«Lokomotiv» klubi BAAda tashkil etilgan ikki haftalik o‘quv-mashg‘ulot yig‘inini yakunlab, Toshkentga qaytib keldi. «Temiryo‘lchilar» yig‘in doirasida ikkita o‘rtoqlik uchrashuv o‘tkazishdi va har ikkala o‘yinda ham durang natija qayd etildi. Aniqroq aytsak, Saudiya Arabistonining «Al Qodisiya» va Rossiyaning «Zenit» klublariga qarshi kechgan uchrashuvlarda hisob ochilmadi. Shuningdek, jamoa tarkibida bir qator o‘zgarishlar yuz berdi. Asosiy tarkib futbolchilari sanalgan Server Jeparov, Temurxo‘ja Abduholiqov va Sanjar Shoahmedovlar faoliyatlarini xorijda davom ettirishni lozim topishdi. Ketganlar o‘rni esa Kot-dIvuarning eng iste’dodli yosh futbolchilaridan biri deya e’tirof etilayotgan Junior Axissan Lendri bilan to‘ldirildi. «Temiryo‘lchilar» BAA safaridan qaytib kelishgach, muxbirimiz jamoaning eng tajribali futbolchisi Temur Kapadzeni suhbatga tortdi.
- Temur, BAAda tashkil etilgan o‘quv-mashg‘ulot yig‘ini haqida nima deya olasiz?
- Menimcha, jamoamizning xorijdagi ilk yig‘ini ko‘ngildagidek o‘tdi. Unda biz asosiy e’tiborni jismoniy tayyorgarlikka qaratdik. Shunday qilmasak ham bo‘lmaydi, zero OCHL doirasidagi ilk o‘yinga tobora oz fursat qolyapti. Dubaydagi yig‘in chog‘ida faqat ikkita o‘rtoqlik uchrashuvi o‘tkazish bilan cheklandik. Ikkinchi xorij yig‘inimiz fevral oyida Turkiyada bo‘lib o‘tadi va o‘ylaymanki, unda ko‘proq nazorat o‘yinlari tashkil etiladi. Bu uchrashuvlar orqali safimizga yangi qo‘shilgan futbolchilarning jamoa o‘yiniga moslashib olishlarini ta’minlashimiz lozim. Eng muhimi, barchamiz murabbiylar bizdan nimalarni kutishayotganini bilamiz. Shunday ekan, kamchiliklar ustida ishlab, mavsumni yuqori tayyorgarlikda boshlaymiz.
- O‘tkazilgan o‘rtoqlik uchrashuvlari, deylik, «Zenit»ga qarshi o‘yin haqida qanday fikrdasiz?
- Xabaringiz bor, ikkala o‘yinda ham hisob ochilmadi. Biroq bu bahslar mavsumga tayyorgarlik doirasidagi ilk o‘yinlar bo‘lgani uchun, shaxsan menda ijobiy taassurot qoldirdi. To‘g‘ri, hali optimal formadan uzoqroqdamiz va o‘z ustimizda hali ko‘p ishlashimiz kerak. Lekin «Zenit» bilan o‘tkazilgan o‘yin biz uchun har tomondan foydali bo‘ldi. Murabbiylar ham kuchli raqibga qarshi kechgan uchrashuvda futbolchilarning bugungi holatini ko‘zdan kechirib olishdi.
- Jamoa safiga qo‘shilgan yangi futbolchilar haqida fikrlaringiz...
- Agar siz mahalliy futbolchilarni nazarda tutayotgan bo‘lsangiz, Diyor Turobov va Shuhrat Muhammadiyevlar jamoa o‘yiniga tezda qo‘shilib ketishdi. Yangi mavsumda ularning jamoamizga faqat foydasi tegadi, degan umiddaman.
- Xo‘sh, legioner futbolchilar-chi?
- Legionerlar masalasida qat’iy fikr bildirish mushkul, hozircha. Bu savolga javobni yaxshisi, Turkiyada o‘tadigan ikkinchi yig‘inimizdan so‘ng bergan ma’qul, menimcha.
- Yangi mavsum arafasida «Lokomotiv»ni uch asosiy futbolchi - Temurxo‘ja Abduxoliqov, Server Jeparov va Sanjar Shoahmedovlar tark etdi...
