"France Football" nashri tomonidan topshiriluvchi "oltin to‘p"ning qadri juda baland. Shunday bo‘lsada, stadion.uz UYEFA va "France Football" nashrlari tanlovlarini solishtirib ko‘rmoqchi.
Ochig‘i, "UYEFA" tomonidan mavsumning eng yaxshi futbolchisi uchun topshiriladigan sovrin ko‘pincha "oltin to‘p"ning soyasida qolib ketadi. Ayniqsa, so‘nggi yillarda «oltin to‘p» futbolchilar uchun status vazifasini o‘tab berishni boshladi. UYEFA esa, o‘z sovrini bilan «oltin to‘p»ga raqobatdosh bo‘lganicha yo‘q, ammo bu safar ularda imkoniyat mavjud.
Sababi, «qo‘rqoq fransuzlar» «oltin to‘p»ni bir mavsumga bekor qilishga qaror qildi. Xo‘sh, bu so‘rovnomalar g‘oliblari o‘rtasida tafovut qay darajada katta? Bugun UYEFA va "France Football" nashrining g‘oliblarini solishtirib ko‘ramiz.
"UYEFA talqiniga ko‘ra yilning eng yaxshi futbolchisi 2011" - 1 Messi, 2. Xavi, 3. Ronaldu
«Oltin to‘p 2011» - 1. Messi, 2. Ronaldu, 3. Xavi
2011 yilda Xavini UYEFA Ronaldudan yuqoriroq pog‘onaga joylashtirishga qaror qildi. «Oltin to‘p» esa, sovrinni Leo Messiga topshirdi. UYEFA versiyasida ham Leo mutlaq g‘olib deb topildi. Ikkinchi o‘rindagi almashinuvini esa, har kim o‘zi istagancha qabul qilishi mumkin.
"UYEFA talqiniga ko‘ra yilning eng yaxshi futbolchisi 2012" - 1. Inyesta, 2. Messi, 3. Ronaldu
«Oltin to‘p 2012» - 1. Messi, 2. Ronaldu, 3. Inyesta
Oradan bir yil o‘tib, UYEFA «Barselona»ning g‘alabalari zamiridagi yashirib kuch - Andreasni yilning eng yaxshi futbolchisi deb e’tirof etdi. Leo Messi esa, undan keyingi pog‘onadan o‘rin egalladi. Ronaldu kuchli uchlikni yakunlab bermoqda."France Football" nashri esa, 2012 yilda sovringa Leoni haqli deb topdi.
"UYEFA talqiniga ko‘ra yilning eng yaxshi futbolchisi 2013" - 1. Riberi, 2. Messi, 3. Ronaldu
«Oltin to‘p 2013» - 1. Ronaldu, 2. Messi, 3. Riberi
Frank Riberi bir necha bor 2013 yilda «oltin to‘p»ni undan o‘g‘irlab olishgani haqida so‘zlab bergan. Darhaqiqat, o‘sha mavsumda Frank deyarli barcha uchrashuvlarni yuqori darajada o‘tkazgan, YECHLda zafar quchgan edi. Riberi UYEFA talqiniga ko‘ra, 36 ball bilan g‘olib bo‘lgan. Messi va Ronaldular birgalikda 17 ball qo‘lga kiritgan xolos.«Oltin to‘p» uchun kurashda Myunhen klubi futbolchisi Ronaldu va Messiga imkoniyatni boy beradi.
"UYEFA talqiniga ko‘ra yilning eng yaxshi futbolchisi 2014" - 1. Ronaldu, 2. Noyer, 3. Robben
«Oltin to‘p 2014» - 1. Ronaldu, 2. Messi, 3. Noyer
2014 yilgi mavsumda Ronaldu chinakam fenomenal o‘yin namoyish etadi va bir yo‘la ikkita so‘rovnomada g‘olib chiqadi. UYEFA o‘z so‘rovnomasida Jahon chempionligini qo‘lga kiritgan Noyerni ikkinchi pog‘onaga joylashtirgan bo‘lsa, negadir «Oltin to‘p» sovrini Messini Noyerdan kuchliroq deb hisoblaydi.
"UYEFA talqiniga ko‘ra yilning eng yaxshi futbolchisi 2015" - 1. Messi, 2. Suares, Ronaldu
«Oltin to‘p 2015» - 1. Messi, 2. Ronaldu, 3. Neymar
Bu safar Ronaldu namoyish etgan mo‘’jizani Leo qaytardi. Oqibatda, ikkita so‘rovnomada ham g‘alaba qozondi. UYEFA o‘z talqinida ikkinchi pog‘onani Luis Suaresga topshirdi. Darhaqiqat, urugvaylik futbolchi o‘sha mavsumda chinakamiga porlagan edi. «Oltin to‘p» sovrini kuchli uchlikka Neymarni kiritishga qaror qildi. Katta ehtimol bilan bu qaror so‘rovnomaning yanada ommalashishi uchun qilingan qadam.
"UYEFA talqiniga ko‘ra yilning eng yaxshi futbolchisi 2016" - 1. Ronaldu, 2. Grizman, 3. Beyl
«Oltin to‘p 2016» - 1. Ronaldu, 2. Messi, 3. Grizman
2016 yilda Grizman Messi boshchiligidagi «Barselona»ni YECHLdan chiqarib yuborgan bo‘lsa, Ronaldu «Real» bilan chempionlikni qo‘lga kiritadi. Keyinroq bu yigitlar Yevropa chempionati finalida to‘qnash kelishadi va bu safar ham Ronalduning qo‘li baland keladi. UYEFA o‘z so‘rovnomasida haqli tarzda Grizmanni Ronaldudan keyingi o‘ringa joylashtirgan. Negadir "France Football" nashri Messini katta farq bilan Antuandan o‘zib ketgani haqida ma’lumot bergan.
