O‘zbekiston chempionatining Pro ligasida 2-tur uchrashuvlariga kecha start berildi.Qirgulidagi "Neftchi" SK stadionida Farg‘onaning "Neftchi" hamda Urganchning "Xorazm" jamoalari kuch sinashishdi. Bo‘lib o‘tgan ushbu bahsda maydon egalari yirik 3:0 hisobida g‘alabaga erishdilar. Uchrashuv yakunlanganidan so‘ng mezbonlar bosh murabbiyi Abdusamad Do‘rmonov o‘yin hususida bir qator savollarga javob qaytardilar.
— Ikki hafta ichida "Xorazm" jamoasi bilan ikkinchi marotaba to‘qnash keldik. Yigitlarga uchrashuv oldidan bundan oldin bo‘lib o‘tgan bellashuvni unutib, bugungi bahsda o‘yin nazoratini o‘z qo‘limizga olishimizni ta’kidlab o‘tgandim. Ko‘rib turibsiz, oxirgi ikki haftada 4 ta o‘yin o‘tkazganimiz bois, futbolchilarda katta yuk hissi bor edi albatta. Shu qatori issiq ob-havo harorati ham o‘z ta’sirini o‘tkazishi tabiiy. Lekin, birinchi bo‘limning o‘rtalarida tajribali va yetakchi ijrochimiz Mansur Saidov o‘z mahoratini ishga solib, gol kiritishdan tashqari jamoa a’zolarini o‘z ortidan ergashtirishga ham muvaffaq bo‘ldi.
Tanaffus paytida yigitlarimizga berilgan ko‘rsatmalar o‘z ifodasini topdi. Ikkinchi bo‘limda hujumlarni ko‘paytirib, yana 2 ta to‘p kiritishga erishdik. Futbolchilarning namoyish etgan o‘yinlaridan mamnun bo‘lgan holda, ularga o‘z minnatdorchiligimni bildiraman. Endi bundan buyog‘iga oldinga qarab intilishimiz lozim.
— Javohir Rasulov bugun zaxira o‘rindig‘ida ko‘zga tashlandi. Uning uchrashuvlarga qay darajada tayyor ekanligiga oydinlik kiritsangiz?
— Javohir Rasulov fevral oyida jarohat olib, keyinchalik karantindan keyin ham tiklanish jarayonini o‘tkazib yuborib, mana ikki haftadirki umumiy guruhga qo‘shilib mashg‘ulotlarni boshlab yubordi. Hozirgi kunda unda tiklanish jarayoni davom etmoqda. Javohir qobiliyatli va mohir futbolchi. Undan umid va ishonchimiz katta.
"Neftchi" matbuot xizmati