2024 yilning 15 avgusti. «Chelsi» ayollar futbol klubining 18 yoshli a’zosi o‘zining... basketboldagi (!) faoliyatini yakunlaganini e’lon qildi.
Ha, ingliz millatining yosh iqtidori bo‘lmish Ketti bir vaqtning o‘zida ikki xil sport turi bilan shug‘ullanardi. Ketti shu yil futbolda akademiyaning eng yaxshi bitiruvchisi sifatida e’tirof etilgan bo‘lsa, basketbolda Yevrokubok sohibasi bo‘lgandi. Bundan tashqari, karate bo‘yicha qora belbog‘ni qo‘lga kiritgan, regbiga qiziqadi. Darhaqiqat, Kettining tarixi g‘ayrioddiy bo‘lsada, kamdan-kam uchraydigani emas. Marhamat, tanishing:
Petr Chex. Xokkey
Yaqin o‘tmishda nafaqat «Chelsi»dagi ajoyib seyvlari bilan muxlislar mehrini qozongan, balki «Arsenal» darvozasini ham ishonchli qo‘riqlagan jahonning eng mohir darvozabonlaridan biri xokkeyda ham o‘zini sinab ko‘rishga ahd qilgandi. 2019 yilda gannerlar bilan imzolagan kelishuvi muddati tugagach, Chexiya terma jamoasining posboni «Chelsi»ga va posbonlik pozisiyasiga qaytdi. Lekin lavozimida o‘zgarish bo‘ldi. «Chelsi»da Chex texnik direktor vazifani bajara boshladi. 2022 yilda u Abramovich bilan Londonni tark etib, Ikkinchi Milliy Xokkey ligasining «Gildfort Feniks» klubi sharafini himoya qilishga kirishdi. 2022 yil noyabrida posbon «Chelmford Chiftens»da, 2023 yilda «Oksford Siti Stars» jamoasida omadini sinab ko‘rdi. Shuningdek, Chex ilk faoliyati davrida qiziqib qolgan baraban o‘yinini ham unutib qo‘ymadi. Xullas, futboldan nafaqaga chiqqan «ko‘klar» afsonasi zerikib qolmayapti.
Lev Yashin. Xokkey
Avval futbolda, keyin xokkeyda darvozani qo‘riqlagan navbatdagi sportchi. Bir qarashda, hammasi mantiqqa mos - bir xil amplua, o‘xshash vazifalar - to‘p yoki shaybani darvozaga kiritmaslik. Biroq «Oltin to‘p»ga sazovor bo‘lgan yagona posbonning tarixi avvalgi personaj voqeasidan keskin farq qiladi. Lev Ivanovichning sport faoliyati epilogda zikr etilgan sportchi qiznikiga o‘xshash - ikkisi ham faoliyatning ilk bosqichida ikki xil sport bilan shug‘ullanishgan. Sobiq Ittifoq darvozaboni futbolda ham, xokkeyda ham «Dinamo» klublari sharafini himoya qilgan. Yashin muz maydonidagi faoliyatini 24 yoshida, «Dinamo» safida 1953 yilda SSSR Kubogini qo‘lga kiritganidan keyin yakunlagan. Xokkeydan voz kechish oson bo‘lmagani rost, lekin butun kuch-mahoratini futbolga bag‘ishlagan Lev Ivanovich terma jamoaning Yevro-1960dagi g‘alabasiga ulkan hissa qo‘shish bilan tarixdan joy oldi.
Paolo Maldini va Diyego Forlan. Tennis
Bu sportchilar Milanning qarama-qarshi tomonida va turlicha to‘p surishgan. Forlan «neradzurri» tarkibida bir mavsumni o‘tkazib, 18 marta maydonga tushgan va bir necha marta jarohat olgan, klub 3ta murabbiyni almashtirgan, Diyego esa «Inter» bilan hamkorlikni txtatib, 2012 yil iyulida Braziliyaning «Internasyonal»iga o‘tib ketgandi. Paolo Maldini esa «Milan» tarkibida 25 yil to‘p surib, «A» seriyasida (7 marta), YECHLda (5), UYEFA Superkubogida (5), Italiya Kubogi (1) va Superkubogida (5) g‘olib chiqqandi. Qisqasi, u o‘z otasi Chezare Maldinining ishonchini to‘liq oqladi. Keyin ota-o‘g‘il ikkovlon tennis olamiga yo‘l olishdi. Paolo tennisdagi debyutini 2017 yilda, Milandagi «Chellenjer» turnirida nishonladi. O‘shanda u vatandoshi Stefano Landonio bilan juftlikda Polsha-Niderlandiya duetiga 1:6, 1:6 hisoblarida imkoniyatni boy berishgandi. Shuningdek, Paolo 2019 yilda «Milan»ga qaytib, 2023 yilgacha texnik direktor lavozimida ishladi.
Diyego Forlan esa futbolchilikdan keyin murabbiy rolida faoliyatini davom ettirdi. 2019 yil dekabrida u qadrdon «Penyarol» klubiga bosh murabbiy bo‘ldi. Lekin yangi sohada o‘zini ko‘rsata olmay, jamoani tark etdi. Tennisda Diyego Paolodan yaxshiroq natijalarga erishdi. U ITF faxriylar turnirida muntazam qatnashadi, dastlabki ishtirokida chorak finalgacha yetib borgandi.
