Ali Dayi Eron termasida 149ta o‘yinda maydonga tushib, 109ta gol urgan. U futbolchilik faoliyatini «Istiqlol» (Ardabil), «Taksirani», «Bank Tejarat», «Piruzi», «Al-Sadd», «Arminiya», «Bavariya», «Gerta», «Al-SHabab», «Sabo-Batteri», «Saypa» kabi klublarda o‘tkazgan.
Ali Dayi 1969 yil 21 martda Ardabil shahrida tavallud topgan. 1983-1988 yillarda Ardabildagi mahalliy «Istiqlol» klubida millionlar o‘yini sir-asrorlarini qunt bilan o‘rganib, katta futbolga kirib keldi. Katta maydonga ilk qadamlarini 1988 yilda qo‘ygan.
1994 yili unga «Piruzi» murabbiylari qiziqib qolib, darhol klubga taklif etishadi. Shu voqeadan so‘ng Dayining hayoti tubdan o‘zgarib, professional futbol nimaligini his qila boshlaydi.
Yosh hujumchi uchun ayniqsa, «Piruzi» safida o‘tkazgan 1995|1996 yillar mavsumi yodda qolarli tarzda kechgan. Dayi shuningdek, 1996 yilgi Osiyo kubogida ham o‘zini ko‘rsatib, muxlislarga Osiyoning eng yaxshi hujumchilaridan biri sifatida taniladi.
Eron termasi Osiyo kubogi-96da Ali Dayining gollari sabab avvaliga Saudiya Arabistoni, keyin Janubiy Koreya kabi kuchli raqiblarni mag‘lub etadi. Ayniqsa, koreyaliklar bilan kechgan chorak final o‘yinida (6:2) fors afsonasi to‘rtta gol urishga muvaffaq bo‘ladi.
«Mana shu o‘yin mening faoliyatimni tubdan o‘zgartirib yuborgandi, - deydi eronlik to‘purar. - Osiyo kubogidan so‘ng menga Yevropa eshiklari ochildi, Germaniyaga yo‘l olib, o‘sha yerda o‘ynay boshladim». Ali Dayi umumiy hisobda 1996 yilgi Osiyo chempionatida 8ta to‘p kiritishga erishgan.
Mahoratli hujumchi Germaniyaning «Arminiya» klubiga borib qo‘shilgan payt 28 yoshda edi. U bir mavsum ushbu jamoa safida to‘p surgach, darhol «Bavariya» e’tiborini qozonadi va mavsum yakunida Myunxenga yo‘l oladi. Ali Dayi yangi klubi tarkibida Yevropa Chempionlar Ligasida o‘ynagan ilk eronlik futbolchi sifatida tarixga kiradi.
Qolaversa, jamoasi bilan bundesligada g‘olib chiqadi. 1999 yilning yarmida u «Bavariya»ni tark etib, «Gerta» safiga borib qo‘shiladi va shu yili Osiyoning eng yaxshi futbolchisi, deb topiladi.
Dayi faoliyatining uch yilini Germaniya poytaxtida o‘tkazgan. U «Gerta» safida Yevropa Chempionlar Ligasi bahslarida maydonga tushib, «Chelsi» va «Milan» darvozasiga chiroyli gollar urgan.
«Germaniyada yashab, juda ko‘p narsani o‘rgandim, - deb xotirlaydi sobiq forvard. - Shulardan eng muhimi, bu jamoada tartib-intizomning birinchi o‘ringa qo‘yilishidir».
1998 yil 14 dekabrda Osiyo o‘yinlari doirasida Ali Dayi O‘zbekiston darvozasiga 3ta gol yo‘llagan edi. Eronlik to‘purar Ali Dayi JCH-1998 va 2000 yilgi Osiyo kubogida ham o‘zini ko‘rsatgan.
Xususan, 2000 yilning o‘zida terma jamoa safida 20ta to‘p kiritgan. Ammo oradan ikki yil o‘tib, Ali Dayi mundialda qatnasha olmaydi.
Chunki saralashning qit’alararo «pley-off» bahsida Eron Irlandiyaga yutqazib qo‘yadi. Umuman olganda, DAVOMI