O‘zining yorqin o‘yinlari bilan «Mash’al» hamda «Paxtakor» muxlislari e’tirofiga sazovor bo‘lgan futbolchi Sherzod Temirov joriy yil boshida Eronning «Persepolis» klubi a’zosiga aylanganidan yaxshi xabardorsiz. Mahoratli yarim himoyachi Eron chempionatida uchta o‘yin o‘tkazib ulgurganini ham eshitgan bo‘lsangiz kerak. Biz milliy terma jamoamizning bu galgi yig‘iniga chaqiruv olgan futbolchi bilan suhbatlashib, ayrim savollarimizga javob oldik.
- Sherzod, suhbatimiz avvalida «Persepolis»dan tushgan taklif va jamoaga qo‘shilish jarayoni haqida gapirsangiz.
- Bu jamoadan chorlov kutilmaganda keldi. Yashirmayman, bundan tashqari, Yevropa jamoalari, jumladan, Vengriya va Polsha chempionati vakillaridan takliflar bor edi. Lekin Eronda to‘p surish ishtiyoqi kuchlilik qildi. Qolaversa, «Persepolis» bosh murabbiyi Yahyo Gulmuhammadiyning shaxsan o‘zi meni jamoada ko‘rishni xohlayotganini eshitib, ushbu taklifga rozi bo‘ldim. Umid qilamanki, bu o‘tish men uchun katta tramplin vazifasini o‘taydi. Xudo xohlasa, sabr va mehnat, chiroyli o‘yinlar, gollar urish orqali murabbiylar ishonchini oqlayman.
- Yangi chempionat, yangi muhit hamda yangi jamoaga moslashuv jarayoni qanday ketmoqda?
- Bilasiz, Eron chempionati Osiyodagi kuchli ligalardan biri hisoblanadi. Yangi muhitga esa asta-sekin moslashib boryapman. Bunda menga barcha jamoadoshlarim yaqindan yordam berishyapti. Klubda men uchun kerakli barcha sharoitlar yaratib berilgan. Kerakli pallada yordamini ayamayotganliklari uchun klub mutasaddilari va jamoadoshlarimga rahmat aytib qolaman.
- Hozircha uchta o‘yinda maydonga tushdingiz. Xo‘sh, taassurotlar qanday?
- Birinchi navbatda, murabbiydan minnatdorman. Chunki, jamoa tarkibiga endigina kelib qo‘shilganimga qaramay, ishonch bildirib, muhim o‘yinlarda o‘zimni ko‘rsatishimga imkon beryapti. Yuqorida aytganimdek, Eron chempionatida to‘p surish oson emas. Jamoa va chempionatga moslashish uchun kamida 4-5ta o‘yin kerak bo‘ladi. Hozir menda adaptasiya jarayoni davom etmoqda. Taassurotlar esa o‘zgacha.
- «Persepolis» nafaqat qit’amiz, balki jahonga ham tanish jamoalardan biri hisoblanadi. Bugun siz uning a’zosisiz. Orzular ushalyaptimi?
- Shunday desa ham bo‘ladi. Eron futboli Osiyoda eng kuchlilaridan biri hisoblanadi. «Persepolis» esa nafaqat Eron, balki qit’amizda ham yuqori o‘rinlar uchun kurashadi. Bunday jamoa a’zosiga aylanish ko‘pchilikning orzusi bo‘lsa kerak. Niyatimga yetishimda ota-onam va oila a’zolarimning ham hissasi juda katta. Fursatdan foydalanib, futbolchi bo‘lib yetishishimda mehnati singgan murabbiylarimga alohida tashakkur bildirmoqchiman. Galdagi orzu va maqsadlarim esa bundanda yuqori. Ularga erishish yo‘lida hech narsadan qaytmayman, bu hali boshlanishi, deb umid qilaman. Hozir esa, albatta, juda xursandman!
- Ayting-chi, Eron futbolida bizda uchramaydigan nimalarga duch keldingiz?
- Eron futboli saviyasi biznikidan baland, farqi shunda deb o‘ylayman. Ular Yevropa tizimida takomillashayotgani tufayli chempionat o‘yinlari juda yaxshi o‘tayotgani kundek ravshan. Bizning yurtimizda ham Yevropa tizimiga o‘tilsa, ajoyib o‘sish bo‘ladi, deb o‘ylayman. Yana bilmadim, bu mening shaxsiy fikrim, xolos.
- Eron chempionatida g‘oliblik uchun kurash «Istiqlol» va «Persepolis» jamoalari o‘rtasida kechadiganga o‘xshab turibdi. Nima deb o‘ylaysiz, jamoangiz qolgan 7ta tur davomida «Istiqlol»ni quvib yeta oladimi?
- Sir emaski, ketma-ket necha yildirki, «Persepolis» Eron chempionatida g‘olib bo‘lib kelmoqda. Hozir turnir peshqadami «Istiqlol» bilan oradagi farq 6 ochkoni tashkil qilmoqda. Ishonchim komilki, ularni quvib o‘tishga kuchimiz yetadi.
- Jamoangiz so‘nggi turda o‘z maydonida aynan «Istiqlol»ni qabul qilib, durang qayd etdi. Natijada, oradagi farqni uch ochkoga qisqartirish imkoniyati qo‘ldan chiqarildi. Keling, shu o‘yin haqida ham fikrlaringizni bildirib o‘tsangiz.
- Derbi juda muhim o‘yin hisoblanardi. Ochig‘i, o‘sha uchrashuvda biz o‘z vazyatlarimizdan foydalana olmadik va murosa ko‘chasini tanlashga majbur bo‘ldik. Lekin bu «Persepolis» chempionlik poygasidan chiqib ketganini anglatmaydi. Oldinda 7ta tur bor va biz jamoamizga yuz foiz ishonamiz. Xudo xohlasa, chempion bo‘lamiz.
- Endi suhbatimizni terma jamoa mavzusida davom ettirsak. Bu galgi yig‘inga legioner sifatida tashrif buyurdingiz. Namanganda o‘tadigan «Navro‘z kubogi»dan nimalar kut-yapsiz?
- Albatta, milliy jamoa yig‘inida legioner sifatida qatnashish juda yoqimli. Meni yig‘inga jalb qilgan terma murabbiylar shtabiga rahmat aytmoqchiman. Namanganda o‘tadigan turnirdan ko‘zlangan maqsad - «Navro‘z kubogi»da chempion bo‘lish va albatta, o‘z imkoniyat va kamchiliklarimizni bilib olish.
- Mazkur musobaqa mezboni sifatida aynan Namanganning tanlab olingani ko‘pchilik muxlislarni xursand qildi. Xo‘sh, futbolchilar bunday yangilikni qanday qabul qilishdi?
- Tanlovni har tomonlama ma’qullayman. Terma jamoamiz ishtirokidagi o‘yinlar tomoshabinlar bilan gavjum stadionda o‘tishini hozirdan tasavvur qilish qiyin emas. Biz futbolchilar qayerda o‘ynasak ham g‘alaba qozonishga harakat qilishimiz kerak. O‘zbekistonda milliy terma o‘yinlarini qabul qila oladigan stadionlar ko‘paymoqda va bu juda quvonarli hol. Biz futbolchilar ham, albatta, bundan xursandmiz.
- Maroqli suhbat uchun rahmat. Oldinda turgan musobaqalarda siz va jamoangizga omad va muvaffaqiyatlar tilaymiz.
- Sizga ham rahmat, salomat bo‘ling. Gazetangiz orqali o‘zbekistonlik va «Persepolis» muxlislariga salom yo‘llayman.
Xurshid YUSUPOV suhbatlashdi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
