APLning o‘tgan mavsumi Son Hyon Min uchun ancha muvaffaqiyatli kechib, «Tottenhem»ning barcha turnirlarda 20tadan ortiq gol urgan uch futbolchisidan biriga aylandi.
Bombardir.ru bundesliga va Angliya premyer-ligasida o‘z o‘rniga ega bo‘lib, mahalliy muxlislar yoqimtoyiga aylangan osiyolik yarim himoyachi haqida so‘z yuritadi. JCH-2018 saralashida J.Koreya termasining O‘zbekiston milliy jamoasiga raqib ekani inobatga olinsa, bu futbolchi haqidagi ma’lumot mamlakatimizdagi muxlislarni befarq qoldirmasligi tayin.
Ha, tumanli o‘lkada navbatdagi Janubiy koreyalik yulduz paydo bo‘ldi. Pak Ji Sun ketgach, uning joyi uzoq vaqt bo‘sh turmadi - «MYU» legionerining o‘rnini Son Hyon Min egallab, «shporlar»ning o‘tgan mavsumdagi eng yaxshi to‘purarlaridan biriga aylandi.
Dastlab uning ishlari unchalik qovushmadi, ammo jarohat olgan Xarri Keynning pozisiyasini egallagach, murabbiy ishonchini to‘liq oqladi.
Koreyslarga xos bo‘lmagan baland bo‘yga ega Son o‘smirlik chog‘laridayoq ko‘pchilikning yodida qoladigan o‘yin namoyish etib, J.Koreya futbol federasiyasining maxsus dasturida qatnashish huquqini qo‘lga kiritdi.
Rejaga ko‘ra, mahalliy futbolchilardan uch nafari bundesliga klublarida ko‘rikdan o‘tish imkoniyatiga ega bo‘lishardi. Sinovdan esa mazkur trio ichidagi eng yaxshisi - Hyon Min muvaffaqiyatli o‘tdi. Shu tariqa u «Gamburg» akademiyasiga qabul qilindi.
Koreyalik iqtidor egasi bu voqeani o‘smirlar o‘rtasidagi jahon chempionatida nishonlab, o‘z termasining eng yaxshi to‘purariga aylandi. «Gamburg»ga qaytganidan so‘ng Son raqib jamoa futbolchilarini birin-ketin aldab, darvozani ishg‘ol qildi. Biroq Germaniya muhitiga ko‘nikishda qiynaldi. «Evropaga 16 yoshimda ko‘chib o‘tdim.
Albatta, avvaliga qo‘rqdim. Shu yoshda bu yerga qanday moslasha olganimni o‘zim ham tushunolmayman. Lekin chin ko‘ngildan orzumni ro‘yobga chiqarishni xohlardim. Aftidan, buni olmon yurtiga men bilan birga tashrif buyurgan ikki hamyurtimdan ko‘ra ko‘proq istadim, shekilli, natijada Germaniyada qoldim».
Asosiy jamoadagi debyut o‘zini ko‘p kuttirmadi. O‘sha paytlari «dinozavrlar»ga ustozlik qilgan Armin Fe jarohatlar ko‘payib ketgani bois, 18 yoshli koreysni tarkibga kiritdi.
Mavsumoldi yig‘inlarda gollar urdi, ammo «Chelsi»ga qarshi kechgan bahsda shikastlanib, ikki oyga safdan chiqdi. Jarohatdan tiklangach esa «Kyoln» darvozasini qoyilmaqom tarzda ish-g‘ol qilib, afsonaviy Manfred Kalsning rekordini yangiladi: eng yosh gol muallifiga aylandi.
«Iqtidor», «Yangi Cha Bum Kun», «koreyalik Myuller» - matbuotda yigitchaga shu kabi taxalluslar qo‘yildi. Son jamoasiga nafaqat o‘z gollari, balki moliyaviy jihatdan ham foyda keltirardi.
