Bugun, 1 fevral kuni Milliy olimpiya qo‘mitasining navbatdan tashqari Ijroiya qo‘mitasi yig‘ilishi tashkil etildi. Unda MOQ prezidenti Umid Ahmadjonov, Bosh kotib Jasur Matchanov, vise-prezident Ahmadjon Rahimov va Ijroiya qo‘mita a’zolari ishtirok etishdi. Ma’lumot uchun, Ijroiy qo‘mita 23 nafar a’zodan iborat.
MOQ rahbari yig‘ilishni ochib berar ekan, Tokio 2020 Olimpiadasi uchun qo‘yilgan vazifani bajarish uchun hamjihatlikda ish olib borishning ahamiyati katta ekanligi haqida gapirdi.
«Bugungi yig‘ilishimizdan asosiy maqsad Tokio Olimpiadasiga tayyorgarlik masalasidir. MOQ Ijroqo‘m a’zolarining har biri o‘z fikrini bildirish huquqiga ega. Xabaringiz bor, Yaponiya mezbonlik qiladigan Olimpiya o‘yinlari uchun MOQ tomonidan strategiya ishlab chiqilgan. Bugun ana shu reja bo‘yicha o‘z fikr-mulohazalaringizni, takliflaringizni bildirishingiz mumkin bo‘ladi. Sir emaski, asosiy maqsadimiz Tokio Olimpiadasida yaxshi natija ko‘rsatib, xalqimizni, Prezidentimizni xursand qilishdir. 2019 yil lisenzion yil hisoblanadi. Shuning uchun, sport federasiyalari bir yoqadan bosh chiqargan holda ish olib borishimiz lozim. Chunki, barchamizning maqsadimiz bir», – dedi MOQ prezidenti Umid Ahmadjonov.
Kun tartibiga binoan, MOQ prezidenti maslahatchisi Nazirjon Xudoyqulov ham so‘zga chiqar ekan, ushbu strategiyani ishlab chiqishdan maqsad va vazifalarni tushuntirib berdi. Unga ko‘ra, endilikda terma jamoa a’zolarining o‘quv-mashg‘ulot yig‘inlari yangicha tizimda olib boriladi. Avvallari tayyorgarliklar jamoaviy tartibda olib borilgan bo‘lsa, endi individual tayyorgarlikka alohida e’tibor qaratiladi. Bundan tashqari, jismoniy va farmokologik tayyorgarlik bo‘yicha ham alohida ish olib borish lozimligi ta’kidlandi.
Yig‘ilish davomida endilikda har bir sport federasiyasiga oshpaz biriktirilishi ma’lum qilindi. U terma jamoa diyetologi va shifokori bilan birgalikda ish olib boradi va Olimpiadaga tayyorgarlik ko‘rayotgan sportchilarimizga biriktiriladi.
Avvalroq, Milliy olimpiya qo‘mitasi Tokio Olimpiadasiga lisenziya qo‘lga kiritgan har bir sportchi uchun 100 million so‘m miqdorida pul mukofoti ajratishi haqida ma’lum qilingandi. Ularning murabbiyilari esa 50 million so‘m miqdoridagi pul mukofoti bilan taqdirlanadi. Shuningdek, Olimpiya o‘yinlarida muvaffaqiyatli ishtirok etib, oltin medalga sazovor bo‘lgan sportchilarga ham MOQ tomonidan alohida pul mukofotlari ajratilishi haqida ta’kidlandi.
Sportchilarimizning Olimpiadaga tayyorgarlik ko‘rishida Respublika sport tibbiyoti ilmiy-amaliy markazi bilan yaqindan hamkorlik qilish, markaz mutaxassislari terma jamoa a’zolarining holatini doimiy ravishda nazorat qilishlari qayd etildi. Aynan ularning tekshiruvlari, hulosalari yordamida sportchilarga murabbiy tomonidan individual yuklamalar beriladi.
Shuningdek, Bosh kotib Jasur Matchanov ham yig‘ilishda so‘zga chiqib, Olimpiadaga tayyorgarlik jarayoni maxsus tuzilgan beshta komissiya yordamida nazorat qilib borilishi haqida gapirdi. Unga ko‘ra, Tokio Olimpiadasi oldidan beshta – Intizom, Sport tibbiyoti va antidoping, Hakam va inspektorlar, Olimpiya o‘yinlariga tayyorgarlik ko‘rish bo‘yicha va Appelyasion komissiya tuziladi va tegishli yo‘nalishlarda ish olib boriladi.
Kunchiqar yurt mezbonlik qiladigan Olimpiya o‘yinlari oldidan olib borilgan tahlillar shuni ko‘rsatdiki, O‘zbekistonda bir necha yangi sport turlari bo‘yicha lisenziya qo‘lga kiritish imkoniyati bor. Shuningdek, Tokio Olimpiadasiga lisenziyalar sonini sezilarli darajada oshirish, Olimpiadaning o‘zida kuchli o‘nlikka kirish uchun salohiyatimiz yetarli. Buning uchun esa yuqorida ta’kidlanganidek, hamjihatlik bilan, yo‘lga qo‘yilgan tizim asosida ish olib borish talab etiladi.
Al-G‘arafa
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
