Buyuk Britaniya bosh vaziri Tereza Mey yetakchiligidagi hukumat rahbarlari (Tashqi ishlar vaziri Boris Jonson, Oziq-ovqat va qishloq xo‘jaligi vaziri Maykl Gouv, YEIdan chiqish harakatiga mas’ul Devid Devis), Rossiya Razvedka boshqarmasi sobiq xizmatchisi Sergey Skripalning zaharlanishi bahonasida JCH-2018ga nisbatan «boykot» e’lon qilish masalasini o‘rtaga tashlashdi.
Oddiy aytganda, siyosatchilarning xulosalariga ko‘ra, Angliya terma jamoasi Rossiya mundialida ishtirok etishdan bosh tortishi kerak.
Qiziq, futbol jamoatchiligi bunga qanday munosabat bildirmoqda? Rossiyalik jurnalistlar shu masala yuzasidan taniqli murabbiy Xarri Rednappni suhbatga tortishdi.
- Janob Rednapp, e’lon qilinishi ehtimoli bor «boykot» haqida eshitgandirsiz...
- Ha, eshitdim, bir kishining zaharlangani xususida ham o‘qidim. Lekin mojaroning ikir-chikirlariga to‘xtalishni istamayman. Har qancha urinmaylik, voqeaning to‘liq tafsilotlarini bilolmaymiz. Uning qanday yuz bergani noma’lum, gazetalarda esa istaganlaricha yozishlari mumkin.
- Buyuk Britaniya hukumati va qirollik oilasi Rossiya safaridan voz kechdi. Nahotki, siyosatchilar endi Angliya terma jamoasini ham JCHga yubormasa...
- JCHga nisbatan «boykot» e’lon qilish noo‘rin, menimcha. Zero, Angliya termasi yo‘llanmani kurash orqali qo‘lga kiritdi va endi musobaqada qatnashishi shart. Shaxsan men rasmiy «boykot» bo‘lishiga ishonmayman.
- Bunday ishonch asosi nima?
- Hozir ajabtovur vaziyat yuzaga kelgani rost. Masalaning tub mohiyatini tushunmayapman. Avvallari, deylik, urushlar payti Rossiya, Buyuk Britaniya va AQSH ittifoqchi mamlakatlar bo‘lganini yaxshi bilaman. Endi-chi? Ochig‘i, bu savolga javobim yo‘q.
- Tasavvur qiling, terma jamoa bosh murabbiyisiz va rahbarlar JCHga borishni taqiqlashsa, qanday yo‘l tutardingiz?
- Hukumat ruxsat bermasa, tabiiyki, iloj qolmaydi. Ammo barchasi shu darajaga bormasa kerak. Axir angliyalik muxlislar jamoaning JCHda ishtirok etishini istaydilar, boz ustiga, chiptalar xarid qilingan, yozgi rejalar aniq.
Taqiq amalda tasdiqlansa, futbolchilar ham kuchli ma’naviy zarba ostida qoladilar. Axir ular turnirga uzoq tayyorgarlik ko‘rishdi, saralash bosqichi mashaqqatlarini yengib o‘tishdi. Xullas, Angliya termasining JCHdan bosh tortishini hattoki, tasavvur ham qilolmayman.
- Britaniya matbuoti JCH-2018 tashkilotchiligi bo‘yicha qandaydir kamchilik qidirishdan charchamayapti. Go‘yoki, inglizlar Rossiyaning mezbonlik huquqini qo‘lga kiritganidan qattiq norozilar. Siz-chi, xafa emasmisiz?
- Bunday fikrlardan yiroqman. Rossiya mundiali a’lo darajada o‘tishiga ishonaman. Muxlislar bilan ishlash va xavfsizlik masalalari bo‘yicha ham qandaydir muammo yuzaga kelmasa kerak. Axir JCHning a’lo darajada o‘tishidan eng avvalo, mezbon mamlakat manfaatdor.
Xullas, Rossiya hukumati barcha ishlarni yuksak saviyada yo‘lga qo‘yish uchun zarur chora-tadbirlar qo‘llashi tayin. Shaxsan o‘zimga kelsak, afsuski, borolmayman. Chunki hech kim meni taklif qilmadi. Shunday ekan, mundial o‘yinlarini uyda, TV orqali ko‘raman. Ehtimol, qaysidir telekanalda ekspert sifatida ko‘rinish ham berarman.
- Nima deb o‘ylaysiz, ayni payt sport siyosatdan xolimi?
- Sport siyosatga aloqador emas, albatta. Faqat siyosatchilar muammolarni futbolga bog‘lamasalar, bas. Ya’ni qaysidir masalani hal qilishda futboldan foydalanmasliklari kerak. Xususan, Angliya terma jamoasining JCHdan chetda qolishi butun futbol olami uchun chinakam falokat sanaladi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Olimpik
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