Aniqrog‘i, Janubiy Koreyaning Kumho Tyres hamda Hanwha kompaniyalari iqtisodiy qiyinchiliklarga uchragan «Gamburg»ga homiylik qilib, uni jar yoqasidan olib chiqishdi. Klub hisobiga o‘tkazilgan millionlab yevrolar juda asqotdi.
Son Germaniya futbolidan huzurlanardi: «J.Koreyadagi futboldan zerikkanman, bu yerda esa o‘sishga erishishim mumkin. O‘z yurtimda kuniga 3-4 soat shug‘ullanardim, talabchanlik yuqori edi.
Olmon yurtida esa hammasi boshqacha: individual va jamoaviy mashg‘ulotlar, fitnes-testlar. Erkinlik birinchi planga chiqadi. Germaniyada futbolga nisbatan kuchliroq e’tibor qaratishadi. Umuman, bu yerda hamma narsa yaxshi. Umrbod bundesligada qolishga qarshi bo‘lmasdim».
Hyon Minning o‘yinlari «Bayer»ga yoqib qoldi. U Yevropaning top-4 chempionatlarida 10tadan ortiq gol urgan osiyolik to‘rtinchi futbolchiga aylangandi. 2013 yili «dorishunoslar» koreyalikni o‘z saflariga qo‘shib olishdi. Son hujumda Shtefan Kissling bilan ajoyib tandem hosil qilib, nafaqat Germaniya, balki butun jahon hamjamiyatini «ko‘hna qit’a»ga uzoq vaqt va muvaffaqiyatli faoliyat yuritish maqsadida kelganiga ishontira boshladi.
Bolaligida otasi boshchiligida o‘tkazgan mashg‘ulotlari ham asqotdi: «Agar otam bo‘lmaganida, hozirgi darajamga chiqolmasdim. U har kuni men bilan ikki mahal shug‘ullanib, mashg‘ulotlarni o‘tkazib yubormasligimni ta’minlardi. Oson emasdi, qiynaldim, lekin otam futbol haqida ko‘p narsa bilgani holda, bilimini menga o‘tkazishga intilardi.
To‘pni qabul qilish va boshqa bazaviy jihatlarni o‘zlashtirishim lozimligini uqtirib, shu yo‘nalishda ko‘proq ishlardi. Busiz buyuk futbolchiga aylanib bo‘lmasligini bilardi».
Garchi Son ulfatchilikni yoqtirsada, befoyda ko‘cha kezgandan ko‘ra, yaxshisi, uyda yolg‘iz qolib, koreys filmlarini tomosha qilishni ma’qul ko‘rardi. Leverkuzenni yaxshi bilmasdi, ammo bazadan stadiongacha bo‘lgan yo‘nalishni bilsa, kifoya edi. Hozir Hyon Min Londonda yashamoqda, tez-tez piyoda yuradi.
Aprelda Son liganing eng yaxshi o‘yinchisi nomiga munosib ko‘rildi, chempionat yakunida esa Cha Bum Kunning uzoq yillik rekordini yangiladi: Yevropada bir mavsum davomida 21ta gol urdi.
Osiyoning XX asrdagi eng yaxshi futbolchisi Sonda o‘zining yoshligini ko‘rayotganini bildirdi: «Uning ajoyib driblingini kuzatarkanman, o‘z o‘yinlarim yodimga tushadi», deydi Cha Bum Kun. Hyon Minning o‘zi ham afsonaviy hamyurtining darajasiga chiqish niyatida ekanini yashirmaydi. Angliyada Son yangi jamoaga tezda moslashdi, hozir ham uning transferi uchun to‘langan 30 million haqida ko‘pchilik unutgan.
Vimmerga bergan intervyusi, koreyalik ishqibozi bilan uchrashuvi - Hyon Min OAVda ancha taniqli shaxs, demak o‘z yurtidagi investorlarni tez orada «Tottenhem»ga ham jalb etsa, aslo ajablanmaymiz. Hozircha esa Son yangi mavsum boshlanishini kutmoqda - uni yanada yaxshiroq o‘tkazish niyatida.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
