Yevropada futbol mavsumi boshlanishi va tugashi o‘rtasida katta davr mavjud. Bu vaqt bizga har doim yangiliklar, kutilmagan voqealar va kutilgan umidlarni taqdim etadi. Eng tomoshabop, deya e’tirof etiluvchi Angliya Premyer-ligasi bu paytda eng katta omil vazifasini o‘taydi. Aynan ushbu chempionatga butun dunyo diqqat-e’tibori, doimo eng ko‘p qaratilgan. Yaqin o‘tgan bir mavsum hamda yangi boshlangan 2021-22 yilgisi, nafaqat Angliyada, balki kuchli beshlik chempionatlarida ham, bizga bir necha iste’dodlarni taqdim etdi. Ularning faolligi, qulog‘imiz yangi yulduzlar nomini bot-bot takror eshitishiga olib keldi. Bu yaxshi, albatta. Axir haqiqiy futbol muxlislari uchun superyulduzga aylanish bo‘sag‘asida turgan yosh iqtidorlar o‘yinini ko‘rishdan ham zavqliroq ish bormi? Bizningcha, yo‘q! Quyida siz bilan so‘nggi paytlarda qolganlarga qaraganda yorqinroq porlayotgan futbol kelajagining yangi «yulduzchalari» haqida gaplashamiz.
Vinisius Junior – «Real Madrid»
Potensial jihatdan kuchli, bunga shubha yo‘q. Chunki braziliyalik bolakayning ilk o‘yinlari buni ko‘rsatib bergandi. Ammo mahsuldorlik tomondan olib qaraganda ham, bu mavsumda Vinisius jamoasining asosiy generatoriga aylandi. Futbolchi qirollik klubiga yaxshigina narx evaziga o‘tgandi. U o‘yinlari orqali o‘z narxini yanada oshishiga erishmoqda. Maydondagi qaror qabul qilish va xavfli vaziyatlar yaratishdagi faollik, istalgan raqib himoyachisi, «Flamengo»ning sobiq vingerini yomon tush sifatida ko‘rishiga sabab bo‘ldi. Hujumdagi sherigi Karim Benzema bilan esa, Vinisius haqiqiy xavfga aylanadi. 21 yoshli braziliyalik yangi mavsumda rivojlanishning yuqori ko‘rsatkichlariga erisha oldi. Bu narsa uning natijalarida ham yaqqol aks etmoqda. La ligada endigina 12ta tur o‘tkazilgan. Vinisius esa bu mavsumda YECHLni ham qo‘shib hisoblaganda jami 16 marta maydonga tushdi va 9ta gol hamda 5ta assist muallifligini qo‘lga kiritdi. Ha, hayratlanarli natija va u bu bilan to‘xtab qolish niyatida emas. Demak, kuzatishda davom etamiz...
Dushan Vlaxovich – «Fiorentina»
Agarda yuqoridagi nomni hali eshitmagan bo‘lsangiz, ishonchingiz komil bo‘lsinki, tez orada bu ism sizning miyangizda chuqur o‘rnashib oladi. Italiyaning «Fiorentina» klubi a’zosi bo‘lgan Vlaxovich, o‘tgan mavsumdagi harakatlari evaziga haqiqiy kashfiyotga aylana olgan hujumchi bo‘ldi. Shu kunlarda avjiga chiqayotgan mish-mishli xabarlarda Serbiya terma jamoasi vakili Londonning «Arsenal» klubiga 80 million yevro evaziga o‘tishi mumkinligi aytilmoqda. Shuning o‘zi ham ko‘rsatadiki, Vlaxovich ehtimoliy kelajak yulduzi! Uning iste’dodi haqidagi gaplar bugunga kelib, butun Yevropa e’tiborida turibdi. Umuman, Dushanning bunday baland narxlanishini quyida keltirilgan kichik jadval ham isbot etadi. Unda bu kalendar yilida(2021 yil), Yevropaning kuchli beshlik chempionatlarida eng ko‘p gol urgan hujumchilar nomi aks ettirilgan:
1. Robert Levandovski - 36ta
2. Erling Xoland - 26ta
3. Dushan Vlaxovich - 25ta.
Ko‘rib turganingizdek, bu yigit haqiqiy gol mashinasiga aylanib bormoqda. Nafaqat gollar urishda, balki uni hosil qilish, vaziyat yaratishda ham Vlaxovichning mehnati ko‘p singadi. Shu sababdan uning xaridorlari Yevropaning elita qatlamiga mansub klublaridir.
