Misr termasi yetakchisi Muhammad Saloh yakunlangan mavsumni ko‘tarinki kayfiyatda o‘tkazdi. U «Liverpul» bilan Yevropa Chempionlar Ligasi finaliga qadar yetib bordi. Angliya chempionatida to‘purar bo‘lish bilan birga, mavsumning eng yaxshi o‘yinchisi, deb topildi.
Misr milliy jamoasi dastlabki uchrashuvini Urugvayga qarshi o‘tkazib, kichik hisobda imkoniyatni boy berdi. Saloh esa YECHL finalida olgan jarohati tufayli o‘sha uchrashuvda ishtirok etolmadi.
Umuman, mundial misrlik futbolchi va uning jamoasi uchun ko‘ngildagideko‘tmadi. Saloh Fransiyaning «Ekip» nashriga intervyu berdi.
- Bolaligingizda kumiringiz uch kishi bo‘lgan ekan: Ronaldo...
- ...Zidan va Totti.
- Nima uchun aynan ular?
- Jahonda afsonaviy futbolchilar ko‘p bo‘lgan. Lekin ulardan faqat uch nafari o‘zgacha edi. Har birining o‘z uslubi bo‘lgan. Ronaldo - tank. Zidan - haqiqiy sehrgar.
Uning «Real»dagi o‘yinlarini ko‘p ko‘rganman. Zidan va Ronaldo juftligi ajoyib ko‘ringandi. Totti ham buyuk. Romada 24 yil o‘ynadi! Zarba texnikasi, o‘yinni o‘qish qobiliyati... Ajoyib.
- Totti bilan bir jamoada o‘ynashga ham ulgurdingiz...
- Uning maydonda nimalarni ko‘rsatganini tasavvur ham qila olmaysiz. Inson sifatida ham shunchaki super. Haqiqiy professional.
Mashg‘ulotlarga hamisha birinchi kelib, oxiri ketardi. Odatda, birgalikda ko‘p ishlarni birga bajaradik.
- Italiyada ikki yarim yil o‘ynab, futbolchi sifatida nimalarni o‘rgandingiz?
- Taktika borasida ko‘p narsa o‘rgandim. Har kuni shug‘ullanardik. Spalletti davrida har bir mashg‘ulotdan keyin alohida shug‘ullana boshladim.
Gol urishni o‘rgandim. Jismoniy holatim ham yaxshilandi. Ro‘parangizda turgan Saloh uch yil avvalgisidan ancha kuchli (kuladi). Umuman olganda, har jihatdan o‘sdim.
- Futbol o‘ynashni qachon boshlaganingiz yodingizdami?
- Misrda futbol xalq o‘yini hisoblanadi. O‘shanda 7-8 yoshda edim, keyinchalik faqat futbol haqida o‘ylay boshlaganman. Har yerda to‘p surardik: maktabda, ko‘chada, uyda.
- 14 yoshingizda «Erab Kontraktors» jamoasiga borib qo‘shildingiz. Lekin Qohira siz tug‘ilgan Nagrig qishlog‘idan 120 kilometr uzoqlikda edi. Bunday hayot tarzi charchatmaganmi?
- Soat 8:00dan 10:30gacha maktabda o‘qirdim. Keyin Qohirga to‘rtta avtobusda to‘rt yarim soatda yetib borardim. Mashg‘ulotlarni o‘tkazgandan keyin yana ortga qaytardim.
Uyga kechki soat 10-11larda yetib borardim. Ovqatlanib, uxlardim va ertalabdan yana shu holat takrorlanardi.
- Hozir buni kulib aytyapsiz. Lekin o‘shanda bunchalik quvnoq bo‘lmagandirsiz?
- Ha, juda qiyin edi. Ammo futbol uchun har narsaga tayyor edim.
- Onangiz futbolni tashlashingizni ham istagan ekan. Shundaymi?
- U menga «Hammasi nima uchun? Qancha vaqting behuda ketyapti, senga bilan biror kor-hol ro‘y bersa, nima qilaman?», derdi.
Mashg‘ulotdan qaytganimdan so‘ng ota-onam qo‘ng‘iroq qilishsa, javob bermasdim. Chunki uxlayotgan bo‘lardim. Ammo otam onamga: «Uni tinch qo‘y. O‘ynasa o‘ynar», derdi. Onamga «Futbolni tashlay olmayman, usiz yashay olmayman», derdim.
- Mana, yulduzga aylandingiz. Shunday bo‘lishini o‘zingiz kutganmidingiz?
- Aynan shuning uchun ham Italiyadan Angliyaga qaytdim. Menga «Qolaver Rimda, shundoq ham ishlaring yaxshi», deyishgandi. Lekin bundanda ko‘prog‘iga qodirman, deb hisoblardim.
- Mavsum davomida juda ko‘p gol urdingiz. Vaholanki, siz qanot hujumchisi hisoblanasiz.
- Hammasi o‘ynash uslubimizga bog‘liq. Murabbiyimiz Yurgen Klopp voqealar markazida bo‘lishimizni, raqib darvozasiga yaqinroq joylashishimizni istaydi. Uning qo‘l ostidagi hujumchilar hamisha ko‘p gol urishgan.
- Kumir bo‘lish katta yuk. Qiynalmayapsizmi?
- O‘rganib ketdim. Misrda millat qahramoniga aylanganman. Mamlakatimiz juda yirik. Naq 100 million kishi yashaydi.
Ijtimoiy tarmoqlarda doim muhokama qilishadi. Bosim ham shunga yarasha katta. Shunchaki, futbol o‘ynab, rohatlanish kerak. Shunda hammasi joyida bo‘ladi.
- O‘tgan mavsum sizni Krishtianu Ronaldu va Leo Messiga ko‘p bora taqqoslashdi...
- Juda yoqimli. Axir ular haqiqiy yulduzlar. Lekin bu futbolchilarga yetishimga ancha bor.
- Oktyabr oyida Kongo bilan bo‘lgan bahsning 94-daqiqasida to‘p kiritdingiz. Aynan o‘sha gol tufayli Misr termasi Rossiyadagi jahon chempionatida qatnashadigan bo‘ldi...
- Unutib bo‘lmas voqea. Axir Misr jahon chempionatiga chiqishni 28 yil kutgandi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
