2020 yilda "Birmingem Siti" Jud Bellingem sharafiga uning 22-raqamini nafaqaga chiqarganida, ko‘pchilik kulgan edi. Ammo shundan keyin ma’lum bo‘ldiki, bu ish bekorga qilinmagan. Birmingemliklar uchun 44 ta o‘yin o‘tkazib, 17 yoshli Bellingem "Borussiya Dortmund"ga sotiladi. U jamoadan ketishi bilan, futbolchi foydalangan 22-raqam ham ortiq foydalanilmaydigan bo‘ldi. Bu haqida klub rasmiy saytida shunday deyilgandi: "22-raqam bu yerda Jud ismi bilan bir ma’noga ega bo‘ldi. U 16 yoshidayoq asosiy jamoaga qo‘shilib, katta natijalarga erishdi. Shu sababli, klub Bellingemga hurmat bajo keltirish, qolaversa, boshqalarni ruhlantirish uchun uning libos raqamini nafaqaga chiqarishga qaror qildi".
Bellingemning "Real"ga o‘tish bejiz emas. Negaki, u o‘zi tarbiya topgan jamoada allqachon afsonaga aylanib ulgurgan. Quyida Bellingemdagi holat, tarixda yana kimlar bilan yuz berganini bilib olasiz.
Pele
Messigacha dunyoning eng zo‘r futbolchisi bo‘lgan Pele, so‘nggi davrlarini "Nyu-York Kosmos" klubida o‘tkazadi. Braziliyalik u yerda ikki mavsum davomida 107 o‘yinda qatnashib, 64 ta golga mualliflik qilgan. Pele faoliyatini tugatgach, "Kosmos" unga hurmat bajo keltirish uchun, uning 10-raqamini ham Pele bilan nafaqaga chiqaradi.
Diyego Maradona
Eng yaxshi futbolchilar qatorida e’tirof etiladigan Maradona, "Napoli" libosida yetti yil harakat qiladi. U Italiyada superyulduzga aylangan. 1984-1991 yillar davomida argentinalik o‘z jamoasiga A seriyani ikki bor olib berib, UYEFA kubogida zafar quchadi. Afsona olamdan o‘tgach, "Napoli" stadioniga uning nomi berildi. Klub esa Maradona taqqan 10-raqamni ham futbolchi sharafiga nafaqaga chiqardi.
Yoxan Kroyf
Kroyf 10 yoshidan boshlab "Ayaks" safida harakat qiladi. U bu klubda avvaliga futbolchi bo‘lib, keyin esa murabbiy sifatida faoliyat yuritdi. Hujumchi "Ayaks"ga 8 ta mamlakat chempionligi va 3 ta qit’a g‘olibligini keltiradi. Kroyfning qilgan ishlari yuqori baholanib, "Ayaks" u taqqan 14-raqamni 2007 yilda nafaqaga chiqargandi.
Paolo Maldini
Himoyachi tarixda "Milan" sharafini 25 yil davomida himoya qilgan. Maldini bu klubda qo‘lga kiritish mumkin bo‘lgan hamma narsani yutgandi. Uning sharafiga "Milan" futbolchi bilan uning afsonaviy 3-raqamini ham 2009 yilda nafaqaga kuzatadi. "Milan" rahbariyati bu raqam keyinchalik faqatgina futbolchining o‘g‘illarigagina berilishi mumkin ekanini ma’lum qilgandi. Mana, hozir uning Daniyel ismli zurriyodi "Milan" safida.
Roberto Badjo
Badjo uzoq yillik faoliyati davomida "Fiorentina", "Yuventus", "Milan", "Bolonya" va "Breshia" klublari sharafini himoya qiladi. Ular ichida hujumchi to‘rt yil harakat qilgan "Breshia" jamoasi Badjo taqqan 10-raqamni nafaqaga chiqargandi. U bu klubda 2000-2004 yillarda 95 ta o‘yin o‘tkazib, 45 ta golga mualliflik qiladi.
Xavyer Zanetti
Zanettining 19 yillik umri "Inter"da o‘tgan. Bu vaqt mobaynida himoyachi hamma narsaga erisha olgan desak, xato bo‘lmaydi. Argentinalik afsona klubga jami 858 ta o‘yinda yordam beradi. 2014 yilda himoyachi nafaqaga chiqadi. Uning 4-raqami ham shu bilan "Inter"da qayta foydalanilmaydigan bo‘ldi.
Jorj Vea
Bu ro‘yxatdagi yagona terma jamoa vakili Veadir. Uning Liberiya terma jamoasidagi 14-raqami 2018 yilda hujumchi sharafiga nafaqaga chiqarilgandi. U Liberiya termasi tarkibida 75 ta o‘yin o‘tkazib, 18 ta gol urgan.
Bobbi Mur
Barcha davrlarning eng yaxshi ingliz futbolchisi sifatida, aynan Mur e’tirof etilgan. Himoyachi Pele maqomidagi futbolchi edi. Uning Angliya va "Vest Xem" safidagi faoliyati afsonaga aylangan. London klubi Murning oltinchi raqamini buyuk himoyachi sharafiga olib qo‘ygan. Ammo bu ish "Vest Xem" tomonidan 2008 yilda, Bobni Murning o‘limidan 15 yil o‘tkach, amalga oshirildi.
ISMATOV J.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
