Coca Cola superligasining 5-turidan o‘rin olgan “Qo‘qon-1912” – “Mash’al” uchrashuvidan so‘ng ijtimoiy tarmoqlarda bu o‘yin haqida juda ko‘p muhokamalar bo‘ldi. Aniqrog‘i o‘yindagi Mo‘min Meliyev tomonidan kiritilgan gol ancha “mashhur” bo‘ldi. Kimlardir xakamlarni yana kimdir Meliyevni , boshqalar mezbonlarni, o‘zlarini aybdor qilishmoqda. O‘yindan so‘ng har ikki jamoa bosh murabbiylari matbuot anjumanida o‘z fikrlarini bayon qilishdi. Oradan biroz vaqt o‘tdi. Xulosa qilishga barchada vaqt yetarli bo‘ldi. Biz o‘sha uchrashuv va o‘yindagi birinchi gol haqida yana bir marta fikrlarini bildirishlarini so‘rab, "Qo‘qon-1912" bosh murabbiyi Baxtiyor Ashurmatovga murojaat qildik.
"Avvalo shuni aytishim mumkinki, jamoamiz har bir o‘yinda muxlislarni xursand qilish uchun, ya’ni g‘alaba uchun maydonga tushadi. Muborakka ham mana shu maqsadda borgan edik va maqsadimizga erishdik. Muborakda bizni durang ham qoniqtirmasdi. O‘yindan oldin yigitlarga g‘alaba uchun oxirigacha kurashish va g‘alabaga ishonish xaqida ko‘rsatma bergandik. O‘yinda futbolchilarimiz juda ko‘p vaziyatlar yaratishdi. Yigitlar 90 daqiqa mobaynida halol ishladilar, borlarini berib faqat g‘alaba uchun o‘ynashdi. O‘sha barchaning e’tiboriga tushgan vaziyatda Meliyev o‘zining vazifasi , ya’ni gol urish uchun harakat qildi. Darvozaga zarba yo‘lladi va to‘p darvozaning ichida turganini ko‘rdi. Tabiiyki gol urdim deb xursandchilikni boshlab yubordi. Uning atrofida turgan raqib futbolchilari ham, darvozabon ham menimcha hamma gol bo‘ldi deb o‘yladi. Raqib futbolchilari ham 100 foiz gol bo‘lmadi deb aytisha olmadi. Bu vaziyat qanaqadir sekundlar ichida ro‘y berdi. Hakamlar ham maydon markazini ko‘rsatishdi. O‘yin davom etdi. Oradan ma’lum vaqt o‘tgach o‘sha vaziyatda to‘p darvozaga yon tomondan kirganligini takroriy lavxalarda ko‘rgan “Mash’al” vakillari gol xato bo‘lganligini aytishni boshlashdi. Bu biz uchun kutilmagan holat bo‘ldi.
Kechadan buyon ijtimoiy tarmoqlarda bu vaziyatga turlicha munosabatlar bildirildi va bildirilmoqda. Bu futbol – futbolda bunday xolatlar kuzatilib turiladi. Buyuk Maradonaning qo‘l bilan urgan goli, “Bayer” xujumchisi Kisslingning “Xoffenxaym” darvozasiga urgan goli va shunga o‘xshash ko‘plab gollarni misol qilish mumkin. Odamlar meni va gol urgan futbolchimizni “feyr-pley”ga amal qilmaganlikda ayblashmoqda. Vaholanki, biz ham masalaning asl mohiyatini o‘yin tugagandan keyin takroriy lavhalarni ko‘rgandan keyin bildik. O‘yin paytida stadionda VAR bo‘lganida gol bekor bo‘lar edi va hech kim e’tiroz bildira olmagan bo‘lardi. Misol uchun, "Bunyodkor" bilan o‘tgan turda bo‘lgan o‘yinimizning 94-daqiqasida to‘p jarima maydoni ichida raqib o‘yinchisining qo‘liga tegdi. VAR bo‘lganda penalti tepishimiz aniq edi. Biz qimmatli ikki ochko yo‘qotdik, lekin raqib o‘yinchisiga nimaga “feyr-pley”ga amal qilib to‘p qo‘lingga tekkanini aytmading demadik yoki xakamga e’tiroz bildirmadik. Xatoni o‘zimizdan izladik. Agar hamma “feyr-pley”ga amal qilib to‘p qo‘limga tegdi, o‘yindan tashqari holatdan gol urdim deb rostini aytganda bizni hakamlarga ish ham qolmasdi. Mo‘jizaviy gol deganimga ham o‘sha Kisslingning goli yoki bunaqa gollar o‘n yilda bir kiritilishini, mehnatimizga yarasha Allohning bizga ko‘rsatgan mehribonchiligini nazarda tutib