O‘zbekiston futzal terma jamoasi osiyo chempionatiga tayyorgarlik doirasida 7-9 oktabr kunlari poytaxtimizdagi "O‘zbekiston" sport majmuasida Eron terma jamoasiga qarshi ikkita o‘rtoqlik bahsini o‘tkazadi.
Stadion.uz o‘yinlardan avval, milliy terma jamoa hamda AGMK klubi a’zosi, 2018 yilgi osiyo chempionati bronza medali sovrindori, futzal bo‘yicha bir necha bora O‘zbekiston chempioni va kuboklari g‘olibi Ixtiyor Ropiyev bilan suhbatlashdi.
—Assalomu alaykum Ixtiyor aka. Intervyuga rozi bo‘lganingiz uchun rahmat.
—Va alaykum assalom, sizga taklif berganingiz uchun rahmat.
—Bilishimcha, siz futzalga kirib kelishdan avval katta futbolda harakat qilgansiz. Keling, dastavval shu haqida haqida gapirsangiz?
—Ha, birinchi bo‘lib ko‘pchilik yosh bolalar singari futbolga kuchli qiziqqanman. Hatto, bolalik paytlarimdanoq to‘p tepishni boshlaganman. 2015-2016 yillarda asosiy vaqtim ikkinchi liganing “G‘allarol“ jamoasida o‘tgan, undan tashqari birinchi ligada ham o‘ynaganman. 23 yoshlik paytlarimda, viloyatning asosiy jamoasi hisoblangan “So‘g‘diyona“ning o‘rinbosarlar tarkibida ham o‘ynaganman. Ammo, u yerda doimiy harakat qilishni xohlamasdim, chunki darajam asosiy jamoaga tortishini bilardim. Qancha harakat qilmay, bo‘yim bilan bog‘liq muammolar ro‘kaj qilinib, asosiy jamoaga olinmaganman. O‘shanda bor yo‘g‘i 5 kun mashg‘ulotlarda bo‘lganman xolos. Agar asosiy tarkibda ko‘proq o‘ynashga imkon berilganida, yaxshi futbolchi bo‘lishimga ko‘zim yetardi. Ammo “tankam“ bo‘lmagan. O‘sha payti miyamda, futbolda, orqangda kattaroq “kimdir“ bo‘lmasa, sen talantlimisan, yaxshi futbol o‘ynaysanmi baribir, hech kim bo‘lib qolasan degan fikr juda ko‘p aylangan. Shunga qarayam, taslim bo‘lmadim va o‘z ustimda ishlashda davom etdim. Hozirgacha erishilgan muvaffaqiyatlar uchun shukr aytaman. Bugungi kunimdan esa sira nolimayman!
— Ixtiyor Rapiyevni tanitgan “Maksam-CHirchiq“qa kelishingiz va futzaldagi dastlabki mavsumingiz qanday bo‘lgan?
– Keyinchalik, o‘zimni futzalda sinab ko‘rishga qaror qilganman va 2017 yilda, Chirchiqning “Maksam-CHirchiq“ klubiga qabul qilinganman. Jamoaga kelib qo‘shilgan vaqtim terma jamoa bosh murabbiyi Bahodir Axmedov qo‘l ostida mashg‘ulotlar olib bordim va shundan so‘ng, futzalga qiziqishim ortib, bu sport turiga mehr qo‘ydim.
—Albatta, hozir futzaldasiz. Keyinchalik, yaxshi taklif bo‘lsa o‘zingizni yashil maydon(katta futbol)da ko‘ra olasizmi. O‘zi umuman, ikkala sport turida, sportchining jismoniy salohiyatlari qanday bo‘lishi kerak?
—Keyinchalik, katta futboldan taklif bo‘lsa, albbata, o‘ynagan bo‘lardim, bu orzum. Ammo, hozir futzalda baxtliman. Men futzalni katta futbolga qaraganda qiyinroq deb hisoblayman. Boisi, tezlik, chaqqonlik, o‘ta muhim va bu uchun yuqori darajadagi jismoniy kuch talab etiladi. Shuningdek, darhol qaror qabul qilish muhim o‘rin tutadi. Chunki, futzalda birgina xato qimmatga tushishi mumkin. Katta futbolda esa boshqacha. Kimdir xato qilsa, boshqasi uning o‘rnini to‘ldirishi, kamchilikni yopib keta olishi mumkin. Umuman olganda, ikkisining ham o‘ziga yarasha qiyin va murakkab jihatlari bor.
—Bilamizki, olmaliq jamoasi ko‘p yillardan buyon o‘zbek futzalining eng kuchli jamoalaridan biri hisoblanadi. Sizning AGMKga ko‘chib o‘tishingiz qanday yuz bergan va siz buni kutganmidingiz?
—Ha, AGMK kuchli jamoalardan biri. 5 karra mamlakat chempioni va bir qancha sovrinlar egasi hisoblanadi. Men to‘g‘risi kutmagan edim. Lekin har qanday futzalga kirib kelgan inson o‘ynagisi, g‘alabalar qozongisi keladi. Chempion jamoa tarkibida o‘ynash nasib qilganidan xursand bo‘lganman. Bu yerda yanada ko‘proq ishlashga, yaxshi ko‘rsatgichlar qayd etishga jamoadoshlarim kabi men ham doim harakat qilaman. Olmaliq klubiga jamoadoshim, Davron Abduraxmonov yordami va tavsiyasi bilan kelib qo‘shilganman.
—Qaysi futzalchilarning qayd etayotgan natijalariga havas qilib, ularning o‘yinlaridan doim nimadir o‘rganishga harakat qilasiz?
