Toshkentning «Lokomotiv» klubi o‘z tarixida ikkinchi marta O‘zbekiston superkubogi sohibiga aylandi. Ta’bir joiz bo‘lsa, mazkur zafar «temiryo‘lchilar»ga xalqaro maydondagi ishtirokni boshlashdan avval o‘ziga xos ko‘tarinki kayfiyat bag‘ishladi. AGMK klubiga qarshi kechgan qiziqarli uchrashuv yakuniga yetgach, terma jamoamizning tajribali himoyachisi Islom To‘xtaxo‘jayevdan intervyu oldik. Zero, maydonda sardorlik bog‘ichi ostida to‘p surgan futbolchining yetakchilarga xos harakati stadionga tashrif buyurgan muxlislarga juda manzur bo‘ldi.
- Avvalo, qo‘lga kiritilgan g‘alaba va mavsumdagi ilk sovrin bilan tabriklaymiz. Dastlabki taassurotlar qanday?
- Tabrik uchun rahmat. Bu o‘yinga ancha muddatdan beri tayyorgarlik ko‘rdik. AGMKning OCHLdagi 2ta o‘yinini kuzatib, yaxshilab o‘rganib chiqdik va murabbiyimizdan tegishli ko‘rsatmalarni olgan holda, maydonga tushdik. Eng muhimi, yakunda g‘alabani nishonladik.
- Birinchi goldan so‘ng «Lokomotiv» natijani saqlab qolishga urindek taassurot uyg‘otdi. Bu Andrey Fyodorovning rejasi edimi?
- Ma’lumki, birgina o‘yindan iborat uchrashuvlarda natija o‘ta muhim hisoblanadi. Shu bois, hisobdan kelib chiqib harakat qildik. Shuningdek, raqibni himoyalanishga majbur etdik.
- Jokichning golidan keyin esa butkul himoyaga o‘tib oldinglar...
- Butkul emas-u, shunchaki, AGMK futbolchilarini o‘z maydonchamizda kutib olib, qarshi hujumda imkoniyatimizni kutdik. Ammo so‘nggi daqiqalar yaqinlashgani sari ehtiyotkorlikka e’tiborni kuchaytirishimizga to‘g‘ri kelgani rost.
- «Paxtakor» markaziy stadioniga ko‘plab muxlislar tashrif buyurishdi. Bu sizlarga qo‘shimcha kuch berdimi?
- Albatta! Muxlislar qancha ko‘p kelishsa, nafaqat biz, balki boshqa jamoalar o‘ynaganda ham, shunday shiddat kuzatiladi. Axir muxlislar - futboldagi «12-o‘yinchi».
- «Lokomotiv» Osiyo Chempionlar Ligasi guruh bosqichi ostonasida turibdi. Musobaqaga tayyogarlik jarayoni qanday ketmoqda?
- Ha, chindan ham, superkubok bahsidan so‘ng bor e’tiborimiz OCHLga qaratiladi. Ilk o‘yinni o‘z maydonimizda o‘tkazamiz. Bunga tayyorgarlik avjida. O‘ylaymanki, «Al-Vahda»ga qarshi bellashuvni a’lo kayfiyat va yaxshi jismoniy tayyorgarlik bilan boshlaymiz.
- Guruhdagi raqiblarni o‘rganyapsizlarmi? Ularning kuchiga qanday baho berasiz?
- Raqiblarni anchadan beri o‘rganyapmiz. Lekin shunisi aniqki, Chempionlar Ligasida kuchsiz jamoa ishtirok etmaydi.
- Superkubok o‘yini bir tomondan jamoa foydasiga ishlaydi. Ya’ni futbolchilar biroz bo‘lsada, muhim o‘yinlar oldidan sport formalarini tiklab olishadi...
- Darhaqiqat, bu o‘yinning xuddi shu vaqtda o‘tkazilishi ayni muddao bo‘ldi. Chunki baribir, rasmiy va o‘rtoqlik o‘yini o‘rtasida katta farq bor. Shu paytgacha milliy chempionatimizda ham 3-4ta uchrashuv o‘tkazganimizda-ku, nur ustiga a’lo nur bo‘lardi.
- Xorijdagi nazorat uchrashuvlarida asosan qaysi jihatlarga e’tibor qaratildi?
- Mavsumoldi yig‘inlari risoladagidek o‘tdi. Ularda jamoaviy o‘yinni shakllantirish, yangi futbolchilar bilan o‘zaro tushunib harakat qilish ustida ishladik. Tabiiyki, jismoniy tayyorgarlikka ham yetarlicha urg‘u qaratildi. Zero, OCHL o‘yinlarida jismoniy tayyorgarlik ko‘p narsani hal qiladi.
- «Al-Ittihod» va «Al-Vahda» «temiryo‘lchilar» uchun notanish emas. Ammo «Al-Rayan»ni bemalol «sirli tulpor»ga qiyoslashimiz mumkin. Qatar klubi haqida yetarlicha ma’lumotga egamisizlar?
- To‘g‘ri aytdingiz, «Al-Ittihod» va «Al-Vahda» bilan avval ham kuch sinashganmiz. Lekin ayni klublarda murabbiylar almashgan. Tarkiblarda juda katta o‘zgarishlar amalga oshirilgan. Menimcha, biz avval o‘ynagan jamoalar boshqacha uslub va taktikadan foydalanardi. Qatar klubini ham o‘rganishni boshlaganmiz, albatta. Ammo hozir bor e’tibor ilk tur o‘yiniga qaratilgan. Muxlislarimiz ko‘z o‘ngida g‘alaba qozonsak, qolgan raqiblar o‘yinini bosqichma-bosqich tahlil qilaveramiz.
- Amirliklarda bo‘lib o‘tgan Osiyo kubogidan so‘ng terma jamoamizdagi ayrim futbolchilar legioner maqomini olishdi. Sizga ham xorij jamoalaridan taklif yoxud qiziqish bo‘ldimi?
- Ochig‘ini aytsam, takliflar bor edi. Biroq «Lokomotiv» bilan Osiyo Chempionlar Ligasida ishtirok etishni ma’qul ko‘rdim. Bu yerda meni barcha sharoitlar qoniqtiradi. Qolaversa, qadrdon do‘stlarim bilan birga bo‘lishdan hursandman.
- Osiyo maydonlarida yurtimiz sharafini himoya qiluvchi jamoaga musobaqada imkon qadar uzoqroqqa borishni tilaymiz!
- Rahmat! Maqsadlarimiz juda katta. Nasib qilsa, chiroyli va mazmunli o‘yinlar ko‘rsatib, ijobiy natijalarga erishamiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
