Transfer huquqi bo‘yicha «Barselona»ga tegishli va ayni payt «Istanbul» klubi safida to‘p surayotgan turkiyalik yarim himoyachi Arda Turon navbatdagi mojaroga o‘ralashib qoldi. Football Espananing xabar berishicha, ehtirosli futbolchi bu safar Istanbuldagi tungi klublardan birida turkiyalik qo‘shiqchi Berkay Shaxinni urib, uning burnini sindirdi...
Ma’lum bo‘lishicha, Arda Turon xonandaning rafiqasi O‘zlem Shaxinga gap otgach, o‘rtada janjal kelib chiqqan. Fanatik nashrida yozilishicha, yevrofutbolda nom qozongan yarim himoyachi O‘zlem Adi Shaxinga yaqinlashib, ortiqcha gapirgan: «Agar bo‘ydoq bo‘lganimda edi, sendek hurliqo jonon yonidan beparvo o‘tib ketolmasdim aslo...». Tabiiyki, bu Berkay hamiyatiga tekkan va o‘rtada nizo chiqqan. Yakunda burni singan qo‘shiqchini shifoxonaga olib borishgan. Qo‘shimcha qilinishicha, uni tezda jarrohlik stoliga yotqizishgan. Xullas, jabrlanuvchi shifoxonada qolgan.
Voqea shu bilan tugamagan. Ya’ni Turon keyinroq Shaxin ortidan shifoxonaga borib, qo‘lida to‘pponcha ko‘tarib turgancha undan kechirim so‘ragan: «U sening turmush o‘rtog‘ing ekanligini bilmagandim. Meni kechir, iltimos. Xohlasang, to‘pponcha bilan meni otib tashla...». 31 yoshli faxriy futbolchi ushbu mojaro haqida «Instagram»dagi shaxsiy sahifasida ham yozdi. To‘g‘ri, Arda unda qo‘shiqchining hamxonasiga shilqimlik qilganini inkor etdi: «Ha, o‘sha yerda ikkimiz bahslashib qoldik. Restoranga do‘stlarim bilan borgandim. Ammo alohida ta’kidlayman, janjalning sababi or yoki nomus emas...».
Aytish kerak, Turkiya futbolining eng yorqin vakillaridan biri hisoblangan Arda Turon oldin ham bir necha marta turli ko‘ngilsiz voqealarga o‘ralashib qolgandi. Misol uchun, 2017 yilning yozida Turkiya terma jamoasi ustozi Fotih Terim uni tarkibdan chetlashtirgandi. Sababi - Arda samolyotda futbolchilar bilan birga uchgan jurnalistni bo‘g‘ib, o‘ldirib qo‘yishiga sal qolgandi. Futbolchi ayni o‘sha mojarodan keyin terma jamoadagi faoliyatini yakunlab qo‘ya qolgandi.
Yana bir noxush voqea shu yil mart oyida kuzatildi: turkiyalik jurnalistlardan biri Turonga rafiqasi haqida savol berdiyu, baloga duchor bo‘ldi. Ya’ni g‘ururi baland yarim himoyachi birdaniga quturib ketib, muxbirga oshkora tahdid soldi: «Aslida boshingni tanangdan judo qilish kerak ekan. Hushyor yur». May oyida esa futbolchi Turkiya chempionatining o‘tgan mavsumi 32-turidan o‘rin olgan «Sivasspor»ga qarshi o‘yinda hakamga tashlandi. Oqibatda mamlakat futbol federasiyasi uni naq 16ta o‘yinga diskvalifikasiya qildi.
Darvoqe...
Ma’lumot uchun aytish kerak, Arda Turon shu yilning 11 mart kuni Aslixon Do‘g‘an bilan oila qurgandi. Kelin Turkiya prezidenti Rajab Toyyib Erdo‘g‘anning qizidir. Nikoh o‘qish marosimida davlat rahbari va uning turmush o‘rtog‘i guvoh sifatida ishtirok etishgandi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