—Bunday futzalchilardan bir qanchasini keltirishim mumkin. Lekin eng ko‘p havas qiladigan, o‘yinlaridan ko‘p narsa o‘rganishim mumkin bo‘lgan inson Bahodir Axmedov. Ushbu murabbiyni, futzalga kirib kelishmdan to hozirgacha o‘z yordamlarini ayamagan, yaxshi ustoz sifatida hurmat qilaman.
—Bizda futzalga qaratilayotgan e’tibor qay darajada?
—Bizda bu yil, har yilgidan ham ko‘proq e’tibor qaratilyapti. Ayniqsa futzalni yoritilishi, sport telekanalining futzal o‘yinlarini jonli namoyish etishi yaxshi holat. Shunday davom etsa, ishonamanki, bizning chempionatimiz saviyasi ham ancha o‘sadi.
—Yaqinda, jamoangiz bilan O‘zbekiston Superkubogiga ega chiqdingiz. Sizningcha, milliy chempionat mavsum yakunida qaysi jamoalar sovrinli o‘rinlar uchun davogarlik qiladi?
—Bu yil hech qaysi bir jamoani kuchsiz deb bo‘lmaydi. Chempionatidagi har bir klub o‘ziga yarasha kuchli. Sovrinli o‘rinlar borasida “AGMK“ “Paxtakor“, “Xuaxin Jizzax“, “Mettalurg“, “Maksam-CHirchiq“ meddalar uchun kurashadi deb o‘ylayman.
—Futzaldagi ortda qolgan 3 yil mobaynida turli murabbiylar bilan birga ishladingiz. O‘z o‘yiningizdan qoniqish hosil qilmagan, tushkun holatlar ham bo‘lganmi? O‘sha pallada, ko‘proq qaysi mutaxassisning tavsiya va o‘gitlari sizga qo‘l kelgan?
—Albatta sportda har doim ham siz kutgan natijaga erishavermaysiz, kutilmagan voqealar, tushkun holatlar ham bo‘lib turadi. Shunday vaziyatlardan biri 2017 yilda yuz bergan edi. O‘shanda men Turkmanistonning “Ashxobod“ shahrida, yopiq inshootlarda bo‘lib o‘tgan osiyo o‘yinlaridan ba’zi sabablarga ko‘ra qolib ketganman. Bu esa menga yomon ta’sir qilgan, chunki bunday katta turnirga borishni, jamoasiga yordam berishni har bir sportchi xohlaydi. O‘shanda, hatto, futzalni tashlashga urinish ham bo‘lgan. Lekin murabbiyim Baxodir aka bunday musobaqalar, katta o‘yinlar hali oldinda ekanligini tushuntirganlar. Tushkunlikka tushmaslik kerakligini aytib, dalda berganlar. Shundan so‘ng xotirjam bo‘lganman.
—Milliy terma jamoadagi birinchi o‘yiningizda hayajon va bosimni qanday yengib o‘tgansiz?
—Milliy terma jamodagi 1 o‘yin Tojikiston termasiga qarshi bo‘lgan. Hayajon bo‘lmagan. Bor e’tiborimni o‘yinga qaratganman. Murabbiylar korsatmalarini bajarganman va o‘sha bahsda gol urishga ham erishganman.
—O‘tgan yili mavsumning eng yaxshi futzalchisi e’tirofi uchun eng kuchli uch nomzoddan biri bo‘lgan edingiz. Bu safar ham o‘z kuchingizni individual natijalarni yaxshilashga qaratasizmi yoki, ko‘proq jamoaviy sovrinlar yutishga?
—Albatta, bu yil ham eng yaxshi futzalchi bo‘lishga harakat qilaman. Biroz qiyin bo‘lsada, nasib qilsa, bunga erishaman. Chunki 1 turni o‘tkazib yuborganman. O‘ylashimcha futzalda eng yaxshi futzalchi bo‘lish uchun ko‘plab gollar urish va to‘purar bo‘lish kerak. Nasib bo‘lsa bu yil ham, eng yaxshi o‘yinimni ko‘rsatib, jamoa uchun sovrinlar yutishga harakat qilaman.
—Xabardormizki, shu kunlarda milliy terma jamoamiz “Eron“ termasiga qarshi ikkita o‘yin o‘tkazadi. O‘yin oldidan raqiblarimiz forslar va umuman, Osiyo chempionatiga tayyorgarlik borasidagi fikrlaringiz?
—“Eron“ terma jamoasi haqida gapiradigan bo‘lsak, ular nafaqat Osiyoda tengsiz, balki jaxonda ham o‘z o‘rniga ega terma jamoalardan biri hisoblanishadi. Ha, ularning biz bilan 2 ta o‘rtoqlik uchrashuvi bor. Lekin biz ham maydonga taslim bo‘lish uchun tushmaymiz. Garchi bu o‘rtoqlik bahsi bo‘lsa ham, o‘z uyimizda borimizni berib harakat qilamiz. Shuningdek bu galgi Osiyo chempionatida ham yaxshi qatnashib, yuqori o‘rinlarni olishni niyat qilganmiz. Buning uchun bir qancha futzalchilar, murabbiylar qo‘l ostida mashg‘ulotlar o‘tkazmoqda. Ishonamanki, biz ko‘proq ishlab, yaxshi tayyorgarlikka ega bo‘lamiz.
—Kelgusidagi rejalar, orzularingiz bilan ham o‘rtoqlashsangiz.
—Avvalo, vaqt oliy hakam, kelgusida nasib bo‘lsa, Osiyodan takliflar bo‘lsa, legionerga aylanib, albatta, boshqa, kuchli chempionatlarda to‘p tepishni, ko‘plab sovrinlar yutishni maqsad qilganman.
—Mazmunli suhbat uchun rahmat. Kelgusidagi faoliyatingizda omad tilaymiz!
—Rahmat!
Dadajon FOZILJONOV suhbatlashdi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
