“Erudit SPORT” nashri tomoshabop o‘tishi kutilayotgan quyidagi to‘rt kubok to‘qnashuvini o‘tkazib yubormaslikni tavsiya qiladi:
№4-match: “Bayer-04” – “Bavariya”
12 yanvar, juma, soat: 00:30
TV-translyasiya: Futbol 3
O‘zaro uchrashuvlar:
11 G‘ALABA 10 DURANG 32 G‘ALABA
So‘nggi uchrashuv: “Bayer-04” – “Bavariya” 0:0 va 1:3
Imkoniyat: 30/30/40
Jamoalarning transfer qiymati:
“Bayer-04” – “Bavariya”
266,40 million yevro VS 643,25 million yevro
O‘yin haqida ikki og‘iz:
“Bayer” oxirgi o‘n to‘rt mavsumdagi eng yomon natijani (12-o‘rin) qayd etgach mutasaddilar jamoaning mavqeini tiklashni Xayko Xerrlixga ishonib topshirdi. Buni qarang-ki, “Farmasevtlar” yana raqiblariga bosh-og‘riq bo‘lyapti. Birgina misol: leverkuzenliklarning mag‘lubityasiz o‘yinlar seriyasi o‘n ikki o‘yinga yetgan. “Bavariya”da esa to‘rt turdan buyon yutqazmayapti. Negadir Yupp Xaynkes boshqaruvidagi jamoada gollar qurg‘oqchiligi kuzatilyapti. “Nemis mashinasi” to‘rt to‘qnashuvning uchtasida kichik hisobda g‘alaba qozongan. “Sherlar” birinchi davrada, mavsumning ilk matchida “Bavariya” bilan yuzlashganida uch ochkoni boy bergandi. Mutaxassis Xayko Xerrlix ham bir toshga ikki marta qoqilishni istamaydi. Qolaversa, muxlislari ko‘z o‘ngida mag‘lubiyatga uchramagan jamoa myunxenliklarga osonlikcha taslim bo‘lmaydi.
№3-match: “Real” Madrid – “Vilyarreal”
13 yanvar, shanba, soat: 20:15
TV-translyasiya: UzReport TV
O‘zaro uchrashuvlar:
21 G‘ALABA 10 DURANG 3 G‘ALABA
So‘nggi uchrashuv: “Real” Madrid – “Vilyarreal” 1:1 va 3:2
Imkoniyat: 40/30/30
Jamoalarning transfer qiymati:
“Real” Madrid – “Vilyarreal”
858,50 million yevro VS 196,20 million yevro
O‘yin haqida ikki og‘iz:
Joriy mavsumda “Real” osmonini tez-tez qora bulutlar qoplayapti. Hozir ham jamoa ustozining ishlari besh emas. Chempionat karvonboshisi “Qirollik klubi”dan o‘n to‘rt ochkoga ilgarilab ketgan, to‘qqiz o‘yinda darvozasidan gol o‘tkazib yubordi, yana Ronaldu ketamanga tushgan. Xullas, Zidan hal qilishi lozim bo‘lgan muammolar yetarlicha. “Vilyarreal” postini egallab turgan Xavyer Kalyexa avvalgi hamkasblaridek mavjud resurslarni to‘g‘ri taqsimlash ustida bosh qotiryapti. Buni Primeraning 11 matchida uddasidan chiqdi (8 g‘alaba va 3 durang). Ammo yana olti turda “Sariq submarina” yengildi. O‘zaro uchrashuvlarga ko‘ra, “Vilyarreal” mezbonlarga jiddiy qarshilik ko‘rsatadi: madridliklar so‘nggi o‘n besh ochkolik imkoniyatdan sakkiz ochko jamg‘argan. Boshqacha aytganda, maydon egalari so‘nggi besh bahsning uchtasida g‘alabadan mosuvo bo‘lgan.