Ivan Perishich. Plyaj voleyboli
Ro‘yxatimizdagi hanuzgacha futboldagi faoliyatini to‘xtatmagan yagona o‘yinchi. Rossiya mundialining kumush medali sohibi hozir Ivan Rakitich bilan birgalikda Xorvatiyaning «Xayduk» jamoasida to‘p surmoqda. Shuningdek, Ivan top-beshlikning nomdor jamoalari «Inter», «Borussiya D.», «Bavariya» va «Tottenxem»da ham risoladagidek o‘yin ko‘rsatib, sovrinlarni qo‘lga kiritgandi. 2017 yil yozida Perishich plyaj voleyboli turnirida qatnashib, shaxsiy kolleksiyasini kubok bilan boyitishga urinib ko‘rgandi. Afsuski, bu harakati «Tottenxem»dagi omadsizlik kabi nihoyasiga yetdi: o‘shanda «taqachilar» mavsumni 2ta mag‘lubiyat bilan boshlagan edilar.
Leon Makkenzi. Boks
Unchalik mashhur bo‘lmagan personaj: «Kristal Pelas», «Fulxem» va «Norvich» kabi o‘rtamiyona jamoalarda to‘p surgan, eng yorqin davrida «Peterboro Yunayted»da o‘tkazib, 104ta o‘yinda 54ta gol urgandi. Leon butun faoliyati davomida 393 marta maydonga tushib, 115 marta raqiblari darvozasini ishg‘ol etgan.
Oxirgi mavsumini «Korbi Taun»da o‘tkazgan Leon 2013 yilda yashil maydonni ringga almashtirdi: 29 iyun oqshomida u Jon Meysonni 2-raundda mag‘lub etdi. 2015 yilda xorvatiyalik Ivan Stupaloni yengib, xalqaro master belbog‘ini qo‘lga kiritdi. 2016 yilda esa qahramonimiz dastlabki mag‘lubiyatini Jeymen Smayldan qabul qilib oldi. O‘sha yilning noyabridagi 2-mag‘lubiyatdan keyin, Makkenzi qo‘lqopini yechishga qaror qildi.
Xenrik Larsson. Florbol
Bu yigit ortiqcha «reklama»ga muhtoj emas, ayniqsa, rossiyalik muxlislarga u «Spartak» «afsonasi» Jordan Larssonning otasi sifatida yaxshi tanish. Bundan tashqari, Xenrik «Barselona», «Seltik», «Feyenoord» klublarida o‘ynagan, Shvesiya klublarini boshqargan va «Barsa»da Kumanning assistenti maqomida ishlagan.
Florboldagi (to‘pli xokkeyning turlaridan biri) debyutini Xenrik futbolchilik davrida nishonlagandi. 2008 yilda u yana shu sportga qaytib, Shvesiya Superligasida Xelsinborg sharafini himoya qilgandi. Chunki u Zlatan maydonga tushishidan avval shved futbolining bayroqdori vazifasi bilan band edi.
Garet Beyl. Golf
Hikoyamizning eng yorqin personaji bo‘lmish 35 yoshli uelslik hujumchi «Real»da to‘p surgan davrida bir necha mojarolarga sababchi bo‘lgandi. masalan, 2019 yilda u o‘z terma jamoasining Yevro-2020ga chiqqanini nishonlash chog‘ida Uels bayrog‘i bilan suratga tushgan, bayroqda «Uels. Golf. Madrid» so‘zlari yozilgan, sal pastroqda esa «Shunday ketma-ketlikda» iborasi bitilgandi. Tabiiyki, bu muxlislar va «Real» rahbariyati e’tiboridan chetda qolmadi. Oqibatda, Beylning saviyasi pasayib ketdi va u klubda muvaffaqiyat qozona olmadi.
Xo‘sh, «Sautgempton», «Tottenxem» va «Real»ning sobiq o‘yinchisi yangi sport turida nimalarga erishdi? Bir yil avval Garet o‘zining dastlabki sovrinini qo‘lga kiritdi! Biroq... Bu shunchaki, turli sport sohalaridagi professionallarning to‘plarni chuqurchaga tushirish bo‘yicha ko‘rgazmali chiqishlari edi. Misol uchun, unda «Oltin to‘p» sohibi bo‘lmish ukrainalik Andrey Shevchenko, serbiyalik tennischi Novak Jokovich, «Ferrari» klubi poygachisi Karlos Saynslar Beylning raqiblari bo‘lishgandi. Uelslik golf shaydosi 60 yoshli Kolin Montgomeri bilan juftlikda harakatlanib, yakunda Rayder kubogini qo‘lga kiritdi.
Qissadan hissa shuki, sportda, xususan, futbolda faqat bitta sport bilan shug‘ullanish ozlik qiladi. Sportchilar nafaqat pul ishlashga, balki yangi tajribaga ega bo‘lish va mahoratlarini oshirishga intiladilar.
Jahongir MIRZO tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
