«Paxtakor» safida eng ko‘p rasmiy o‘yin o‘tkazgan futbolchi va SSSR chempionati oliy hamda birinchi liga to‘purariga aylangan Birodar Abduraimov klub va futbolimiz afsonalaridan biri sanaladi.
Uning "Paxtakor" safidagi o‘yinlarini barcha faxr bilan tilga oladi. Abduraimov familiyasini eshitganda muxlislar ko‘z o‘ngida golga tashna hujumchi gavdalanadi desak, xato qilmagan bo‘lamiz. U nafaqat futbolchi, balki murabbiy sifatida ham katta natijalarga erisha olgan.
Birodar Abduraimov 1943 yilning 14 mayida Toshkent shahrida tavallud topdi. Bolaligidan sportga qiziqqan Birodar tengdoshlari bilan mahallada futbol o‘ynar, bo‘sh vaqt topdi deguncha stadion tomon oshiqardi. U yoshligida erkin kurash bilan shug‘ullanib, yoshlar o‘rtasida O‘zbekiston chempioniga ham aylangan. Ikki sport turidan futbolni tanlagan Abduraimov 16 yoshida O‘zbekiston o‘smirlar terma jamoasiga kiritildi. Sergey Arutyunov boshchiligidagi bu jamoa Chimkent va Petropavlovskdagi musobaqalarda muvaffaqiyat qozongan.
U har bir mashg‘ulot payti zalda soatlab shug‘ullanar, burchak zarbasini qoyilmaqom tarzda tepishni o‘zlashtirar, tinkasi qurisa hamki, yana va yana mashq qilaverardi. Shu tarzda Birodar uchun omadli yillar boshlandi. Oldinda uni "Paxtakor" kutardi.
Abduraimov 17 yoshidan "Paxtakor"ning asosiy tarkibida maydonga tushgan va debyut uchrashuvida "Qayrat" darvozasini ishg‘ol qilgan. "Paxtakor" uchun chempionatlarda umumiy hisobda rekord miqdordagi o‘yinlarni o‘tkazgan - 358ta. Jami rasmiy bellashuvlarda esa 500dan ortiq bahsda 200dan ko‘proq gol muallifiga aylangan va yurtimizning XX asrdagi eng yaxshi to‘purari deb tan olingan.
1960-74 yillarda "Paxtakor" jamoasining yetakchi hujumchisi sifatida ajoyib o‘yinlari bilan o‘zbek nomini dunyoga tanitdi. Abduraimov namoyish etgan fintlar butun SSSR miqyosida mashhur sanalgan va uning o‘yinlarini ko‘rish uchun stadionga ko‘plab ishqibozlar tashrif buyurishgan. Quyida biz sanab o‘tadigan faktlar uning chinakam iste’dod sohibi ekanligini yaqqol ko‘rsatib turibdi.
Mamlakat chempionatlarida 425 uchrashuvda ishtirok etgan, shu jumladan, "Paxtakor" tarkibida 358 uchrashuvda qatnashgan.
1968 yili SSSR chempionati oliy ligasida 22 gol, 1972 yili birinchi ligada 34 gol bilan eng sermahsul to‘purarga aylangan.
Nufuzli turnirlarda 106 ta gol kiritib, "Grigoriy Fedotov nomidagi to‘purarlar klubi" a’zosiga aylangan.
SSSR kubogi finalchisi bo‘lgan.
1990 yili O‘zbekistonda xizmat ko‘rsatgan murabbiy unvoni bilan taqdirlangan.
1992 yili bosh murabbiy sifatida Namanganning "Navbahor" jamoasi bilan O‘zbekiston Kubogining birinchi sohibi sifatida tarixga kirgan.
1994 yili Yaponiyaning Xirosima shahrida o‘tkazilgan XII Osiyo o‘yinlarida O‘zbekiston terma jamoasi katta murabbiyi sifatida chempionga aylangan.
Birodar Hasanovich O‘zbekiston futbolida o‘z o‘rniga ega Abduraimovlar sulolasiga asos solgan. To‘ng‘ich o‘g‘li Azamat terma jamoamiz tarkibida Osiyo o‘yinlari chempioni, bir qator mamlakatlar chempionatlari g‘olibi bo‘lgan. Yana bir farzandi Jasur Abduraimov endilikda "Paxtakor" jamoasi murabbiylar shtabida ishlamoqda. O‘z vaqtida yana bir farzandi Bahodir ham professional darajada futbol o‘ynagan.
Birodar Abduraimov "Shuhrat" medali (1994), "O‘zbekiston iftihori" (2003) ko‘krak nishoni, "Fidokorona xizmatlari uchun" (2006) ordeni bilan mukofotlangan.
Faoliyati mobaynida yana Moskvaning "Spartak" va SSKA, Yangiyerning "Meliorator" klublari sharafini himoya qilgan.
So‘g‘diyona
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
