Shu paytgacha Madridning ikki va Kataloniyaning bir jamoasi Ispaniya chempionatidagi yetakchi uchlik sifatida e’tirof etilardi.
Joriy mavsumning ortda qolgan sakkiz turida La Ligada juz’iy o‘zgarish kuzatilmoqda: sovrindor trioda poytaxtning bitta, Kataloniyaning ikki klubi bormoqda. «Real»ning yuqori o‘rinda borayotgani ajablanarli emas, moliyaviy muammolarga duch kelgan «Barselona»ning izma-iz quvib borayotgani ham. Lekin «Jirona»ning dastlabki uch turdan keyingi peshqadamligi!...
Albatta, startdagi muvaffaqiyat olis mavsumdagi umumiy g‘alabaga kafolat bo‘la olmaydi. Biroq bu kamtarin jamoa har qanday vaziyatda ham e’tiborga loyiq. Gap faqat natijada emas, jamoa yorqin o‘yin ko‘rsatmoqda, yangi iqtidorlarni kashf etmoqda va City Football Group bayrog‘ini ispan zaminida mag‘rur hilpiratmoqda. «Jirona» «Manchester Siti» yetakchiligidagi konglomeratga a’zo bo‘lganidan keyin futbol jamoatchiligi e’tiboriga tushdi. Pablo Machin rahbarligida jamoa ilk bor La Ligada to‘p surgan va 10-o‘rinni egallagandi. O‘shanda u sermazmun o‘yin ko‘rsatgan bo‘lsada, Machinga xos pragmatizm muhim rol o‘ynadi: 3 nafar markaziy himoyachi, faol qanotlar va keskin qarshi hujumlar.
O‘sha «Jirona»ning muhim o‘yinchilaridan Kristian Stuani, Portu va Xuanpe hozir ham tarkibdalar. Faqat avvalgidek maqomda emaslar, Xuanpe ilojsiz vaziyatlardagina himoya markazini egallaydi, Portu va Stuani esa asta-sekin zaxira o‘yinchilariga aylanishmoqda. CFG tizimiga o‘tish bilan «Jirona» o‘zini doimiy kadrlar qo‘nimsizligiga duchor qildi. To‘g‘ri, o‘yinchilarning tez-tez almashib turishi avval ham yo‘q emasdi, lekin yangi homiylar ko‘magida kataloniyaliklar yuksak saviyali o‘yinchilarga ega bo‘la boshladilar. Bunday sharoitda natijalarda pasayishlar bo‘lishi aniq.
Machin davridagi muvaffaqiyatdan keyin «Jirona» bir necha yil Segundada to‘p surgani bejiz emas. Biroq o‘tgan mavsum arafasida cho‘qqiga qaytdi va 2 yildirki, ajoyib o‘yini, risoladagidek natija va bozordagi faoliyati bilan muxlislarini xushnud etmoqda. Qaysi raqibga qarshi maydonga tushishidan qat’iy nazar, jamoa birinchi raqam ostida o‘ynaydi. Kataloniyaning kichik klubi yaratuvchanlikni xush ko‘radi, to‘pga ko‘proq egalik qilishga intiladi, pressing qo‘llaydi. O‘tgan mavsumdagi safar uchrashuvlarida bo‘lajak chempion - «Barselona» va YECHLning yana bir ishtirokchisi - «Real Sosyedad» bilan tengma-teng o‘ynadi. Keyin «Manchester Siti»ning singlisi maqomida «Real»ni 4:2 hisobida taslim etdi. O‘sha o‘yinda hujumchi Valentin Kastelyanos pokerga erishdi. O‘tgan yil yozida «Lasio» bu hujumchini 15 mln. yevroga xarid qildi. To‘g‘ri, «Jirona»dan emas, balki «Nyu-York Siti»dan (Kastelyanos «Jirona»ga ijaraga berilgandi) . Lekin AQSH klubi ham CFG a’zosi. Qisqasi, «Jirona» Dominik Toretto prinsipi asosida ish yuritdi: avval xesh, keyin darvesh.
Joriy mavsumda jamoa 8-turgacha faqat bitta jiddiy raqib bilan kuch sinashdi - start bellashuvini safarda «Real Sosyedad» bilan o‘tkazdi. Birinchi bo‘limda o‘z darvozasidan to‘p olib chiqqan bo‘lsada, tanaffusdan keyin muvozanatni tikladi. Jamoaning mavsumdagi ilk golini Kastelyanos o‘rnini to‘ldirgan Artyom Dovbik amalga oshirdi.
