Bugungi suhbatdoshimiz - Shamil Yarulin qariyb 20 yildan buyon futbol bilan hamnafas.
U haligacha Qashqadaryo viloyatida sportning eng ommaviy turini rivojlanishida tashkiliy ishlarga bosh-qosh bo‘lib kelmoqda. Deylik, Shamil aka «Sevinch» va «Nasaf» jamoalaridagi samarali faoliyatidan so‘ng hozirda «Sho‘rtan» bosh menejeri lavozimida ishlamoqda. Quyida hukmingizga maxsus muxbirimiz Husan Temirovning tajribali tashkilotchi va ishbilarmon rahbar Shamil Yarulin bilan uyushtirgan suhbati havola etilmoqda.
- Shamil Samigulovich, suhbatni uzoqdan boshlasak: bolalik yillari, futboldagi ilk qadamlar...
- 1956 yilning 7 iyun kuni Tatariston poytaxti Qozonda tug‘ilganman. 5 yoshda oilamiz bilan Qarshiga ko‘chib kelganmiz. Keyinchalik Qarshi politexnikumi va Yakub Kolos nomli Minsk Davlat universitetida iqtisod-huquqshunoslik yo‘nalishi bo‘yicha tahsil oldim. Mehnat faoliyatim «Sho‘rtangazkimyo» majmuasi bilan bog‘liq. 2006 yildan esa futbol ichidaman: faoliyatimni «Sevinch»da iqtisodiy ishlar bo‘yicha mutaxassis sifatida boshladim. 2008 yili jamoa boshqaruvini qo‘lga oldim. Katta ishtiyoq bilan ish boshladik va «Sevinch» qisqa fursatda nafaqat O‘zbekiston, balki xalqaro miqyosda ham qator g‘alabalarni qo‘lga kiritdi. Ta’kidlashim joiz, «Sevinch» Yevropa kubogini yutgan Markaziy Osiyodagi yagona jamoadir. Biz Bolgariyada tashkillashtirilgan musobaqada g‘alaba nashidasini surgandik. Bundan tashqari, jamoa Barselonada o‘tgan Yevropa kubogida kumush medal sohibiga aylandi. 2009-2011 yillar esa o‘zimizda Qarshi-Cup xalqaro turnirini o‘tkazdik.
- Keyin «Nasaf»da ish boshladingiz...
- Ha, 2012 yili «Nasaf» boshqaruviga o‘tdim. O‘sha vaqt jamoa og‘ir ahvolda qolgandi - maosh, soliq va boshqa to‘lovlardan qarzdorlik... Muhimi, hukumat tomonidan futbolni rivojlantirishga katta e’tibor qaratilayotgandi. Xususan, «Nasaf» va «Sevinch»ga bosh homiy sifatida «Sho‘rtangazkimyo» majmuasi biriktirildi. Aynan uning yordami bilan qiyin vaziyatdan chiqib ketdik va tarixiy natijalar sari qadam tashladik.
- «Nasaf» va «Sevinch»ning yutuqlariga nimalarni qo‘shimcha qila olasiz?
- Ortda qolgan davrda «Mehnatchi» stadionida yoshlar majmuasi barpo etildi. Bu majmua ishi O‘FA seminarida mutaxassislar tomonidan ham yuqori baholandi. Bunday majmuani barpo qilinishiga hissa qo‘shganimdan g‘ururlanaman va albatta, homiylarga minnatdorchilik bildiraman. Aslida yoshlar majmuasi ijobiy natija berishi xususida ko‘pchilikda katta shubha bor edi. Endi shu bahona «Nasaf» yoshlari yaxshi qarorgohga ega bo‘ldilar va samara ham tezda ko‘zga tashlandi. «Sevinch» futbol maktabi ham o‘zgacha shaklda barpo etilgan. Xalqaro muvaffaqqiyatlardan so‘ng ko‘plab yosh qizlar maktabga kelishdi va hozir jamoaga qo‘shilishdi. Qisqasi, maktabimiz mamlakatimizdagi klublarga professional futbolchi-qizlarni tarbiyalab bermoqda. Bundan tashqari, o‘sha payt O‘zbekiston termasi asosini ham «Sevinch» vakillari tashkil etishgandi. Qalban shunday jamoaga tegishli ekanligimdan xursandman. Mana, endi «Sho‘rtan»da ham katta ishlarni amalga oshiryapmiz. Asosiysi, qarzdorlik bartaraf etildi, akademiya ishga tushirildi. Ha, yutuqlarni ko‘rsatishga hali erta, lekin ayni harakat yaqin orada samara bera boshlaydi - bunga ishonchim komil.
- Faoliyatingiz voqealarga boy, albatta. Eng esda qolganlarini bayon etsangiz...
