Namanganlik muxlislar bu futbolchini Superliga 9-turi doirasidagi «Navbahor» - «Neftchi» jamoalari o‘rtasidagi «Vodiy derbisi»dan so‘ng yaxshi taniy boshlashdi.
Mazkur bahsda zaxiradan o‘yinga qo‘shilgan Sardor Sulaymonov 84-daqiqada mehmonlar darvozasini aniq nishonga olib, muvozanatni tiklagandi.
E’tiborlisi, bu hujumchining joriy mavsumdagi ilk goli. Yaqinda Sulaymonovni suhbatga chorlab, turli mavzudagi savollarga javob oldik.
- Avvalo, Superligada gollar hisobini ochganingiz bilan tabriklayman. Ayting-chi, «Neftchi»ga qarshi kechgan «Vodiy derbisi»dan qanday taassurot oldingiz?
- Tabrik uchun rahmat. «Navbahor» safiga shu yil qo‘shildim. Jamoamizning «Neftchi» bilan azaliy raqibligi, farg‘onaliklarga qarshi bahslarning juda shiddatli o‘tishi haqida eshitgandim. Lekin shunday o‘yinda o‘zingiz ishtirok etsangiz, buning zavqi o‘zgacha bo‘larkan.
Derbida jamoalarning turnir jadvalida qaysi pog‘onani egallab turishganining ahamiyati yo‘qligi 29 aprel kungi uchrashuvda ham o‘z isbotini topdi. Mehmonlar bizga munosib qarshilik ko‘rsatishga intilib, uchrashuvda hisobni ochishdi. Shukrki, menga muvozanatni tiklash nasib etdi.
Bundan juda xursandman. Avval ham safarda «Qo‘qon-1912» hamda O‘zbekiston kubogi 1|16 finali doirasida «Andijon» klublari bilan bo‘lgan derbilarda qatnashdim. Lekin baribir, Superliganing muntazam ishtirokchisi bo‘lgan «Neftchi»ga qarshi uchrashuv menda o‘zgacha taassurot qoldirdi.
- Bungacha «Navbahor» o‘z maydonida «Lokomotiv» (2:0) va «Bun-yodkor» (2:1) singari kuchli jamoalarni mag‘lubiyatga uchratgan, «Nasaf» bilan durangga imzo chekkandi. Joriy mavsum ishlari yurishmayotgan «Neftchi» ustidan g‘alaba qozonish uchun «Navbahor»ga nima yetishmadi?
- To‘g‘ri, jamoamiz farg‘onaliklarni mag‘lubiyatga uchratishga qodir edi. Lekin aytganimdek, bunga birinchidan, mehmonlarning derbiga o‘zgacha ishtiyoqda tayyorgarlik ko‘rishgani va maydonda oldingi bahslarga qaraganda boshqacha to‘p surishgani sabab bo‘ldi.
Bundan tashqari, o‘sha o‘yinda diskvalifikasiya sababli, tajribali himoyachi Jahongir Mehmonov to‘p surmadi. Bu ham o‘yinimizga ta’sir o‘tkazdi va mudofaa chizig‘idagi birgina xato qimmatga tushdi. Endi keyingi o‘yinlarda g‘alaba qozonib, muxlislar ishonchini oqlashga intilamiz.
- «Navbahor» kutilmaganda O‘zbekiston kubogi 1|16 finali doirasidagi bahsda «Andijon»ga 0:1 hisobida yutqazib qo‘ydi. O‘sha mag‘lubiyatni qanday izohlaysiz?
- O‘zbekiston kubogining ilk uchrashuvidayoq mag‘lubiyatga uchrab, kubok bahslarini tark etganimiz, boz ustiga, Pro-liga vakiliga yutqazganimiz alamli bo‘ldi. To‘g‘ri, mezbonlar quyi liga vakili edilar, ammo o‘yin «Vodiy derbisi» maqomiga ega edi, qolaversa, raqib o‘z maydonida o‘zgacha ishtiyoqda to‘p surdi.
Bizning esa biroz xotirjamlikka berilganimiz, shuningdek, jamoamizdan omad yuz o‘girganligi mag‘lubiyatga sabab bo‘ldi, menimcha. Andijonliklar yuzaga kelgan kamsonli imkoniyatlardan birini golga aylantirishdi, biz esa... Nima ham qilardik, futbolda doimo g‘alaba qozonolmaysiz, tasodifiy mag‘lubiyatlar ham uchrab turadi.
- Joriy mavsum bahslari borasida nima deya olasiz?
- Oliy liga Superligaga aylantirilganidan keyin milliy chempionatimizda shunga yarasha kuchayish kuzatildi. Hozir birinchilikda yaqqol ajralib turadigan jamoa yo‘q. Barcha klublarning kuchi teng. Uchrashuvlar natijalarini oldindan bashorat qilish qiyin bo‘lyapti.
Masalan, «So‘g‘diyona»ning Qarshida «Nasaf»ni mag‘lubiyatga uchratishini kim ham o‘ylabdi, deysiz? Bundan tashqari, 9-turga kelib, Superligada mag‘lubiyatga uchramagan jamoa qolmadi. Bu ham joriy mavsumning qiziqarli tarzda kechayotganligidan dalolat.
- O‘z maydonida har qanday raqibni mag‘lubiyatga uchratadigan «Navbahor»ning negadir safardagi bahslarda omadi chopmayapti...
- O‘z uyingda devorlar ham yordam beradi, deyishadi. Shunga bo‘lsa kerak, nafaqat «Navbahor», balki boshqa klublar ham o‘z maydonlarida yaxshi o‘yin namoyish etishga intilishadi.
Joriy mavsum startida safarda 4 ochkoni qo‘lga kiritgandik. Lekin keyingi bahslarda unchalik omadimiz chopmayapti. Asosiysi, qayerda o‘ynashimizdan qat’i nazar, raqiblarga munosib qarshilik ko‘rsatib, g‘alaba qozonishga intil-yapmiz.
- Ilhom Mo‘minjonov haqida nima deya olasiz?
- Meni «Navbahor»ga Ilhom Ibrohimovich taklif qilgan. U yosh bo‘lishiga qaramay, kuchli mutaxassis. Barcha futbolchilar bilan munosabatlari yaxshi.
Mashg‘ulotlarni qiziqarli va rang-barang tarzda olib boradi. Uchrashuvlar oldidan kerakli so‘zlarni topib, bizni ruhlantiradi. Uning boshchiligida jamoamiz oldiga qo‘yilgan vazifani bajarishimizga ishonaman.
- «Navbahor»da eng yaqin do‘stingiz kim?
- Butun jamoa ahil-inoq. Barcha bilan munosabatim yaxshi, hammamiz xuddi aka-ukadekmiz. Bir so‘z bilan aytganda, bahamjihatlikda harakat qilamiz.
SARDOR SULAYMONOV
1994 yil 5 avgustda Buxoro shahrida tug‘ilgan.
Futbol bilan 13 yoshidan shug‘ullanishni boshlagan.
Birinchi murabbiyi: Sulaymon Rahmatov.
Ampluasi: hujumchi.
O‘ynagan jamoalari: «Buxoro» (Buxoro) - 2011-2014 yillar, 2015 yilning 2-davrasi - 2016 yil, «Mash’al-2» (Muborak) - 2015 yilning 1-davrasi, «Dinamo» (Samarqand) - 2017 yil. 2018 yildan «Navbahor»da.
Ulug‘bek UMAROV suhbatlashdi
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
