbolchilik davridagi uslubiga hamohang.
«Komo» Italiyada to‘pga egalik qilish va aniq paslar bo‘yicha eng yaxshi jamoa hisoblanadi. Lekin asosiysi raqamlar emas, maqsad — jamoa raqibni manipulyasiya qilishni o‘rgangan: uni o‘z yarim maydoniga tortib, keyin zaif zonalarda ustunlik yaratadi.
Himoyada «Komo» raqibga juda kam imkoniyat beradi. Shu bilan birga, har qanday usuldan foydalanadi — jamoa «A» Seriyada follar soni bo‘yicha yuqori o‘rinlarda. Asosiy vazifa — raqibni xato qilishga majburlash.
Natija bor: «Komo» chempionatda eng kam gol o‘tkazgan jamoalardan biri (22ta). Ular darvozasiga eng kam zarba yo‘l qo‘yadigan jamoalardan biri — faqat «Inter» bunda yaxshiroq.
Ko‘p hollarda jamoa yuqori chiziqda himoyalanib, ofsayd tuzog‘ini qo‘llaydi. Bu jihatdan ularni «Barselona» (Xansi Flik boshqaruvida) bilan taqqoslash mumkin. Ikkalasida ham sxema — 4-2-3-1. Farqi shundaki, kataloniyaliklar tezkor vertikal hujumlarni yoqtirsa, Fabregas ortiqcha shoshilmaydi va italyancha pragmatizmni saqlaydi.
Yetakchilar va yangi
yulduzlar
«Komo» transfer bozorida faol: oxirgi to‘rt oynada 227 million yevro sarflangan. Bu faqat kuchaytirish emas, balki kelajak uchun investisiya.
Jamoada qator iqtidorli futbolchilar bor:
• Xakobo Ramon — 8 oyda qiymati 1 mln.dan 25 mln. yevrogacha oshgan yosh himoyachi;
• Aleks Valle — «Barselona»dan kelgan istiqbolli qanot himoyachisi;
• Maksimo Perrone — «Manchester Siti»dan o‘tgan, to‘pni taqsimlovchi asosiy yarim himoyachi;
• Jeyden Addai va Assane Diao — tezkor va texnikasi yuqori vingerlar;
• Anastasios Duvikas — «A» Seriyaning eng yaxshi to‘purarlaridan biri (11ta gol), Lautaro Martinesdan uchta kam;
• Niko Pas — «Real Madrid» tarbiyalanuvchisi va jamoaning asosiy yulduzi. U o‘yinni jonlantiradi, chiziqlar orasida harakat qiladi va 10}6 samaradorlik ko‘rsatkichiga ega.
Fabregas ish uslubi
Sesk Fabregas jamoadagi barcha futbolchilarni aniq tizimga joylashtirib, qisqa vaqt ichida Yevropadagi eng istiqbolli murabbiylardan biriga aylandi. Hozircha uni mutlaq elitaga qo‘shishga erta, ammo «Roma», «Bayer» va «RB Leypsig» kabi klublarning qiziqishi uning darajasini yaqqol ko‘rsatadi.
Fabregas o‘z falsafasini boy faoliyati davomida Arsen Venger, Pep Gvardiola, Antonio Konte, Visente Del Boske va Joze Mourinyodan o‘rgangan jihatlar asosida shakllantirgan.
Uning ish uslubida tahlil markaziy o‘rin tutadi: har bir mashg‘ulot, har bir qaror chuqur o‘rganiladi. Fabregas ba’zan tahlilga ortiqcha berilib ketishini ham tan oladi, ammo aynan shu yondashuv jamoaning o‘sishiga xizmat qilmoqda.
Fabregas dogmatik murabbiy emas — u raqibga qarab taktikani o‘zgartiradi. Chuqur himoyaga qarshi o‘yin bilan yuqori pressingga qarshi o‘yinni u butunlay boshqacha qurishini ta’kidlaydi. Shu sababli har bir uchrashuv uchun alohida reja ishlab chiqiladi. Muvaffaqiyatning kaliti — futbolchilarni ishontirish: «Agar o‘yinchi sening g‘oyangga ishonsa, barchasi ishlaydi».
Shu bilan birga, u futbolchilarga muayyan erkinlik ham beradi. Ya’ni umumiy tizim va ko‘rsatmalar berilsa-da, maydonda qarorni o‘yinchilarning o‘zi qabul qiladi. Bu esa jamoaga moslashuvchanlik beradi.
Fabregas uchun murabbiylik — doimiy izlanish va rivojlanish jarayoni. U yangi yechimlar qidiradi, o‘zini sinab ko‘radi va jamoani yanada kuchaytirish ustida ishlaydi. Shu jihat uning eng katta ustunligi hisoblanadi.
«Komo» va Sesk Fabregasning bugungi yutuqlari tasodif emas — bu tizimli va puxta ish natijasi. Hali uni Yevropaning eng yaxshi murabbiylaridan biri deb atashga erta. Ammo bir narsa aniq: Fabregas — aqlli, moslashuvchan va doimiy rivojlanishga intiluvchi murabbiy. Shu bois, uning murabbiylik faoliyati ham futbolchilikdagi kabi buyuk bo‘lishi ehtimoli juda yuqori.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