Keyingi 6 uchrashuvda «Jirona» umumiy 16:6 hisobidagi g‘alabalar seriyasini rasmiylashtirdi. To‘g‘ri, raqiblarning darajasiga ham e’tibor berish lozim: «Las-Palmas» va «Granada» Segundadan chiqqan debyutantlar, «Xetafe» va «Malyorka» elitada arang ilinib qolgandi, hozirgi «Vilyarreal» top-jamoa emas, «Sevilya esa yana mavsumni omadsiz boshladi. Lekin «Jirona» ham grand emasligini unutmaylik. Ya’ni, Anxel Mishel shogirdlariga munosib baho bermaslik adolatsizlik bo‘ladi.
Mavsum startida muvaffaqiyat taqdirini qanot o‘yinchilari hal qilishmoqda. O‘ngda Viktor Sigankov, chapda - braziliyalik Savio. Viktor «Jirona»ga yanvar oyida kelib, nimalarga qodir ekanligini o‘tgan mavsumda namoyish etgandi. Savio esa debyutanat, ikki oy avval jamoa safidan joy oldi. 2022 yilning yozida 18 yoshli futbolchini «Trua» 6,5 mln. yevroga xarid qilgandi. Liga1ning o‘rtamiyona jamoasi shuncha pulni qayerdan oldi? Bu ham «CFG»ning bir qismi. Ha, ular hamma joyda hoziru-nozirlar!
Savio o‘tgan mavsumni umuman, notanish PSVda ijara asosida o‘tkazib, deyarli maydonga tushmadi. Endi u Ispaniyada, qaysidir ma’noda, o‘z chempionatida. Savio bo‘shliqda o‘ta samarali harakatlanadi, chapaqay bo‘lgani uchun asosan o‘z qanotida to‘p suradi. Lekin vaziyatdan kelib chiqqan holda markazda ham imkoniyatdan unumli foydalana oladi. «Granada»ga qarshi start bellashuvida u La Ligadagi dastlabki golini aynan markaziy hududdan amalga oshirdi.
Qo‘shimchasiga, «Jirona» o‘ta faol qanot himoyachilariga ega. Chap qanotda Savioga «Real» tarbiyalanuvchisi Migel Gutyerres, o‘ng qanotda esa Sigankovga «Barselona» vakili Arnau Martineslar yordam beradilar. Endi yangi markaziy himoyachilar ham jamoaning hujumkor kombinasiyalarida faol ishtirok etishmoqda. Masalan, Deyli Blind - Erik Garsiya juftligi o‘z debyutini «Granada»ga qarshi bahsda nishonladi. O‘yinda ular ayrim kamchiliklarga yo‘l qo‘yishgan bo‘lsada, to‘p bilan muomalada ajoyib to‘p surishdi. Ayniqsa, Blind.
Qanot o‘yinchilari yoki Dovbik ishonchli to‘p sura olmasa, tajribali Portu va Stuani yordamga tayyor. Portu «Las-Palmas» ustidan g‘alabani ta’minladi, Stuani esa «Xetafe» darvozasini 2 marta ishg‘ol etdi. Shuningdek, «Barselona»dan ijaraga olingan navqiron Pablo Torre ham kerakli pallada ko‘makka shay. Bundan tashqari, jamoa 6 mln. yevro evaziga kolumbiyalik 18 yoshli Jon Solisni xarid qildi. Umuman, «Jirona» tez orada yangi yulduzchalarni namoyish etishi mumkin.
O‘tgan mavsumda «Jirona» yevrokuboklar hududiga juda yaqin kelgandi. Biroq oxirgi turda bu imkoniyatni boy berdi. Joriy mavsum xususida to‘xtaladigan bo‘lsak, 7 o‘yindan iborat mag‘lubiyatsiz seriya 8-turda nihoyasiga yetdi - safarda «Jirona»ni yirik (3:0) hisobda mahv etish orqali «Real» avvalgi mavsumdagi mag‘lubiyat (2:4) alamini oldi. Lekin nima bo‘lganda ham, kamtarin jamoa hozircha yetakchi uchlikda.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
