OFK Osiyo Chempionlar Ligasi hamda OFK kubogida ishtirok etish uchun lisenziyadan o‘tganlar ro‘yxatini e’lon qilgandi. Bu yil O‘zbekistondan 17ta klub lisenziyalash bo‘yicha hujjatlarni OFKga taqdim etgandi.
Ulardan 13tasi tekshiruvdan muvaffaqiyatli o‘tgan bo‘lsa, 4ta klub - «Qizilqum», «So‘g‘diyona», «Obod» va «Sho‘rtan» talabni bajara olishmadi. Bu jamoalarning bari yakuniga yetgan mavsumda oliy liga bahslarida ishtirok etgandi.
Aksincha, birinchi liga chempioni sifatida elita yo‘llanmasini qo‘lga kiritgan «Sementchi» ham tekshiruvdan o‘tganlar safida qayd etildi. Biz ushbu ma’lumot e’lon qilingach, «Qizilqum» bosh murabbiyi Hamid Aktamov bilan uchrashib, undan turli masalalar yuzasidan intervyu oldik.
Hamid akaning aytishicha, klub faqat OFK lisenziyalashidan o‘ta olmagan va bunga klub xodimi Samandar Boborajabovning hujjat topshirishda «dedlayn»ga ulgurmagani sabab bo‘lgan. E’tiborlisi, rahbariyat bu xodimni darhol ishdan bo‘shatgan.
- Hamid aka, «Qizilqum» OFK lisenziyalashidan o‘ta olmadi. Aynan qaysi yo‘nalishlarda muammolar aniqlangan?
- Lisenziyalash masalasida hech qanday kamchilik yo‘q. Mazkur jarayon shu ishlarga mas’ul bo‘lgan xodimimiz Germaniyaga o‘qishga ketgan vaqtga to‘g‘ri kelib qoldi. O‘sha payt OFK oynasi ochiq edi. Afsuski, u olmon o‘lkasidan turib zarur hujjatlarni internetga joylashtirishda biroz kechikdi.
Aynan shu, aytish joiz bo‘lsa, e’tiborsizlik sabab OFK lisenziyalashidan o‘tolmadik. Lekin PFL o‘tkazgan lisenziyalashdan muvaffaqiyatli o‘tganmiz. Shundan kelib chiqib aytishim kerakki, «Qizilqum» Superligada ishtirok etadi.
OFKning bu qarori PFLga ta’sir o‘tkazmaydi, chunki u asosan kelasi mavsum OCHLda ishtirok etadigan «Lokomotiv», «Nasaf» va «Paxtakor»ga tegishli. Nasib qilsa, 2018 yilning mart oyida lisenziyalashdan o‘tolmagan klublar uchun qayta tekshiruv o‘tkaziladi. O‘shanda yo‘l qo‘yilgan kamchiliklarni bartaraf etamiz.
- Jamoangizda yechimini kutayotgan muammolar borligini juda yaxshi bilasiz. Ko‘proq nimalarga e’tibor qaratish kerak?
- Muammolar yo‘q hisobi. Hamma sharoitlar bor. Faqat bosh homiyimiz kelasi mavsum uchun smetani tasdiqlab berishi hamono ishlarni boshlaymiz.
- Taxminan qancha mablag‘ evaziga sovrinli o‘rinlar uchun kurashadigan raqobatbardosh jamoa tuzish mumkin?
- Uzr, bu savolga javob berolmayman.
- O‘tgan mavsum jamoa o‘z imkoniyati darajasida o‘ynay olmadi. Lekin «Qizilqum»ning ichki potensiali yuqori edi...
- Buning o‘ziga yarasha ob’ektiv va sub’ektiv sabablari bor. Mavsumga yuqori kayfiyatda tayyorgarlik ko‘rgandik. Tarkib borasida hech qanday muammo yo‘q edi.
Siz aytgandek, raqobatbardosh jamoa shakllantirgandik. Afsuski, 1-turdayoq «Paxtakor»ga yutqazib, chempionatni omadsiz boshladik. Ilk o‘yindagi mag‘lubiyatdan so‘ng futbolchilarning ruhiyati tushib ketdi.
- Jamoaning omadsiz ishtirokiga faqat 1-turdagi mag‘lubiyat sababmi?
- Qaysidir ma’noda, shunday desa ham bo‘ladi. Ushbu mag‘lubiyatdan keyin futbolchilarning o‘ziga bo‘lgan ishonchi yo‘qoldi, negadir ichki muhit o‘zgardi. Yigitlarimiz o‘zlariga kelganda esa «Qo‘qon-1912»ga imkoniyatni boy berib qo‘ydik.
