O‘FA ishchi guruhi Toshkent viloyatida qurilish va rekonstruksiya ishlari olib borilayotgan O‘zbekiston milliy terma jamoalari tayyorgarlik markazining qurilish jarayonlarini o‘rgandi.
Markazdan o‘rin olgan ob’ektlar, jumladan, mashg‘ulot maydonchasi va stadion loyihasining texnik-tashkiliy jarayonlari ko‘zdan kechirildi. Ob’ektdan o‘rin oladigan 2 ta gibrid va 2 ta sun’iy qoplamali futbol maydonlarini xalqaro standartlar asosida sifatli bunyod etish, qo‘shimcha drinaj tizimlarini to‘g‘ri sozlash, kelgusida chimlarni saqlash va parvarishlar uchun kerakli qurilmalarni tashkil etish yuzasidan topshiriq berildi.
Shuningdek, terma jamoalar futbol markazida joylashadigan tibbiy-tiklanish, yotoqxona va oshxonani zamonaviy uskunalar bilan jihozlash yuzasidan fikr almashildi. Shaharchada kutubxona, restoran hamda yashil hudud tashkil etish loyihasi hamda infratuzilmadan o‘rin oladigan keyingi rejalari muhokama qilindi.
Bundan tashqari, quruvchi kompaniya vakillariga barcha jarayonlarni jadallashtirish, qurilish ishlarini sifatli amalga oshirish bilan bir qatorda loyihalarning xavfsizlik jihatlariga alohida e’tibor qaratish kerakligi aytildi va kerakli ko‘rsatmalar berildi.