- 2016 yili ham o‘zim, ham «Nasaf» uchun katta o‘zgarishlar davri bo‘ldi. Zero, klubimizga davlatimizning o‘sha vaqtdagi rahbari Islom Karimov tashrif buyurdi. Buni sira kutmagandik. U kishiga o‘zi tasdiqlab bergan klub logotipi va fotosuratlarni ko‘rsatganimdan so‘ng yangilanishga ishtiyoqimizni ko‘rib, «Markaziy» stadioni rekonstruksiyasi bo‘yicha mutasaddilarga topshiriq berdi. O‘zaro suhbat davomida g‘oyalarim bilan ham qiziqdi. Shunda stadiondan yugurish yo‘lakchasini olib tashlab, o‘rindiqlarni pastroqqa tushirish kerakligini aytdim. Bu taklif Islom Abdug‘aniyevichga yoqdi. O‘z o‘rnida klubimiz tomonidan hurmat yuzasidan esdalik uchun logotipga Humo tasviri tushirilgan klub futbolkasini taqdim etdim. E’tiborlisi, uni klub muzeyida saqlash uchun o‘zimizda qoldirdi. Ertasiga esa Shavkat Miromonovich ham tashrif buyurdi! Biz viloyat hokimi va bosh homiy huzurida uchrashdik. O‘shanda davlat rahbari kayfiyatini ko‘targanimiz uchun tashakkur eshitgandim. Xususan, Islom Abdug‘aniyevich uning chizmalarini saqlaganimiz va qadrlayotganimizdan mamnun ekanini bildirishdi. Oradan ko‘p o‘tmay, «Markaziy» stadionida tarixiy rekonstruksiya ishlari boshlandi. Qarangki, menga har ikki Prezidentimiz bilan ko‘rishish, suhbatlashish baxti nasib etdi. O‘sha uchrashuvda Shavkat Miromonovich viloyat hokimi hamda homiylarga mehnatimni to‘g‘ri baholash, barchasini inobatga olib qo‘yish to‘g‘risida ko‘rsatma berdi. Chinakam baxtli insonman. «Nasaf»dek klubga mehnatim singganidan xursandman. Aytingchi, qaysi klub o‘z logotipi shaxsan mamlakat rahbari chizmasi asosida tayyorlangani bilan maqtana oladi? Bilishimcha, bizda boshqa biror klubga bunday himmat ko‘rsatilgan emas. Shunday ekan, «Nasaf»ning oldingi logotipi o‘z tarixi bilan qadrli.
- «Sho‘rtan»da ish boshlash g‘oyasi qanday yuzaga keldi?
- To‘g‘risi, G‘uzorda ishlashni sira o‘ylamagandim. Lekin jamoaning og‘ir holatga tushib qolganiga befarq qaray olmadim. Mana, katta qiyinchiliklar bilan muammolarni yengib, qarzdorlikni yopdik. Ayniqsa, ko‘p yillardan buyon osilib kelgan xorijlik mutaxassislar oldidagi qarzni uzish masalasi ancha qiynadi. Barchasini izga solish uchun ma’naviy va moddiy tomondan ko‘p kuch, sabr va xayrli yakunga ishonch talab etildi. O‘ylaymanki, bu jamoada ham omadim chopdi. Chunonchi, ayni payt «Sho‘rtan» tizimida haqiqiy mutaxassislar to‘planishgan. Jumladan, murabbiylar shtabida ham. Agar faoliyatim boshida shunday jonkuyar mutaxassislar bilan uchrashganimda, barchasi yanada a’lo bo‘larmidi...? Fursatdan foydalanib, ularga professional yondashuv va chidam uchun alohida tashakkur izhor qilaman. Klubning moliyaviy holatiga to‘xtalsam, avvalgi rahbarlar mehnati «samarasi»ni ko‘ryapmiz. Shuning barobarida ildam qadam qo‘yish harakatidamiz. Umid qilamanki, barchasini yengib o‘tib, klubni ravon yo‘lga chiqara olamiz.
- Fidoiylik qadr-qimmat topishi aniq...
- Ochig‘i, yutuqlarim yoki qandaydir medallar haqida gapirishni istamayman, bu maqtanchoqlikka kiradi. Bunga xushim yo‘q. Lekin ibrat bo‘lishi uchun aytaman: 2014 yilgi mavsum yakunida O‘FA va PFL tomonidan o‘tkazilgan taqdirlash marosimida ilk bor Superliganing eng yaxshi menejeri nominasiyasiga nomzodim qo‘yildi va unda g‘olib chiqdim. 2020 yil ham xuddi shu yo‘nalishda eng yaxshi maqomiga loyiq ko‘rildim.
- Yakunda oilangiz haqida ham ma’lumot bersangiz.
- Oila - shaxsiy hayot. Bu haqda gapirish ortiqcha, menimcha. Zero, oilani ishga aralashtirish to‘g‘ri emas. Bordiyu, oilam haqida gapira boshlasam, savol ortidan savol kelib chiqaveradi. Axir xalqimizda ajoyib gap bor: «Uydagi gap ko‘chaga chiqmasin».
- Xo‘sh, oldingizda turgan reja-vazifalar qanday?
- Bosh maqsad - «Sho‘rtan»da infratuzilmani takomillashtirish, barchasi jahon andazalari darajasida ishlashini ta’minlash. Bu bilan o‘zbek futboli taraqqiyotiga ozmi-ko‘p hissa qo‘shsam, bas. Albatta, mehnatim samarasini ko‘rsam, o‘zimni yanada baxtiyor his etaman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