Keyin esa o‘zi shundoq ham tarang bo‘lib turgan vaziyat yanada chigallashdi. Boz ustiga, muxlislarning biroz o‘rinsiz haqoratlari o‘yinchilarga ruhiy tomondan salbiy ta’sir qildi.
- Bosh murabbiy sifatida vaziyatni ijobiy tomonga o‘zgartirishga intildingizmi? Balki bu yo‘lda sizga biror narsa to‘sqinlik qilgandir?
- Qo‘limdan kelganicha harakat qildim. Qator mag‘lubiyatlardan so‘ng «Bunyodkor»ni o‘z uyida yengishni uddaladik. Buning natijasida oz bo‘lsada o‘zimizga kelib olgandik. Ammo aksariyat futbolchilar yulduzga aylanib qolishdi. Ana shundan keyin omad yana bizdan yuz o‘girdi. Boz ustiga, har kuni bosim ostida ishladik.
- Mavsum yakunlari jamoada muhokama qilindimi? Boshqalarga o‘rnak bo‘lishi uchun o‘sha siz aytgan «yulduzlar»ga nisbatan jazo qo‘llandimi?
- Yig‘ilish qildik, yigitlar bilan gaplashib oldik. Foydasi bo‘ladi, degan umidda ularga vaziyatni tushuntirdik. Lekin mashg‘ulotda boshqa muhit, o‘yinda esa mutlaqo boshqa muhit saqlanib qolaverdi.
Hozir o‘shanda bajarilgan har bir ishimizni tahlil qilyapmiz. Ha, xatolarimiz ham yo‘q emas. Yildan-yilga tajribamiz oshib boryapti. Nasib qilsa, 2018 yilda hammasi boshqacha bo‘ladi.
- Balki qaysidir futbolchilar ichki muhitni buzishgandir?
- Ha, shunaqasi ham bor. Qisqacha aytganda, bizga ko‘z tegdi. 2016 yili 6-o‘rinni egallagandik. O‘shanda yigitlar juda yaxshi o‘yin namoyish etishgandi. Bu mavsum esa ular nima uchun o‘ynayotganliklarini unutib qo‘yishdi.
Aksariyat futbolchilarimizning ta’bi nozik bo‘lib qolgan. Qisqasi, mehnatni tashlab qo‘yishgan. Bunday bo‘lishiga yoshlikdagi tarbiya sabab, deb o‘ylayman. O‘FFning yangi rahbariyati aynan shu jihatga e’tibor qaratyapti. Ya’ni, klublardan futbolchilarni yoshlikdanoq yangicha ruhiyatda tarbiyalashni talab qilmoqda.
Federasiya juda to‘g‘ri ish tutdi. Juda ko‘p narsa yoshlikdagi tarbiyaga bog‘liq ekanligiga o‘z tajribamda guvoh bo‘ldim. Bu yil zo‘rg‘a kuchlilar safidagi o‘rnimizni saqlab qoldik. Mana shunday holatda kimga qiyin, albatta, klub rahbarlari va murabbiylar shtabiga.
- Jamoa o‘sha ta’bi nozik futbolchilar bilan xayrlashdimi?
- Bu savolingizga hozir javob berolmayman.
- Yakuniga yetgan mavsumda «Qizilqum» hakamlardan aziyat chekmadimi?
- Bizda bu mavzuda gapirish uchun huquq yo‘q. Xatoni hamisha o‘zimizdan izlab kelganmiz. Qaysi o‘yinlarda yutqazgan bo‘lsak, unda hakamlarning xatosini ko‘rmadim. Demak, jiddiy e’tiroz yo‘q.
- Artur Gevorkyanning o‘yini haqida qanday fikrdasiz? «Qizilqum» sardori o‘z imkoniyati darajasidan past o‘ynamadimi?
- Artur tajribali, o‘z ishiga professional tarzda yondashadigan futbolchi. Shuni aytishim kerakki, uning o‘tgan mavsumda bizga ko‘p yordami tegdi.
- U bilan shartnoma uzaytiriladimi?
- Agar bitim bandlari bo‘yicha kelishib olsak, uzaytiriladi.
- Bu masalada uning o‘zi bilan gaplashdingizmi?
- Ha. Nasib qilsa, u yangi mavsumda ham «Qizilqum» sharafini himoya qiladi.
- Legionerlar ishonchni oqlashdimi?
- Faqat Artur!
- Qolganlarda adashdik, deb o‘ylaysizmi?
DAVOMI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