aytgandim. Chunki yuz marta, besh yuz marta ataylab tepilsa ham to‘p to‘r teshigidan bunaqa tarzda o‘tmaydi. Men ham o‘sha vaqtda muxlislar yoki boshqa insonlarning gapi bilan bir qaror chiqarishim juda qiyin edi. Saytlarda chiqayotgan maqolalar, tvitlarga, tanqidlarga, Mo‘min Meliyevga bo‘layotgan bosimlarga va Xomyakovning o‘yindan keyin bildirgan fikrlariga o‘z munosabatimni bildirishni lozim deb o‘ylayman. Xomyakovni juda hurmat qilaman. Yaxshi murabbiy, yaxshi inson. Xomyakov zaxira o‘rindig‘idan gol bo‘lmaganligini aniq ko‘rdim degan, lekin nimaga “feyr-pley”ga amal qilishimizni o‘sha vaziyatda emas, kimlardir takroriy lavhalarni ko‘rib aniq gol bo‘lmaganligini aytganidan keyin talab qilgan. Agar darhol gol bo‘lmaganligini ishonch bilan aytganda biz bu vaziyatni oldini olishimiz mumkin edi. Gol bo‘lgan vaziyatda o‘rtadagi hakam ko‘rmagan, yordamchi hakam ko‘rmagan, vaqti kelsa tajribali hakamlarimiz VAR yordamida 10 daqiqa vaqt ketkazib ham aniq bir qarorga kela olmayotgan vaziyatda men takroriy lavhani ko‘rmasdan turib qanday qilib gol bo‘lgan yoki bo‘lmaganligini aniq aytishim mumkin edi? Misol uchun, “Navbahor” - “Paxtakor” jamoalari o‘rtasidagi uchrashuvda hakam olti daqiqa vaqt sarflab ham aniq qaror chiqarishi qiyin bo‘ldi. Biz gol urgan vaziyatda rostini aytaman birinchi gol bo‘lmadi deb o‘yladim. Zaxira o‘rindig‘ida o‘tirganlar xursand bo‘lishganda ulardan so‘radim. Gol bo‘ldimi? Ha to‘p darvoza ustuniga tegib darvozabondan qaytib darvozaga kirdi deyishdi. Keyin Mo‘min oldimga kelganda undan ham so‘radim. U ham ha aka gol bo‘ldi deb aytdi. Jamoamizdagi xar bir futbolchi bilan aka-ukadek bo‘lib ketganman. Meliyev iymonli, e’tiqodli va halol yigit. Mo‘minga o‘z ukamga ishongandek ishonaman. Shu sababli o‘sha vaziyatda Meliyevning o‘zi ham gol bo‘ldi deb o‘ylaganiga hech qanday shubham yo‘q. U o‘sha vaziyat haqida o‘zining bergan intervyusida batafsil gapirib beribdi. Shu sababli Mo‘minga ortiqcha bosim qilmaslik kerak. Tvitlarda Mo‘min gol bo‘lmaganligini aytib qahramonga aylanishi mumkin deyilgan. Ishonchim komil, agar Mo‘min gol bo‘lmaganligini 100 foiz bilganida u rostini aytardi va qahramonga aylanardi. Goldan keyin sakkiz daqiqalarcha o‘tgandan keyin Xomyakov oldimga kelib gol bo‘lmagan ekan, gol o‘tkazib yuboringlar deb aytdi. Men unga gol bo‘lgandan keyin o‘n daqiqa vaqt o‘tib ketdi. Men takroriy lavhani ko‘rmasdan turib qanaqa qilib gol qo‘yvoringlar, deb aytaman dedim. U yana gol qo‘yvorishimizni talab qilganida nimaga mening futbolchilarim boshqalarning xatosi uchun javob berishi kerak deb aytdim. Har xil maqolalar chiqarib meni Arveladze yoki Byelsa kabi qaror chiqarishi mumkin edi, mo‘jizaviy qaror bo‘lardi deyayotganlar, xato gol hisoblangan vaqtdan o‘n daqiqa o‘tib “feyr-pley”ga amal qilib gol o‘tkazib yuborgan birorta jamoa yoki murabbiyni topib beringlar-chi?! Arveladze — mard inson. Lekin Arveladze: “gol o‘tkazib yuboringlar”, degan vaziyat bilan, bizning o‘yindagi vaziyatlar butunlay bir-biridan farq qiladigan vaziyatlarku! Aytaylik, raqib futbolchilari to‘xtab qolganda biz gol urganimizda biz gol o‘tkazib yubormasak va tanqid qilinsak arzirdi. U vaziyatda esa futbolchimiz yakka kurashda g‘olib bo‘lib, darvozabon bilan birga-bir chiqib zarba berdi va to‘p darvoza ichida.
