Sanoqli kunlar avval biz bilan xayrlashgan 2023 yilning 30 dekabrida Londonning «Chelsi» klubi Luton Taunga tashrif buyurdi.
Mazkur mitti shaharchadagi kamtarin stadion «Arsenal», «Manchester Siti» kabi grandlar asablarini «o‘ynagan, endi jiddiy sinov navbati grandlik maqomini yo‘qotib qo‘ygan «aristokratlar»ga kelgandi.
Telekameralari zamon talabiga javob bera olmaydigan darajada past o‘rnatilgan ana shu o‘yingohda «Luton» o‘ta shiddatli o‘yin namoyish etadi, ilk daqiqadayoq pressingga o‘tib, o‘z muxlislarini xushnud etishga intiladi. Ular esa suyukli jamoalarini o‘ta faollik bilan qo‘llab-quvvatlashga kirishadilar. O‘zaro sadoqat uchun jamoaga ham, ashaddiy muxlislarga kattakon rahmat! O‘yinning 26-soniyasida dastlabki pressing, birgina Palmer murosasiz tortishuvdan xoli, bu mavzuga keyinroq qaytamiz.
«Luton»ning pressingi
Shu bosim tufayli «Chelsi» muammoga duch kelmagan bo‘lsada, darvozabon Petrovich o‘ta murakkab vaziyatda to‘pni oldingi chiziqdagi Broya (Olivye Jiruni eslatadigan ajoyib hujumchi) tomon yo‘lladi. U esa to‘pni chaqqonlik bilan ilib oldi. «Luton» pressingidagi yana bir muhim jihat, Koul Palmer. Jamoa avvalo to‘pga yaqin bo‘lgan raqiblarini ta’qibga oladi, 2 nafar tayanch yarim himoyachisi esa ro‘parasidagi raqibini. Biroq muammo shundaki, «Chelsi» markazga 2 emas, 3 nafar o‘yinchini tushirgan. Mana shu vaziyatda Palmer ajoyib topqirlikni namoyish etadi. Agar u oldinga intilib, raqibning 2 markaziy himoyachisiga yaqinlashsa, boshqa raqiblari unga yaqinlashib, to‘pni xotirjam qabul qilishiga xalal berishardi. Buni oldindan his etgan Koul ortga chekinadi, raqib himoyachilari esa ta’qibni to‘xtatishadi. Chunki «Luton» hujumchisi darvozabon bilan birga bir vaziyatga chiqish ehtimoli ko‘payadi. «Chelsi» esa tez orada hisobni ochishga muvaffaq bo‘ldi. Palmer o‘z hududida to‘pni qabul qilib, qanotdagi Jeksonga yo‘lladi.
Palmer orqali pressingdan chiqish
Jekson o‘sha uzatmani golga aylantira olmadi. Koul esa gol urdi, urganda ham, anchayin qiyin vaziyatdan urdi. Go‘yoki, bu uning aqlli harakatlari uchun futbol tomonidan berilgan tuhfa edi. Vaholanki, Palmer «Siti»da hujumchi ortida emas, qanotda to‘p surgan, Pep uni shu rolga munosib deb hisoblagandi. Yosh iqtidor sohibini shunday o‘ziga mos pozisiyaga o‘tkazgan Pochettinoga rahmat aytish joiz. Tez orada «Chelsi» hisobni yiriklashtirdi. Ikkinchi gol muallifi kim, deysizmi? Yo‘q, Palmer emas, lekin Maduekeni aynan u samarali uzatma bilan ta’minladi.
To‘g‘ri, «Luton»ning o‘yin uslubi mukammal emas, kamchiliklar boshqa jamoalarda ham yetarli. Biroq chiziqlar o‘rtasidagi optimal pozisiyani topish va undan unumli foydalanishni ham bilish kerak. Ikkinchi golni amalga oshirish jarayonida Palmer avvalgidek ortga chekinmadi, balki oldinga intildi. Bu ham raqib o‘yinchilari uchun kutilmagan yangilik bo‘ldi va ikkinchi golga olib keldi. Aftidan, Koul voqealar rivojini oldindan his etadi unga mos ravishda haraktlanadi. Albatta, angliyalik qahramonimiz ham kamchiliklardan mosuvo emas, lekin uning necha yoshda ekanligini ham inobatga olish kerak. Ha, u himoyada o‘ynashni xush ko‘rmaydi. Tafsilotlarga to‘xtab o‘tishning hojati yo‘q, bu shundoq ham yaqqol ko‘zga ko‘rinib turadigan holat. U pressingga borishni ham yoqtirmaydi. Qisqasi, maromiga yetkazib olishni talab etadigan kamchiliklari yetarli.
Biroq «Chelsi» uchun tortning bezagiga aylangan 3-golni ham o‘z hisobiga yozib qo‘ydi. Shu bilan birga, Koul vaziyatga baho berish va to‘g‘ri qarorga kelish qobiliyatiga ega ekanligini yana bir karra namoyish etdi. Bu - tug‘ma layoqat, qaysidir futbolchida bor, boshqasida yo‘q. Ba’zan tajriba bilan ham kelishi mumkin, lekin Palmer bu jihatni to‘plashni yaqinda boshlagan.
Palmerning ideal ochilishi
Ideal ochilishning intihosi - gol. Biroq Koul darvozabon bilan yakkama-yakka holatga chiqqan chog‘ida ham eng to‘g‘ri qarorni tanladi - avval uni aldab o‘tdi, keyin darvozani ishg‘ol etdi. Ko‘pchilik futbolchilar aynan zarba yo‘llash chog‘ida shoshib qoladilar, Palmer esa to‘pni xotirjamlik bilan yo‘lladi.
Hisob yirik ko‘rinish olgach, mehmonlar bir oz xotirjamlikka berilish oqibatida 2 marta o‘z darvozalaridan to‘p olib chiqishdi. Lekin bunda Palmerni ayblashga asos yo‘q. Bundan tashqari, «Chelsi»ni ham tushunish qiyin emas, hozirda u APLning qaytadan shakllanayotgan yosh jamoalaridan biri.
Palmer xususida xulosa chiqaradigan bo‘lsak, sarlavhadagi so‘roq belgisi olib tashlansa, adolatli bo‘ladi. Mazkur o‘yinda Koul oldinroq «shaharliklar»ga ham, «to‘pchilar»ga ham ochko bermagan «Luton»ni mahv etdi. O‘tgan mavsumda «ko‘klar»ga aynan u yetishmagandi. Qani, ko‘raylikchi, mavsumning hal qiluvchi bosqichida angliyalik iqtidorning o‘yini qay tariqa rivojlanarkin. Lekin shiddatli parvoz uchun asoslari yetarli.
R.IBROHIMOV tayyorladi
As-Sadd
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
