Toshkentda boks bo‘yicha Osiyo chempionati start oldi.
Toshkentdagi “O‘zbekiston” sport majmuasida 30 apreldan - 7 mayga qadar bo‘lib o‘tadigan qit’a chempionatida Osiyo boks Konfederasiyasi (ASBC)ga a’zo 29 mamlakat - O‘zbekiston, Xitoy, Hindiston, Eron, Iordaniya, Qozog‘iston, Janubiy Koreya, Mo‘g‘uliston, Pokiston, Shri-Lanka, Tojikiston, Turkmaniston, Qirg‘iziston, Afg‘oniston, Malayziya, Butan, Livan, Nepal, Falastin, Qatar, Singapur, Tailand, Indoneziya, Filippin, Yaponiya, Tayvan, BAA, Iroq hamda Suriya davlatlaridan 179 nafar eng kuchli bokschilar g‘oliblik uchun ringga chiqishadi.
Osiyo chempionatida yurtimiz sharafini quyidagi bokschilarimiz himoya qilishadi: Hasanboy Do‘smatov (-49 kg), Jasurbek Latipov (-52 kg), Murodjon Ahmadaliyev (-56 kg), Elnur Abduraimov (-60 kg), Iqboljon Xoldorov (-64 kg), Shahram G‘iyosov (-69 kg), Isroil Madrimov (-75 kg), Bektemir Meliqo‘ziyev (-81 kg), Sanjar Tursunov (-91 kg) va Bahodir Jalolov (+91 kg).
Xalqaro havaskor bokschilar Assosiasiyasi (AIBA) qoidalariga ko‘ra, janglar 10ta – 49, 52, 56, 60, 64, 69, 75, 81, 91 va +91 kg vazn toifalarida o‘tkaziladi. Shuningdek, mazkur qit’a chempionatida bokschilar sovrinli o‘rinlar uchun kurashishdan tashqari joriy yilning 23 avgustidan – 4 sentyabrigacha Germaniyaning Gamburg shahrida bo‘lib o‘tadigan Jahon chempionati yo‘llanmasi uchun bahs olib borishadi.
Vakillarimizning qit’a birinchiligidagi ishtiroklarini -52 kg vazn toifasidagi bokschimiz Jasurbek Latipov boshlab berdi. Pokistonlik Sayid Asifga qarshi jang o‘tkazgan bokschimiz raqibini ishonchli tarzda mag‘lub eta oldi. Latipov endi ikkinchi bosqichda qirg‘izistonlik Azat Usenaliyevga qarshi jang o‘tkazadi. Bugun yana besh nafar vakillarimiz ringga ko‘tariladilar:
Murodjon Ahmadaliyev – SH. Maydarov (Turkmaniston) (-56 kg)
Iqboljon Xoldorov - Ashish (Hindiston) (-64 kg)
Hasanboy Do‘smatov - Txivanka Pallexa (SHri-Lanka) (-49 kg)
Isroil Madrimov - Qosim Abduamad (Falastin) (-75 kg)
Sanjar Tursunov - Xeong Kyu Kim (J. Koreya) (-91 kg)
Ma’lumot uchun, jahon chempionatida Osiyo qit’asi uchun 60 ta o‘rin ajratilgan bo‘lib, Toshkentdagi qit’a chempionatida har bir vazn toifasida eng kuchli 6 nafar bokschilar jahon chempionati lisenziyasiga ega bo‘lishadi.
Ta’kidlash lozimki, Osiyo chempionatini o‘zida qabul qilish uchun qit’amizning bir necha davlatlari da’vogarlik qilishgandi. Ammo O‘zbekistonda boksni rivojlantirishga ko‘rsatilayotgan doimiy e’tibor, nufuzli musobaqalarni yuqori saviyada o‘tkazish tajribasi, mamlakatimizdagi mavjud sport infratuzilmasi va eng muhimi Rio Olimpiadasida o‘zbekistonlik bokschilarning yettita medalga sazovor bo‘lib, bu borada nafaqat Osiyoda, balki jahonda ham tengsiz ekanliklarini isbotlashgani Osiyo boks Konfederasiyasi (ASBC) mutasaddilariga chempionat mezbonligini aynan bizga berishlari uchun turtki bo‘ldi. Eslatib o‘tamiz, Osiyo chempionati 7 mayga qadar davom etadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
