Sayyoramizning klublar o‘rtasidagi eng nufuzli turniri sanaladigan Yevropa Chempionlar Ligasining qadri tobora oshib bormoqda. Futbol yangi asr boshida biznesga aylangach, klublarning dunyo reytingidagi o‘rni ayni shu musobaqadagi ishtiroki bilan chambarchas bog‘liq bo‘lib qolgani hech kimga sir emas. Unda g‘alaba qozonish doimo yoqimli, biroq qancha urunsang ham hayotda har doim ham omad kelavermaydi. Bugun nufuzli musobaqaning so‘nggi yillardagi eng omadsiz jamoalari haqida so‘z boradi.
«Manchester Siti»
2010-yilda Shayx Mansur qo‘l ostiga o‘tgan «Manchester Siti» klubi mana qariyb 10 yil davomida APLda bir necha bor chempionlikni qo‘lga kiritishni uddasidan chiqdi. Shunday bo‘lsada, klubning jahon bozorida ishlari havas qilgulik darajada emas. Klub uchun qancha sarmoya sarflashsada, ular hamshaharlariga mashhurlik borasida yeta olishmayapti. Ayni shu kamchilikni bartaraf etish uchun «Man Siti» klubi YCHLda g‘alaba qozonishni o‘z oldiga maqsad qilib qo‘ydi va ishga jiddiy kirishdi. Bu musobaqada so‘nggi yillarda bir necha bor chempionlikni qo‘lga kiritgan Pep Gvardiolaning kelishi ham aynan YCHLda g‘olib chiqish uchun tashlangan jiddiy qadam edi. Afsuski, kuchli mutaxassis ham jamoaga yordam bera olmayapti. Shu kunga qadar klubning eng yaxshi natijasi Pelegrining davridagi yarim final bo‘lib turibdi. Gvardiola esa Play-off bosqichida «Monako», «Liverpul» singari klublar to‘sig‘idan o‘ta olmagan bo‘lsa, bu mavsumda kamtarin «Tottenhem» ularni azaliy orzudan mahrum qildi. Darhaqiqat, klub tomonidan ajratilayotgan pullarni inobatga olib natijaga qarasak, omadsizlikni darrov sezasiz.
«Atletiko Madrid»
Diyego Simione qo‘l ostiga o‘tgan «Matraschilar» o‘yinida keskin o‘zgarish kuzatiladi va klub sekin-asta emas, katta tezlikda Yevropa grandlari qatoriga qo‘shilib oladi. Ayniqsa, 2014-yilgi mavsumda jamoa 18 yillik tanaffusdan so‘ng, «Barselona» va «Real Madrid»dek grand klublarni sezilarli farq bilan ortda qoldirgancha «La Liga»da chempionlikni qo‘lga kiritadi va YCHL finaliga qadar ortiqcha qiyinchilisiz yetib keladi. Ispancha yoki Madridcha o‘tgan final yakuniga soniyalar qolgan bir paytda ham Simione shogirdlari azaliy raqiblaridan hisobda oldinda borishardi, biroq… Qolganini hamma yaxshi bilsa, ajab emas. Oradan ko‘p o‘tmay jamoa so‘nggi kuchini yig‘ib yana finalga qadar yetib keladi. Ularni har doimgidek «Real Madrid» kutib oladi. To‘liq teng kurashlarda o‘tgan o‘yinda penaltilar seriyasida mag‘lub bo‘lgan «Atletiko Madrid» yana chempionlikdan quruq qoladi. Eng achinarlisi shundaki, «Atletiko Madrid» kichik byudjet bilan ham top klub yaratish mumkinligini isbotlashi uchun bir necha bor urungan bo‘lsada, buni uddasidan chiqa olmadi. Ajoyib mavsumlardan so‘ng klub birin-ketin o‘z futbolchilarini sotib yuborishni boshladi va jamoa yana o‘rtamiyonalar safiga qo‘shilib qoldi.
Ektor Kuperning omadsiz «Valenciyasi»
Hozirda O‘zbekiston terma jamoasida bosh murabbiy sifatida faoliyat olib borayotgan Ektor Kuper yangi asr boshida Ispaniyaning «Valenciya» klubi bilan shov-shuv ko‘targan va ikki bor YCHL finaliga qadar yetib borgan edi. Birinchi finalda «Real Madrid» bilan to‘qnash kelgan «Valensiya»ga tajriba yetmagan bo‘lsa, ikkinchi finlada ochiqchasiga omad ulardan yuz o‘girgan edi. «Bavariya» bilan kechgan asabiy uchrashuvda g‘olib aniqlanmagach, jamoalar futbol lotareyasida o‘z omadlarini sinab ko‘rishadi. O‘sha uchrashuvda Kuper shogirdlari kuchli ko‘ringan bo‘lsada, penaltilar seriyasida nemis klubi Oliver Kanning ajoyib o‘yini evaziga chempionlikni qo‘lga kirtadi. Kuperning «Valenciya»si esa, ko‘p o‘tmay kuchli klublar tomonidan talon-tarojga uchraydi va xalqaro turnirlarning finalida boshqa ko‘rinish bermay qo‘yadi.