Minskning «Energetik-BGU» klubi o‘z tarixida ilk marta Belarus chempionati sovrindoriga aylandi va yevrokuboklarga yo‘l ochdi.
Eng muhimi, «talabalar» Belarus futbolining eng qudratli jamoalari - «Shaxtyor» (Soligorsk) va BATE bilan chinakam raqobatga kirishib, Oliy liganing oxirgi turiga qadar chempionlikka chang solishdi. Asosan yoshlardan tarkib topgan ishtiyoqi baland jamoa orada hattoki 1-o‘ringa ham ko‘tarildi, oltin medal yutish uchun real imkoniyat hosil qildi. Faqat finish marrasiga yaqin kelganda, «talabalar»ga ozgina omad yetishmadi, charchoq biroz pand berdi. Lekin 2-o‘rin ham «Energetik-BGU» uchun munosib natija sifatida baholanmoqda, baribir. Yosh jamoa muvaffaqiyatida o‘zbek futboli vakillari katta rol bajarishgani diqqatga sazovor, albatta. Ayniqsa, Bobur Abduxoliqovning goleadorlik mahorati va Abduqodir Husanovning himoyadagi ishonchli o‘yini bot-bot e’tirof etilmoqda. Bejiz har ikkisi yakunda chempionatning ramziy terma jamoasiga kiritilmadi. Abduxoliqov esa naq 3ta nominasiya bo‘yicha bosh laureat bo‘ldi - Oliy liganing eng yaxshi futbolchisi, hujumchisi va to‘purari! Belarus futbolini yoritishga ixtisoslashgan tribuna.com sayti ijodkorlari esa har ikki legionerlarimizni «BGU» yetakchilari qatoriga qo‘shib, ularning faoliyatiga alohida to‘xtaldi.
Abduqodir HUSANOV (18 yosh), himoyachi
Oliy liga-2022da: 27ta o‘yin, 3ta gol va 2ta samarali uzatma
Oldingi jamoasi: «Bunyodkor» U-18 (O‘zbekiston)
Birinchi tur arafasida 18 yoshini qarshilagan o‘zbekistonlik legioner chempionat yakuni bo‘yicha Oliy liganing «A» belgisi ostidagi ramziy terma jamoasidan joy oldi. Chunonchi, Husanov «talabalar» safidagi ilk o‘yinidanoq o‘zini ko‘rsata boshladi va darhol markaziy himoyaning almashtirilmas vakiliga aylandi. Abduqodirning maydonga tushishiga goh-gohida faqat kartochkalar limiti xalaqit qildi, xolos. Alohida aytish kerak, markaziy himoyachi orqada tartibli harakatlanish barobarida hujumni qo‘llashda ham effektli o‘ynadi. Husanovning kuchli sifatlaridan biri - jarima zarbalari ijrosi. U buni may oyida «Neman»ga qarshi kechgan o‘yin (4:1)da isbotlagandi. «Energetik-BGU» O‘zbekiston U-17 termasi himoyachisini 2022 yilgi mavsum oldidan o‘z safiga jalb qilgandi. Iste’dodli yigitcha legionerga aylanishiga qadar «Bunyodkor» tizimidagi o‘smirlar jamoasida o‘yin amaliyoti olgan, xolos. Minsk klubi Husanov bilan rasman shartnoma tuzish uchun uning 18 yoshga to‘lishi kutdi. Xullas, Abduqodir fevral oyigacha «talabalar» safida shartnomasiz shug‘ullanib turdi. Muhimi, yigitning katta futbolda umuman tajribasi yo‘qligi «Energetik-BGU» murabbiylar shtabini mutlaqo bezovta qilmadi va minskliklar shartnoma rasmiylashtirilganidan so‘ng uni darhol Belarus Oliy ligasi bahslarida boshlang‘ich tarkibga kirita boshlashdi. Husanov bunga javoban tezda ishonchni oq-lashga tushdi. Uzoq masofaga to‘pni aniq yetkazib berish, olisdan kuchli zarba yo‘llash va himoyada to‘g‘ri pozisiya tanlash - bular 18 yoshli futbolchining kuchli tomonlari hisoblanadi. Markaziy himoyada ishonchli to‘p surgan o‘zbekistonlik iqtidor ayni shu fazilatlari evaziga hujum harakatida ham ancha yuqori shaxsiy statistika qayd etdi - 3ta gol va 2ta samarali uzatma.
Bobur AbDUXOLIQOV (25 yosh), hujumchi
Oliy liga-2022da: 28ta o‘yin, 26ta gol, 6ta samarali uzatma
Oldingi jamoasi: «Rux» (Ukraina)
Belarus chempionati Oliy ligasining bosh qahramoni. O‘zbekistonlik hujumchi mavsum yakunida naq 3ta nominasiyada e’tirof etildiki, bu uning butun chempionat davomida «Energetik-BGU»ni o‘z ortidan ergashtirganidan dalolat. Har holda, Bobur gol urish bobida bir nafasda ichki chempionatning qator rekordlarini yangiladi. To‘purar hujumchi 23 yoshiga qadar o‘z yurtida «Nasaf» sharafini himoya qildi. U bu vaqtda qadrdon klubida yetakchilar qatoriga qo‘shilish va OCHLda gollari hisobini ochishga ulgurdi. Aniqrog‘i, Abduxoliqov qit’a klub futbolining eng nufuzli turniri doirasidagi 15ta o‘yinda ishtirok etib, raqiblar darvozasini 4 marta nishonga oldi. Bobur shuning barobarida O‘zbekiston yoshlar terma jamoasi bilan U-23 toifasidagi Osiyo chempionatida g‘alaba nashidasini ham surdi. 2020 yilgi mavsum O‘zbekiston Superligasida 25ta o‘yinda qatnashib, 17ta gol urganidan keyin Ukrainaga yo‘l olib, «Rux» klubi bilan to‘laqonli shartnoma tuzdi. Biroq jamoada Boburga uncha ishonch bildirishmadi va u asosiy tarkibdagi debyutini nishonlamay turib, o‘rtadagi bitimni bekor qildi. Shundan so‘ng futbolchi o‘zbekistonliklar uchun qulay joyga aylangan «Energetik-BGU» ko‘rigiga keldi va barchasidan muvaffaqiyatli o‘tib, klubda qoldi. Muhimi, u bu safar tanlovda adashmadi. Har holda, Bobur o‘z gollari bilan «Energetik-BGU»ni yetakchilar qatoriga olib chiqdi. O‘zbek legioneri mavsum davomidayoq xorij ligalaridan takliflar oldi, lekin maqsadi Belarus futboli bilan chempionat sovrindori va bosh to‘purari maqomida xayrlashish ekanligini yashirmadi. Mana, u o‘z so‘zi ustidan chiqdi. Yana ortig‘i bilan. Ya’ni Oliy liga kumush medali va bosh to‘purar maqomi yoniga rekordlar hamda individual sovrinlar ham qo‘shib qo‘ydi.
Xolidiya
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
