Ronaldu bilan Ronalduni ajratib olish kerak. Ronaldu shaxsiyati, uning xudbin va qaysar xarakterini tanqid qilish, uni o‘zgartirishga urinish foydasiz, aksincha, aynan mana shu xarakteri aslida uning shu darajaga yetib kelishiga katta ahamiyat kasb qilgan. Aks holda, Ronaldudan shu biz yomon ko‘radigan “salbiy” xarakterni olib tashlasak, shunchaki, yoqimtoy Azar yoki Shon-Rayt Filipsga ega bo‘larmidik, kim biladi, buning keragi ham yo‘q. Masala boshqa.
Har bir voqeaning aslini hamma ham bilavermaydi, odatda haqiqatning ommaga olib chiqadigan qismi shunday bo‘lishi kerakki, gapiruvchiga qaysidir ma’noda foyda keltirishi lozim. Agar Krishtianu Ronalduni oddiy inson emas, millionlab foyda keltiradigan katta bir brend, yuzlab insonlar ustida ishlaydigan imij deb tushunsak, kecha e’lon qilingan intervyu mana shu shaxsiyatga naf keltirishi lozim edi. Aks holda, tabiiyki, bu muvaffaqiyatsiz chiqish hisoblanadi.
Endi, hali to‘liq qismi chiqmagan intervyuga nisbatan reaksiyani kuzataylik: Ronalduning fikrlari qaratilgan ob’ektlar – klub,futbolchilar, uning muxlislari, futbol jamoatchiligi, ekspertlar, jurnalistlar – tan olish kerak, yaxshi kutib olishmadi. Kimdir shokda, kimdirga yoqmadi, kimdir keskin chiqish qildi, ya’ni kechagi gaplar bilan Krishtianu Ronalduning imiji yaxshi tomonga o‘zgarmadi, “ha, demak shunday bo‘lgan ekan-da, Ronalduni noto‘g‘ri tushungan ekanmiz-da” qabilidagi munosabat (balki shu kutilgan) yetakchi emas. Aksincha, shu paytgacha Ronalduni tushunib turgan ba’zi insonlar fikrini o‘zgartirgan bo‘lishi ham mumkin.
Ya’ni bu intervyu Ronalduga hech narsa bermadi. Natija muvaffaqiyatsiz chiqdi. Futbolchining ichidan kechayotgan g‘alayonlar, aytmoqchi bo‘lgan fikrlari, boshqa masala, albatta, Ronaldu birovni o‘ldirib qo‘ymadi, olam kechirmaydigan xato ham qilmadi, shunchaki, o‘zi ishlaydigan korxona haqida ba’zi ochiq fikrlarini aytdi. Haqqi bor. Uning og‘zini yopa olmaymiz. Ba’zi, balki ko‘proq masalalarda u haq ham bo‘lishi mumkin, buni ham inkor etmayman.
Lekin qaytaraman, tabiiyki, intervyu qaysidir o‘yinning chiqish koridorida, emosiyalar og‘ushida ro‘y bermadi, futbol o‘lchovida veteran bo‘lsa-da, hayotda atigi 37 yoshli yigitning xatosi ham emas bu. Yoki Pogba misolidagi, bir agent bilan maslahatlashib amalga oshirilgan harakat ham emas. Bu intervyu - o‘ylangan, rejalashtirilgan va qaysidir jabhalarda “Ronaldu” imiji va brendiga ijobiy ta’sir qilishi lozim bo‘lgan harakat edi. Ya’ni mana shu “Ronaldu” korxonasida ishlaydigan bir guruh insonlarning loyihasi.
Va bemalol aytish mumkinki, bu qadam zararli bo‘lib chiqdi. Natija umid qilingandek bo‘lmadi. O‘sha guruhning katta, tuzatish juda qiyin bo‘lgan xatosi. Afsus.
Qahramon Aslanov.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