"UYEFA talqiniga ko‘ra yilning eng yaxshi futbolchisi 2017" - 1. Ronaldu, 2. Messi, 3. Buffon
«Oltin to‘p 2017» - 1. Ronaldu, 2. Messi, 3. Neymar
Shu o‘rinda ushbu so‘rovnomalardagi o‘xshashlikka e’tibor qarating. Shunday bo‘lsada, 3-o‘rindagi futbolchilar tamomila ikki xil. UYEFA Buffonning Yevropa Chempionlar Ligasida g‘alaba qozonganini e’tirof etdi. "France Football" esa Neymarni faqat shou uyushtirish maqsadidagina so‘rovnomaning final qismiga qadar ro‘yxatda qoldirgan ko‘rinadi. Sababi, UYEFA o‘z so‘rovnomasidagi kuchli o‘nlikda ham Neymarga joy bermagan edi.
"UYEFA talqiniga ko‘ra yilning eng yaxshi futbolchisi 2018" - 1. Modrich, 2. Ronaldu, 3. Salah
«Oltin to‘p 2018» - 1. Modrich, 2. Ronaldu, 3. Grizman
2018 yilda so‘rovnomalarda Xorvatiya terma jamoasi g‘olib chiqishi tabiiy. Sababi, Modrich «Real Madrid» bilan YECHLda zafar quchgan bo‘lsa, JCHda finalda to‘p surishga muvaffaq bo‘ldi. Ronalduning Mundialdagi omadsizligi Modrichga sovrinni qo‘lga kiritish imkonini yaratgan bo‘lsa, ajab emas.
"UYEFA talqiniga ko‘ra yilning eng yaxshi futbolchisi 2019" - 1. Van Deyk, 2. Messi, 3. Ronaldu
«Oltin to‘p 2019» - 1. Messi, 2. Van Deyk, 3. Ronaldu
o‘tgan mavsumda aynan shu mavzu ustida juda uzoq tortishuvlar kuzatilgani yodingizdan ko‘tarilmagan bo‘lsa, ajab emas. Gollandiyalik himoyachi 2019 yilda «oltin to‘p»ga loyiq edi. «Liverpul»ni yangi darajaga olib chiqqan Virjilning «oltin to‘p»ni qo‘lga kiritish imkoniyati juda yuqori edi, ammo yakunda «oltin to‘p» Leoga nasib etdi. UYEFA esa, o‘z so‘rovnomasida Millatlar Ligasining finalida to‘p surgan va «Liverpul» bilan Yevropa Chempionlar ligasida zafar quchgan futbolchini eng yaxshisi deb e’tirof etdi.
Yakuniy tahlil. UYEFA o‘tkazayotgan so‘rovnoma "France Football" nashrining "oltin to‘p"idan adekvatroq!
UYEFA tomonidan o‘tkazilayotgan so‘rovnomaning «Oltin to‘p» bilan farqi u qadar katta bo‘lib ko‘rinmasligi mumkin, ammo aynan shu so‘rovnoma Riberi, Virjil va Inyesta singari futbolchilarni sovrin bilan taqdirlashga muvaffaq bo‘ldi. Shu detalning o‘zi, ushbu so‘rovnomani yaxshiroq kuzatib borishimiz lozimligini anglatadi.
So‘nggi 9 yil davomida UYEFA so‘rovnomasida Ronaldu va Messi besh bor g‘olib chiqqan bo‘lsa, "France Football" bu vaqt mobaynida sovrinni shu yigitlar o‘rtasida taqsimlab berishga qaror qildi. Aynan Ronaldu va Messi effekti sababli, «Balon D'or»ning statusi keskin ko‘tarilib ketgan bo‘lsa, ajab emas. UYEFA esa, asosan muayyan bir mavsumni boshqalardan yaxshiroq o‘tkazganlarga e’tibor qaratishni afzal ko‘rdi. ortda qolgan mavsum yakunlariga ko‘ra, UYEFA o‘z qarorini e’lon qilishi lozim.
"France Football" esa, sovrinni topshirishdan bosh tortdi. Bunga sabablar juda ko‘p. Katta ehtimol bilan Ronaldu va Messining kuchli uchlikdan o‘rin egallamagani uchun katta reklama homiylari bilan muzokaralar olib borish imkonsiz. Shuningdek, argentinalik va portualiyalik yulduzlarsiz katta "ajiotaj"dan umid qilmasa ham bo‘ladi. "France Football" barchasini inobatga oldi va 2020 yilda UYEFA o‘tkazayotgan so‘rovnomaga yo‘l berishga majbur bo‘lmoqda.
UYEFA final uchligini e’lon qildi. Robert Levandovski, Kevin De Bryuyne va Manuyel Noyer! To‘g‘ri, bu ro‘yxatga Alfonso Devis, Di Maria, Mbappe, Myuller, Ramos, Xoland, Gnabri singari futbolchilarni qo‘shish mumkin edi, ammo yuqorida nomi zikr qilingan futbolchilar barchadan ko‘ra sovringa haqliroq. UYEFA o‘z odatlariga sodiq qolgan holda, mavsumning eng yaxshi futbolchisini aniqlab beradi. Siz ham o‘zingiz uchun kimni g‘olib deb hisoblashingizni izohlarda yozib qoldiring.
Yahyoxo‘ja Ulug‘xo‘jayev
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