№2-match: “Chelsi” – “Lester Siti”
13 yanvar, shanba, soat: 20:00
TV-translyasiya: Futbol TV
O‘zaro uchrashuvlar:
38 G‘ALABA 23 DURANG 18 G‘ALABA
So‘nggi uchrashuv: “Chelsi” – “Lester Siti” 3:0 va 2:1
Imkoniyat: 40/30/30
Jamoalarning transfer qiymati:
“Chelsi” – “Lester Siti”
681,75 million yevro VS 257 million yevro
O‘yin haqida ikki og‘iz:
Mutaxassislar Antonio Konte hamda Klod Pyuel Premyer liga doirasida uchinchi marta uchrashyapti. Yodingizda bo‘lsa, hamkasblar o‘rtasidagi avvalgi “Duel” o‘tgan mavsumda, Pyuel “Sautgempton”ni shug‘ullantirganida yuz bergan. O‘shanda italiyalik “Maestro”ning qo‘li baland kelgandi. Uchinchi o‘yinda fransiyalik murabbiy g‘alabani o‘z tomoniga og‘dira olarmikan? Vaholanki, “Aristokratlar” so‘nggi olti o‘yinda o‘n to‘rt ochko jamg‘ardi, “Stemford Brij”dagi yetti matchda raqiblarini yer tishlatdi. O‘z navbatida, “Tulkilar” barqaror o‘yin namoyish etmayapti: sakkiz turda uch ochko ishlagan va yana shuncha bahsda uch ochkoni raqibiga qo‘sh-qo‘llab topshirgan. Xususan, keyingi olti bellashuvda o‘n bir ochkoni “boshiga yetgan”. Qisqasi, “Lester Siti” uchun motivasiya vazifasini o‘taydigan faktlar bisyor. Bu esa “Aristokratlar” va “Tulkilar” o‘rtasidagi to‘qnashuv tomoshabop o‘tishiga ishora.
№1-match: “Liverpul” – “Manchester Siti”
14 yanvar, yakshanba, soat: 21:00
TV-translyasiya: Futbol TV
O‘zaro uchrashuvlar:
77 G‘ALABA 40 DURANG 42 G‘ALABA
So‘nggi uchrashuv: “Liverpul” – “Manchester Siti” 1:1 va 0:5
Imkoniyat: 35/25/40
Jamoalarning transfer qiymati:
“Liverpul” – “Manchester Siti”
676 million yevro VS 782,50 million yevro
O‘yin haqida ikki og‘iz:
Dastlabki davrdagi nokautni “Liverpul” ishqibozlari unutganicha yo‘q. O‘sha “tarsaki” murabbiy va o‘yinchilarning ham yodidan ko‘tarilmagan. Nemischa hisob-kitobga usta Yurgen Klopp raqibiga qanday sovg‘a hozirlab qo‘ygan? Ta’kidlash kerakki, “Shaharliklar”ning har bir g‘alabasi ularni chempionlik sari yaqinlashtiryapti, bir vaqtning o‘zida ta’qib qilayotgan jamoalardan uzoqlashtiryapti. Hozichra Premyer ligada “Manchester Siti”ning yo‘liga to‘g‘anoq bo‘ladigan jamoa topilmadi: 22 matchda 20 g‘alaba, 2 durang. “Liverpul” bunday natijadan yiroqda, ammo o‘z uyida raqiblariga non qoldirmaydi. Masalan, joriy mavsumda “Qizillar” maydoniga, “Enfild”ga safar uyushtirgan jamoalar ortga uch ochko bilan qaytmagan. Ustiga-ustak, mezbonlar darvozasiga to‘rt jamoa yo‘l topgan xolos. Xo‘sh, “Siti” mavsumdagi ilk mag‘lubiyatini tan olib, uyiga quruq qo‘l bilan jo‘naydimi yoki “Liverpul”ning o‘n bir o‘yindan iborat mag‘lubityasiz seriyaga nuqta qo‘yiladi? Ushbu savolga yakshanba oqshomida javob topamiz.
Ulug‘bek RAHMONQULOV, «Erudit SPORT» gazetasi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
