Mavsum avvalida qanday olamshumul transferlar amalga oshgani hamon yodimizda. Grandlar pandemiya davrida moliyaviy muammolarga duch kelishi kutilayotgan bir vaqtda ular pullarini ayamay ishlatishdi. Lukakuning rekord summa evaziga “Chelsi“ga qaytgani, Grilishning allambalo narx evaziga “shaharlik“ka aylangani, Parijda Messi bilan birgalikda yangicha “galaktikos“ qurilishi va Ronalduning MYUga qaytishini unutmoq oson bo‘lmasligi aniq. Xo‘sh, kelayotgan transfer oynasida (qishki yoki yozgi, farqi yo‘q) bizni qanday voqealar kutib turibdi? Bunisi ham unutilmas bo‘lib qolishi mumkinmi? Bizning javobimiz – ha, kelgusi transfer bozori ham esda qolarli bo‘ladi. Negaligiga esa quyida batafsil javob topasiz. Demak, super xaridlarga sabab bo‘luvchi 4 yulduz haqida gaplashamiz. Ketdik.
1. Erling Xoland
Kelajak futbolining ikki egasidan biri sifatida qaralayotgan Erling Xoland mavsum oxirida jamoasini o‘zgartirishga qaror qildi. Hatto, shu qishdayoq u boshqa jamoa safiga ko‘chib o‘tishi mumkin. To‘g‘ri, bunga ishonish qiyinroq. Biroq Erlingga munosib taklif tushsa, u ko‘p o‘ylab o‘tirmasligi uning oxirgi qarorlaridan so‘ng yaqqol bilinib qoldi.
Ayni damda, norvegiyalik megayulduzga Angliyaning “Manchester Siti“, “Chelsi“ hamda Ispaniyaning “Real Madrid“ va “Barselona“ kabi gigant klublari “sovchi“ bo‘lib turibdi. Futbolchining o‘zi APL emas, La Liga varianti ma’qul ekanligini “qistirib“ o‘tgan. Lekin u La Liganing aynan qaysi jamoasiga o‘tishini ochiqlamadi.
Taxminimizga ko‘ra, u katalon klubiga ko‘chib o‘tadi. Ha, madridliklarda pul ko‘p, ular hozir azaliy raqibidan bir bosh ustun. Ammo yozda Xolandning asosiy raqobatchisi hisoblanmish futbolchining “Real“ libosini kiyishi norveg uchun yoqimli holat emas. U nisbatan kuchsizroq joyda, yosh va iste’dodli o‘yinchilar ichida yetakchi bo‘lib yurgani ma’qulroqdek ko‘rinmoqda. Biz uchun eng asosiy va muhim jihat – yana o‘sha shiddatli El-klasikolarning ortga qaytishi. Balki shuning uchun ham Xolland “Barselona“ga o‘tishi kerakdir?!
2. Kilian Mbappe
Mana o‘sha yuqoridagi Erlingning asosiy “dushman“i. PSJning hozirgi kundagi eng sermahsul futbolchisi, Fransiyaning bo‘lajak yetakchisi va ehtimol, “Real Madrid“ning-da bo‘lg‘usi yulduzi. Ko‘plab manbalarning xabar berishicha, Kilian allaqachon “qaymoqranglilar“ bilan og‘zaki kelishuvga erishib ulgurgan. Yozda u erkin agent sifatida “Real Madrid“ safiga kelib qo‘shiladi. Bu haqida bir qancha istisnolar uchrab turayotgan ersa-da, futbolchi Madridni tanlagani haqida gapirib o‘tdi. Demak, futbolchining kelajagi borasida boshqa gap-so‘zga o‘rin bo‘lishi mumkin emas, fikrimizcha.
Eslatib o‘tamiz, Kilianning xizmatiga “blankos“ bilan bir qatorda “Chelsi“, “Liverpul“ va MYU singari klublar ham qiziqish bildirmoqda.
3. Romelu Lukaku
“Chelsi“ning qimmatbaho hujumchisi shu mavsum jamoaga kelganiga qaramay, bu yerda ancha-muncha “qovun tushirish“ga ulgurdi. Intervyularida “Inter“ga tez orada qaytishini baralla so‘zlagan Romelu ko‘p o‘tmay, klubdan kechirim so‘rab chiqdi.
Ammo baribir Lukakuning Londonda o‘zi istaganini qo‘lga kiritishi oson bo‘lmaydi. Buning uchun u yanada rivojlanishi va universallashmog‘i darkor. Faqatgina hujumchi sifatida u “Chelsi“ning asosiy futbolchisiga aylanishi amri mahol.
O‘sha mashhur intervyusida belgiyalik futbolchi yana “Inter“ga qaytishini yoki Konte bilan “Tottenxem“da ishlamoqchi ekanligini keltirib o‘tgan. Ko‘rinishidan amalga oshishi qiyin transfer. Lekin futbolda hamma narsa bo‘lishi mumkin. Hatto Lukaku yanvardayoq “aristokratlar“ni tark etishi ehtimoli ham yo‘q emas.
4. Xarri Keyn
“Tottenxem“ yetakchisi bu mavsum boshida klubdan ketishini e’lon qilib, o‘zini transferga qo‘yishlarini so‘ragandi. Rahbariyat uni transferga qo‘yishga qo‘ydiyu, ammo futbolchi uchun yuborilgan har qanday taklifni rad etdi. Xarri bunga javoban turli choralar qo‘llab ko‘rdi, mashg‘ulotlarga bormadi, borsa ham kechikib boradigan bo‘ldi. Yana murabbiy bilan Keyn o‘rtasida kelishmovchiliklar yuzaga kelgani haqida norasmiy xabarlar chiqdi. Shunga qaramay, qaysar Deniyel Leviga (klub prezidenti) bu zarracha ta’sir qilmadi. U ingliz forvardini baribir jamoasida olib qoldi.
Vaholanki, Keynda hali ham boshqa jamoaga o‘tish uchun imkon saqlanib turibdi. Qishda buni amalga oshirish ancha qiyin, ammo mavsum yakunlangach, u kattaroq maqsadlar sari qadam tashlashi mumkin bo‘ladi. Zotan, hujumchini “shporlar“ qancha uzoq ushlab tursa, uni sotishdan tushadigan foyda ham shunchalik kamayib boraveradi. Hatto Xarri London klubi bilan shartnomasini bekor qilib, erkin agent sifatida jamoani tark etishi ham mumkin. Axir u allaqachon “Tottenxem“ga bo‘lgan sadoqatini ortig‘i bilan isbotlab ulgurdi. Endi u o‘zi istagan paytda jamoa almashtirish huquqidan foydalansa, har ikki tomon uchun adolatli bo‘lardi.
Darvoqe, Xarri Keyn uchun asosiy da’vogar hozircha “Manchester Siti“ bo‘lib turibdi.
******
Futbolda pul borgan sari kattaroq masshtabni egallab bormoqda. Endi biz uni millionlar emas, bemalol milliardlar o‘yini deb atasak ham bo‘laveradi. Ushbu sportning muxlislari ham milliarddan o‘tsa o‘tadi-ki, aslo kam bo‘lmaydi. Undagi pullar haqida ham hozir shunday desak mos kelaveradi. Bu ketishda, futbolda “boy boyga qarab, soy soyga qarab oqadi“ degan maqol ommalashib ketmasa bo‘ldi.
Al-G‘arafa
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
