O‘zbekiston milliy terma jamoasi bosh murabbiyi Fabio Kannavaro jamoaning tayyorgarlik jarayoni, Jahon chempionatidagi maqsadlar va Osiyo Kubogi haqida o‘z fikrlari bilan o‘rtoqlashdi.
Kanadaga qarshi o‘yin xulosalari
“Kanadaga qarshi o‘rtoqlik uchrashuvida ijobiy jihatlar ham, kamchiliklar ham ko‘zga tashlandi. Lekin bu o‘yin biz uchun muhim sinov vazifasini o‘tab berdi, sababi oldindagi yuqori saviyali raqiblarimiz darajasini yaxshiroq his qilishga harakat qildik. Jahon chempionatida Shimoliy Amerika jamoasiga qarshi o‘ynamasak-da, bizga bunday o‘yin kerak edi. Men doim kuchli jamoalarga qarshi o‘ynash tarafdoriman, chunki faqat ular sening kamchiliklaringni ko‘rsatib bera oladi. Kuchsiz raqiblarni yutishingiz mumkin, ammo bu orqali muammolaringizni ko‘ra olmaysiz.
O‘yindagi ijobiy jihat shuki, biz ko‘plab vaziyatlar yaratdik. Gol urish uchun aniq imkoniyatlarimiz bo‘ldi, bir oz omad yetishmadi. Birinchi bo‘limda yaxshi o‘ynadik, ammo ikkinchi bo‘limda jamoaviy harakatlarda xatolarga yo‘l qo‘yib, individual o‘yinga o‘tib ketdik. Bunday holatda istalgan raqibga qarshi o‘ynash qiyinlashadi. Murabbiylar shtabi bilan o‘yinni to‘liq tahlil qilib, kerakli xulosalarni chiqardik”.
Jahon chempionatidagi raqiblar (Portugaliya, Kolumbiya, Kongo DR) haqida
“Bunday darajadagi jamoalarga qarshi o‘ynaganda imkon qadar xatosiz harakat qilish kerak. Jahon chempionatida raqiblarning saviyasi o‘ta yuqori bo‘ladi — ular tezkor, jismonan kuchli va har qanday kichik xatoni darhol jazolay oladi. Bir jamoa bo‘lib harakat qilishimiz, qattiq ishlashimiz, sabrli bo‘lishimiz va nazoratni yo‘qotmasligimiz shart.
Asosiy kuchimiz ishtiyoq, mehnat va taslim bo‘lmaslikda bo‘lishi kerak. Agar menda Krishtianu Ronalduga qarshi maydonga tushish imkoni bo‘lsa, menda undan-da kuchliroq ishtiyoq bo‘lishi kerak. Kolumbiya yoki Kongo futbolchilariga qarshi ham xuddi shunday motivasiya bilan o‘ynashimiz zarur. Oldimizda zabt etishimiz kerak bo‘lgan katta tog‘ turibdi va biz uning cho‘qqisiga O‘zbekiston bayrog‘ini o‘rnatishga intilishimiz shart. O‘zbekistonliklar butun dunyoga boks va jangovar sport turlaridagi muvaffaqiyatlari bilan tanilgan. Futbolda ham oxirgi soniyagacha kurashadigan jangchi ekanimizni hammaga ko‘rsatishimiz kerak”.
Avlodlar almashinuvi va Osiyo Kubogi
“Tarkibni shakllantirishda o‘n yilga yaqin vaqt davomida terma jamoada o‘ynab kelayotgan, JCHga chiqish yo‘lida xizmat qilgan futbolchilarni inobatga oldim — ular bu yerda bo‘lishga loyiq. Lekin mening pozisiyam aniq: futbolchining ismi yoki o‘tmishdagi yutuqlari hal qiluvchi omil emas. Agar yaxshi o‘ynasangiz, hatto 16 yoshda bo‘lsangiz ham terma jamoaga chaqirilishingiz mumkin. U-17 va U-19 dagi bir nechta yigitlar hozirdanoq e’tiborimni tortdi. Tarkibda tajriba va yoshlik o‘rtasida to‘g‘ri muvozanat bo‘lishi zarur.
Jahon chempionati biz uchun katta maktab. Agar yaxshi natijaga erishsak, xursand bo‘lamiz. Aks holda, ishimizni davom ettiramiz, chunki keyingi ulkan maqsadimiz kuzda boshlanadigan Osiyo Kubogi bo‘ladi. O‘sha paytga borib tarkibga yangi kuchlarni ham jalb qilamiz”.
Muxlislarga murojaat
“Muxlislarimiz bir narsani bilishlarini xohlayman: futbolchilarimiz hatto g‘alaba qozona olmagan taqdirda ham maydonda bor kuchini berishadi. Ular O‘zbekiston libosini kiyishdan faxrlanadi. Kanadaga qarshi o‘yindan keyin yigitlar mag‘lubiyatdan shu qadar siqilishdiki, hatto tuzukroq uxlay olishmadi. Garchi bu shunchaki o‘rtoqlik uchrashuvi bo‘lsa ham, ulardagi mas’uliyat va terma jamoaga bo‘lgan munosabat meni murabbiy sifatida juda quvontirdi”.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
