Men bugun “Paxtakor”ni tanigandekman. O‘sha ishonch bilan o‘ynaydigan, raqibidan zarracha ham cho‘chimaydigan “Paxtakor”ni tanigandekman.
O‘tgan yilgi o‘tish o‘yinini sharhlagandim. Snayder boshchiligidagi “Al-G‘arafa”ga imkoniyatni boy bergandi. O‘shanda hamma (o‘zim ham jumladan) Jamshid Iskandarovni tanqid qilgandi. Aslida jamoa yengilganida bir o‘yinchi mutlaq aybdor bo‘lmaydi. Jamoa yutqazgan bo‘ladi, tamom.
Bugun esa “Paxtakor” yengdi. Jamoa yengdi. Muhimi, ishonch bilan yengdi. Oldingi o‘yinda gol urgan Bikmayev yana to‘p kiritdi, to‘g‘ri, ammo bu g‘alabada jamoa yengganiga atayin urg‘u beryapmanki, barcha masalani Maratning individual harakatlari hal qildi, demagan bo‘lardim. Bir yil muqaddam “Paxtakor” mag‘lubiyatida Iskandarovning “aybi” qancha miqdorda bo‘lsa, bugungi g‘alabada ham hujumchimizning ulushi shunchadir.
Ikki marta bir xil hisobda g‘alaba qozonish va bir xilroq o‘ynab muvaffaqiyatga erishish ko‘p narsani belgilab beradi. Shota Arveladze nihoyat Toshkent klubida o‘z yo‘nalishini topib olgandek. Tarkib kuchli, dersiz, qo‘shilaman, ammo bir yarim yil muqaddam gruziyalik mutaxassis yurtimizga kelganida taxmini bo‘yicha kuchli tarkib tuzib olgandi. Ammo jamoa ruhiyati, “Paxtakor” uslubi va o‘z taktikasiga mosroq yigitlarni tanlash masalasida bu safar Arveladzening ko‘zi pishdi, ulg‘aydi va o‘z orzusiga qisman bo‘lsa ham erishishga muvaffaq bo‘lmoqda.
“Paxtakor” to‘p bilan ko‘p muomala qilib raqibidan ustunligini nishonlaydigan klub emas, “Paxtakor” raqibdan ustunligini bilib o‘ynasagina kuchli futbol ko‘rsata oladi. Qo‘rqmasligi o‘yinidan sezilib turishi kerak. Shunda u biz bilgan kuchli “Paxtakor”ga aylana oladi. Bugun “Paxtakor” ana shunday o‘yin ko‘rsatdi.
Klub rahbariyati tomonidan berilgan imkoniyatlar nuqtai nazaridan kelib chiqib Arveladzeni “superligamiz Gvardiolasi” deb hazillashgandik yaqinda. Rahbarlar tomonidan ana shunday ishonch oxiri o‘z so‘zini aytayotganini ko‘ryapmiz. Shota natijani o‘ylagan mavsumlarida hech narsa qila olmadi. Natijani o‘ylamay, asosiy e’tiborni o‘yinga qaratgan mavsumida esa, ko‘ryapmiz, o‘yini ham chiqyapti, natija ham bo‘lyapti.
Men shu bugun, shu o‘yinni ko‘ra turib, guruh bahslarida ishtirokini davom ettiradigan yurtimiz bayroqdoriga chin dildan omad tilamoqchiman. Zotan, bu “Paxtakor” bilan biz ham qo‘rqmasak bo‘laveradi.
Xayrulla HAMIDOV.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
