“Andijon”ning joriy yilgi mavsumdagi dastlabki goli muallifi – Sardor Abdunabiyev deyarli chempionat yakunida o‘zining ikkinchi golini kiritishga muvaffaq bo‘ldi.
Safarda “Turon” bilan bo‘lib o‘tgan bahsda qo‘shib berilgan daqiqaning oxirida yakkama-yakka holatga chiqdi va bundan ustalik bilan foydalana oldi.
E’tiborlisi, u ikkinchi golini sobiq klubi darvozasiga kiritdi. O‘tgan yili pro ligada aynan “Turon” sharafini himoya qilgan. Sardorga ayrim savollar bilan murojaat qildik.
— Sardor, "Andijon"ning ushbu mavsumdagi ilk goli muallifisiz. Qarshida "Nasaf"ga chiroyli gol urgandingiz. Deyarli chempionat yakunida yana gol urdingiz. Buni qanday izohlagan bo‘lardingiz?
— “Turon” bilan o‘yinda qo‘lga kiritilgan g‘alaba bilan jamoadoshlarim va muxlislarimizni tabriklayman. To‘g‘ri, mavsumning birinchi o‘yinida kiritgan golim balki chiroyli chiqqan bo‘lishi mumkin. Lekin o‘sha birgina gol bilan qolib ketdim. Bu men uchun yomon natija edi. Oddiy gol bo‘lsa ham, gollarim ko‘proq bo‘lsa yaxshi. O‘sha chiroyli golimni oddiy urilgan 5 ta golga almashgan bo‘lardim. Bu men uchun afzal. Ammo “Andijon” safida gol urish ham oson emas.
— Shuningdek, o‘tgan yili ijara hisobida "Turon"da to‘p surgansiz. Siz esa sobiq jamoangizga gol urdingiz. Buni kutganmidingiz?
— Mavsum boshida gol urgandim va men uchun ikkinchi gol juda zarur edi. Ammo buni amalga oshirishim ancha qiyin kechdi. Aksiga olib menda golli vaziyatlar ham kam bo‘ldi. Ha, imkoniyatlar bo‘ldi desam ham bo‘ladi. Lekin ayrim paytlarda omad yetishmagandir yoki o‘zim pand bergandirman. Men uchun bitta gol qoniqtirmasdi. Chiroyligi men uchun qiziq emas, muhimi, ko‘proq gol urib jamoamga yordam berish. Har doim gollarimni ko‘paytirish va bu orqali “Andijon”ga yordam berish niyatida bo‘lganman. Ha, ilgari “Turon” sharafini himoya qilganman. Bu klubda yaxshi xotiralar qolgan. U yerdagi sharoitlar futbolga xos. “Turon”dagi imkoniyatlar yuqori o‘rinlar uchun kurashadigan darajada. “Turon” yaxshi jamoa.
— Qizig‘i, sizga darvozabon Eldor Adhamov assist vazifasini bajardi. O‘shanda to‘p raqib himoyachisidan o‘tib sizga kelishini va yakkama-yakka chiqishingizni o‘ylaganmidingiz?
— O‘sha vaziyatda darvozabonimiz Eldor Adhamov to‘pni yaxshi tepib berdi. Shahboz Erkinov esa mahoratini ishga soldi va meni oldinga yugurayotganimni his qilib, to‘pga tegmasdan o‘tkazib yubordi. O‘shanda Erkinovni tajribasi qo‘l keldi. Yakkama-yakka vaziyatdan foydalanmasam bo‘lmasdi.
— Bu mavsumda "Andijon"ning ishtirokini qanday baholaysiz?
— “Andijon” klubida ajoyib futbolchilar yig‘ilgan. Jamoamiz bundan ham yuqori o‘rinlardan birini egallashga qodir. OKMK bilan o‘yin finalga xos bo‘lgandi. O‘sha bir uchrashuv bilan yanada yuqoriga yoki pastga tushib ketish mumkin edi. Balki o‘sha bahsda yutganimizda hozir kuchli uchtalik yoki to‘rttalik uchun kurashayotgan bo‘lardik. Hozirgi natijamiz ham yomon emas, hamisha muxlislarimizni xursand qilish uchun o‘ynaymiz va biz mavsumni g‘alaba bilan tugatmoqchimiz.
"Andijon" matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