- Ha, jamoamizni tark etgan bu futbolchilar «Lokomotiv»da o‘z o‘rinlariga ega edi. Deylik, «oltin dubl»ga erishishimizda ularning xizmatlari juda katta bo‘lgandi. Lekin sobiq jamoadoshlarimni ham to‘g‘ri tushunish kerak: taklif har tomondan qulay bo‘lsa, undan bosh tortishning hojati yo‘q. Albatta, agar ular jamoamiz qolishganida yaxshi bo‘lardi. Ammo, bu futbolda uchraydigan holat. O‘ylaymanki, tarkibga qo‘shib olingan yangi futbolchilar jamoamizni tark etgan o‘yinchilarning o‘rnini munosib tarzda to‘ldirishadi va murabbiylar hamda muxlislarning ishonchlarini oqlashadi.
- OCHLda «Lokomotiv» joylashgan guruh haqida nima deya olasiz? Sizningcha, qaysi raqib kuchliroq ko‘rinyapti?
- OCHLda kuchsiz jamoaning o‘zi yo‘q. O‘ylashimcha, bu yil biz uchun o‘tgan mavsumdagidan ham qiyinroq bo‘ladi. Chunki, o‘tgan yili jamoamizning chiroyli g‘alabalari bilan o‘zimizni Osiyoga yaxshigina tanishtirdik. Shu bois, bu yilgi OCHL bahslarida raqiblar bizga qarshi ikki hissa kuch bilan tayyorgarlik ko‘rishadi. Biroq shaxsiy fikrimcha, «Al Ahli» boshqalarga qaraganda biroz kuchliroq.
- Bu yil 36 yoshni qarshi olasiz. Toliqish alomatlarini sezilmayaptimi?
- Ha, bu yil muchal yoshimni nishonlayman. Lekin to‘g‘risini aytsam, o‘zimni juda yaxshi his qilyapman. Hech qanday charchoq alomatlari yo‘q, kurashga tayyorman. Boshqacha aytsam, katta futboldan ketish haqida sira o‘ylamayapman. «Lokomotiv» bilan yangi mavsumda katta yutuqlarga erishishni maqsad qilganman. O‘tgan yili O‘zbekiston chempioni bo‘ldik, mamlakat kubogini qo‘lga kiritdik. Endi bu unvonlarimizni himoya qilishimiz kerak. Buning oson bo‘lmasligini hozirdanoq his qilib turibmiz. Shuningdek, OCHLda ham o‘tgan yilgi natijamizni yaxshilashimiz lozim.
- Yaqinda do‘stingiz Server Jeparov bilan birga maxsus o‘quv-kurslariga qatnashdingiz. Murabbiylik - qiyin soha ekanini his qilyapsizmi?
- Ha, to‘g‘ri aytdingiz, murabbiylikdagi birinchi qadam qo‘yildi. Nasib qilsa, balki bizdan yaxshi mutaxassislar chiqar (kuladi)?! Albatta, buni vaqt ko‘rsatadi. Ammo hozirdanoq murabbiylik qiyin kasb ekanligini sezyapman. Futbolchilik davrini murabbiylik faoliyati bilan aslo taqqoslab bo‘lmaydi. Murabbiy - natijaga javobgar shaxs, futbolchi esa faqat o‘ziga javob beradi.
- Milliy terma jamoamizning JCH-2018 3-saralash bosqichidagi bo‘lajak o‘yinlari haqida nima deya olasiz? Mundialga chiqish bizga nasib qilarmikan?
- Hozirdanoq shuni aniq aytish mumkinki, termamizga saralashning qolgan 5ta o‘yinida hecham oson bo‘lmaydi. Buni birinchi davra uchrashuvlari yaqqol ko‘rsatib berdi. Umid qilamanki, murabbiylar shtabi bu masalada to‘g‘ri xulosalarni chiqarib olishgan. Hamma bir yoqadan bosh chiqarib, yagona maqsad sari intilishi shart. Aks holda, jahon chempionati yana armon bo‘lib qolishi mumkin.Muxlislarni ham futbolchilarimizga ishonib, ularni qo‘llab-quvvatlashga chaqiraman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
