FIFA kunlari munosabati bilan oliy liga bahslarida kichik tanaffus yuzaga keldi.
O‘rtada O‘zbekiston kubogining yarim final javob uchrashuvlari o‘tkazilib, Billur sovringa da’vogar ikki jamoa nomi ma’lum bo‘ldi.
Bu yoqda chempionatimiz finish chizig‘i ko‘rinib qolganidanmi, xalqaro «kichik tanaffus»da ham jamoalarimiz dam olishgani yo‘q.
Qaytaga, tayyorgarlikka zo‘r berishmoqda. Chunki oliy ligada haqiqiy kurash endi boshlanadi. Ayniqsa «birinchi liga» xavf solib turgan hududda har bir uchrashuv 6 ochkolikka aylanishi muqarrar.
Biz «xavfli hudud»da yurak hovuchlab turgan jamoa vakilini emas, o‘rta pog‘onada joylashgan «Qizilqum» futbolchisi Shukurali Po‘latovdan intervyu oldik.
- Shukurali, suhbatimizni «Nasaf»ga qarshi o‘yindan boshlasak. Birinchi daqiqadayoq gol o‘tkazib yubordinglar va yakunda 0:2 hisobidagi mag‘lubiyat?
- «Nasaf»ga qarshi kechgan o‘yinga alohida ishtiyoq bilan tayyorgarlik ko‘rgandik. Jamoamiz oldiga Qarshidan g‘alaba bilan qaytish vazifasi qo‘yilgan edi. Afsuski, himoyadagi xatolarimiz evaziga gol o‘tkazib yubordik.
- Siz ham mudofaa vakilisiz. Demakki, sizda ham ayb bor.
- Men o‘zimni oqlamoqchi emasman. Har safar bexato o‘ynashning iloji yo‘q. Boz ustiga, «Nasaf»dek kuchli jamoalarga qarshi safar o‘yinlarida.
Mag‘lubiyatda bir kishini aybdor sifatida ko‘rsatish yaramaydi. Menimcha, «Nasaf»ga qarshi yaxshigina qarshilik ko‘rsata oldik, deb o‘ylayman. Oson mag‘lubiyatga uchradik, degan fikrdan yiroqman.
- Nimaning evaziga Berdiyev shogirdlarini mag‘lub etmoqchi edinglar? Real qaraganda bu imkonsiz emasmiz?
- Albatta imkoniyat bor edi. Ilojsiz narsaning o‘zi yo‘q. Jamoaviy o‘yin namoyish etib, himoyada bexato o‘ynaganimizda, albatta Qarshidan uch ochko bilan qaytardik.
To‘g‘ri, qarshiliklar tarkibidagilar mahorat bobidan bizdan ustundirlar. Lekin biz ham so‘nggi uchrashuvlarda yomon ko‘rinmayapmiz.
- Mendagi fakt sizda ham bor bo‘lishi mumkin. «Qizilqum» oxirgi marta 18-turda «Qo‘qon - 1912» jamoasini mag‘lub etgan ekan. O‘shandan beri g‘alaba sizlarga begona. Buning sababi nimada?
- Siz aytganday 3 uchrashuvda uch ochko ishladik. Ammo, bu mag‘lubiyatimizni bildirmaydi. Ketma-ket mag‘lubiyatlar yoki duranglar - futbolda bunday holatlarning bo‘lishi tabiiy. Bu oliy liga o‘yinlarining murosasiz o‘tayotganidan darak.
- Jamoa a’zolarida kayfiyat qanday? Ishqilib, muhit yaxshimi?
- Muhit ham, kayfiyat ham yaxshi. Faqat shu duranglar iskanjasida qolib ketdik. Bitta g‘alaba vaziyatni ham, kayfiyatni ham ijobiy tomonga o‘zgartirib yuboradi.
- «Qizilqum» tarkibidagi futbolchilari bilan bemalol yuqori o‘rinlar uchun kurashishi mumkin» Mutaxassis shunday degandi. Ammo sizlar o‘rtamiyonalikdan qutulib ketolmayapsizlar?
- Yuz foiz qo‘shilaman. Aksariyat o‘yinlarda keraksiz vaziyatda ochkolarni boy berdik. Buning natijasida o‘zimiz istagan o‘ringa ko‘tarila olmadik. Yigirma uchta o‘yindan 27 ochko jamg‘ardik, xolos. Bu «potensiali»mizga nisbatan sezilarli darajada oz.
Turnir jadvaliga e’tibor qaratsangiz, jamoalar juda ham zich joylashishgan. Bitta g‘alaba jamoangizni turnir jadvalida 2-3 pog‘ona yuqorilashiga zamin yaratadi. Mag‘lubiyat esa aksincha.
- «Obod» oliy liga bahslaridan chetlatildi. Biroz kutilmagan voqelik. Bu holatga munosabatingiz qanday?
- Bir tomondan federasiyaning qarorini qo‘llab-quvvatlayman. Sport prinsiplariga amal qilish kerak, degan fikrdaman. Shu yo‘l bilan chempionatimizda tartib-intizom kuchayadi. Bu esa qolgan klublarga saboq bo‘ladi.
- Hozirgi holatda oliy ligada nechta jamoa qatnashishi tarafdorisiz?
- Mamlakatimiz barcha viloyatlarining oliy ligada o‘ynaydigan klublari bo‘lishi tarafdoriman. Negaki, futbol muxlislar uchun.
Shunga yarasha har bir jamoa tomoshabon o‘yin ko‘rsatsa, maydonda borini berib kurash olib borsagina oliy ligamizning saviyasi ko‘tariladi.
Bu esa o‘z navbatida terma jamoalarimizning kuchayishiga zamin hozirlaydi. Zo‘rma-zo‘raki jamoani ushlab turishdan foyda yo‘q.
- Siz aytgandek, son emas, sifatga e’tibor qaratadigan vaqt allaqachon kelgan. Lekin savolimizni javobsiz qoldirdingiz?
- Futbolchilar uchun qancha ko‘p bo‘lsa, shuncha yaxshi. Lekin bitta shart bilan: bu saviyaga ta’sir o‘tkazmasligi kerak. O‘FF va PFL oliy ligadagi klublar soni qancha bo‘lishini hal qiladi. Balki, 12 ta jamoa qolib, ikki bosqichli chempionatga o‘tilar.
- Taxmin qilib ko‘ring-chi, mavsum yakunida oliy ligani qaysi jamoa tark etishi mumkin?
- Hali 7ta tur bor. Lekin umid qilamanki, bu omadsiz jamoa «Neftchi» bo‘lmaydi.
- «Neftchi» siz uchun qadrli jamoa. Bir paytlar ushbu klub safida to‘p surgansiz. Harholda, uning bugungi taqdiriga ham befarq emassiz. Nima uchun nomdor klub bunday holatga tushib qoldi?
- To‘g‘risi, «Neftchi» klubining ichki olamidan butunlay bexabarman. Qolaversa, uning hozirgi tushkun holatini muhokama qilmoqchi emasman.
Faqat «Obod» chetlatilgach, so‘nggi o‘rinda Farg‘ona jamoasi turganligiga achinaman. Bir paytlar faqat chempionlik ko‘zlagan klub, nahotki autsayderlikni o‘ziga ep ko‘rsa.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