Emil Smit-Rou – «Arsenal»
«Arsenal»ning yangi o‘ninchi raqam sohibi bu mavsumni gollar va assistlar orqali boshlab oldi. Bu esa uni har o‘yinda maydonga tashlayotgan Mikel Artetaning zavqini oshirmoqda. Smit-Rou hozirda to‘pchilarning maydondagi asosiy ijod manbayiga aylandi desak, mubolag‘a bo‘lmaydi. U namoyish etayotgan barqaror o‘yinlari sabab ham, Angliyaning asosiy terma jamoasi a’zoligiga sazovar bo‘ldi.
Yakshanba kungi Emilning «Uotford»ga qarshi kechgan bahsda urgan goli, uni APLning uchta ketma-ket o‘yinida gol urgan 21 yoshdagi «Arsenal»ning to‘rtinchi futbolchisiga aylantirdi. Ilgari bu ishni Anelka, Reyes hamda Fabregaslar uddalay olgan, xolos. Hali «Xeyl End»dan u kabi ko‘plab iqtidor egalari yetishib chiqishiga ishonamiz.
Konor Gallager – «Kristal Pelas»
So‘nggi ikki hafta «Kristal Pelas» klubi hamda uning murabbiyi Patrik Viyeyra uchun ajoyib o‘tdi. Xususan, jamoa 5ta APL bahsida hali mag‘lubiyatga uchramadi. So‘nggi ikkitasida esa, raqiblar darvozasiga javobsiz ikkita to‘p yo‘llay oldi. Darvoqe, o‘sha raqiblarning bittasi «Manchester Siti»(!) edi. Ushbu bahslarning bosh rollarida 20 yoshli Gallager ismli futbolchi turdi. «Chelsi» ijarachisi maydonda ko‘p mehnat qiladi va shunga yarasha yutuqlarga erishmoqda. Buni biz aytayotgan «burgutlar»ning so‘nggi ikkita o‘yinidan ham guvohi bo‘lishingiz mumkin. Gallager ushbu bahslarning har ikkisida gol muallifiga aylandi. Shuningdek, «Man Siti»ga qarshi assist ham qayd eta oldi. Futbolchi bu mavsum jami 10ta APL bahsida ishtirok etib, o‘z nomiga 4ta gol hamda 2ta assist yozdirib qo‘ya olgan. Xullas, Gallager uyiga qaytganida, «Chelsi» o‘z qo‘lida ajoyib talantga va tajribaga ega bo‘lgan futbolchini ko‘radi. Bundan faqat quvonish kerak.
Karim Adeymi — «Zalsburg»
Ro‘yxatimizga kiritilgan, ammo 2000 yilda tug‘ilmagan yolg‘iz futbolchi bu Adeymidir. Karim hali-hamon 19 yoshda. Shunga qaramay, allaqachon Yevropaning top jamoalari nazariga tusha oldi. Epchil vinger o‘tgan haftada Avstriya Bundesligasida «Viyen»ga qarshi gol muallifi bo‘ldi. U bu bilan o‘z gollari sonini 11taga yetkazib oldi. Shuni ham ta’kidlash kerakki, Karim bu mavsumda 12ta uchrashuvda maydonga tushgan va deyarli har bir bahsda gol urmoqda. U shuningdek, YECHL doirasida ham 4ta gol urishga ulgurgan. Bu esa Adeymini Germaniya terma jamoasi a’zosiga aylantirdi. Uning o‘yinlarini kuzatgan odam Karim timsolida bemalol bo‘lajak superyulduzni ko‘ra oladi. Biz esa yosh futbolchiga bo‘lajak uchrashuvlarda omad tilab qolamiz.
ingliz tilidan Jaloliddin ISMATOV tarjimasi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