Mayli keyingi holatga ham to‘xtalib o‘tsam. Xomyakovdan keyin oldimga Dilyaver Vaniyev keldi. Biz gaplashayotganimizni translyasiya paytida ham ko‘rsatib o‘tishibdi. Hozir lablarning qimirlashiga qarab nima gapirilganlini aniqlasa bo‘ladigan zamon. Agar kim ishonmasa bizning gapimiz qanday kechganini aniqlasa bo‘ladi. Vaniyev “o‘rtoq, gol bo‘lmabdi, gol o‘tkazib yuboringlar” dedi. Men unga “do‘stim durang qilib berishimizni hohlayapsanmi, goldan keyin o‘n daqiqa o‘tib ketdi. Futbolchilarimga qanday gol o‘tkazib yuboringlar deb aytaman” dedim. “Futbolchilarim va boshqa insonlar xozir gol o‘tkazib yuborsak qanday tushunishadi”, degan javobni berdim. Vaniyev “lekin gol aniq noto‘g‘ri kiritilibdi gol o‘tkazib yuboringlar” dedi. Men unga: “agar sen noto‘g‘ri gol urilganiga 100 foiz ishonching komil bo‘lsa, mayli faqat o‘yin oxirida gol o‘tkazib yuboramiz” dedim. Chunki jamoam hozir gol o‘tkazib yuborsa goldan keyin ruhlanib, yaxshi kayfiyatda o‘ynayotgan jamoamning kayfiyati tushib durangni ham ushlab qolishi qiyin bo‘lardi. Shundan keyin Vaniyev oldimdan ketdi. Aytmoqchi bo‘lganim, o‘yin oxirida gol o‘tkazib yuborganimiz har xil gap so‘zlarga sababchi bo‘lishi mumkin bo‘lsa-da, biz “feyr-pley”ga amal qilishga tayyor edik. Xudoga shukrki, biz ikkinchi golni ham kiritdik va o‘yin oxirigacha raqib jamoa tomondan boshqa hech kim oldimizga boshqa kelmadi va o‘yin so‘ngidagol o‘tkazib yuborishimizdan ma’no qolmadi. Eng xursand qilgani o‘yindan keyin Mash’al rahbari Ilxom Qurbonov oldimga kelib “sizlarga xech qanday etiroz yo‘q, o‘yin uchun rahmat deb minnatdorchilik bildirdi. Men ham “Mash’al” jamoasiga keyingi o‘yinlarda omad tiladim.
Fikrlarim oxirida hammamizga Xudo insof berishini, futbolimiz rivojlanishini, terma jamoamiz jahon chempionatiga chiqishini, futbol jurnalistlarimizning qiyin ishlarida ularni yaratganning o‘zi qo‘llab-quvvatlashini, hakamlarimiz kamroq xato qilishlarini, vodiy jamoalari ham chempionlik uchun kurasha oladigan darajaga tezroq chiqishlarini, O‘zbekistondagi hamma futbol muxlislari futbolchilar baxtiga, yaqin insonlari baxtiga doimo sog‘-salomat bo‘lishlarini chin dildan tilab qolaman", — dedi Ashurmatov.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
