O‘tgan hafta Ektor Kuper ishtirokidagi matbuot anjumanida jurnalistlar murabbiyga terma jamoani yoshartirish mavzusida savollar berishdi.
Olimpiya terma jamoasining o‘tgan davrdagi yutuqlari, ajoyib o‘yinlari bizni shunday fikrlashga undayapti. Ko‘rdikki, ular orasida milliy jamoada o‘zini ko‘rsatadiganlari yetarlicha. Buni joriy yil boshida bo‘lib o‘tgan Osiyo kubogida yana bir bor ko‘rdik. Otabek Shukurov, Javohir Siddiqov, Doston Hamdamov, Eldor Shomurodov shu yo‘sin davom etishsa, Odil Ahmedov, Aziz Haydarov, Sardor Rashidovga munosib o‘rinbosar bo‘lishadi.
Ammo tanganing ikki tomoni bo‘lganidek, ko‘ngilni xira qiladigan muammo ham yo‘q emas. Hozirgi termamiz o‘rinbosarlarining aksariyati Dilshod Nuraliyev shogirdlari hisoblanadi. Ular o‘smirlar va yoshlar o‘rtasidagi Osiyo chempionati, jahon chempionati ishtrokchilari. Biroq u jamoalardan ayrimlari o‘z klubida o‘rnini topa olmadi, ba’zilari esa jarohatini tuzatish bilan band. Keling, fursatdan foydalanib, bosh jamoamiz kelajagi sifatida e’tirof etilgan futbolchilarning faoliyatiga biroz nazar solsak.
Sarvar Karimov
Bu futbolchi 2012 yili Eronda bo‘lib o‘tgan o‘smirlar o‘rtasidagi Osiyo chempionatida tanildi. Uning ajoyib «seyv»lari Yaponiyaga qarshi kechgan final bahsida asqotgandi. Penaltilar seriyasida ham o‘zini ko‘rsatgan iqtidorli kiper, keyinchalik BAAda o‘tgan kichik mundialda ham jamoamiz darvozasini qo‘riqladi. Nimchorak finalda Gondurasga mag‘lub bo‘lgach, Sarvar Karimovning ko‘z yoshlarini tiya olmay, maydon markazida o‘tirgan holati esimda hamon. Klubdagi faoliyatini «Lokomotiv»da davom ettirgan darvozabon raqobatda yutqazdi. Bir davra «Sug‘diyona»da ijarada to‘p surdi, ayni vaqtda «Qo‘qon-1912»da.
Ibrohim Abdullayev
Mudofaa chizig‘ining ishonchli vakili, barcha yoshdagi terma jamoalarda asosiy himoyachi sanalgan. Uni hatto Ravshan Haydarov Yangi Zelandiyada bo‘lib o‘tgan U-17 jahon chempionatiga olib ketgandi. Himoya markazida Rustam Ashurmatov bilan yaxshi tandem hosil qilgan futbolchining klubdagi taqdiri u qadar havas qilguli darajada kechmadi. «Paxtakor» akademiyasi tarbiyalanuvchisi asosiy jamoadan o‘rin ola bilmadi. So‘nggi martta «Obod»da to‘p surdi.
Temur Tolipov
Yana bir «paxtakorchi». 2016 yil uning uchun yutuqlarga boy bo‘ldi: «sherlar»ning asosiy tarkibidan o‘rin oldi, Osiyo Chempionlar Ligasida ishtirok etdi. «Al-Jazira» bilan kechgan o‘yinda u jarima zarbasidan ajoyib gol urgandi. Jaloliddin Masharipov jarohat olganida, uning o‘rnini egallardi. Keyingi mavsumlarda «Navbahor», «Obod» va birinchi liga jamoalarida ko‘rinish berganiga qaramay, hech birida o‘zini ko‘rsata olmadi. Joriy mavsum boshida esa Qirg‘iziston chempionatiga yo‘l oldi.
Shohjahon Abbosov
Amirliklardagi jahon chempionatining ilk turida Panama termasi darvozasiga urilgan dastlabki gol muallifi. Shuningdek, Eronda qit’a chempionligiga erishganlardan biri. Ravshan Bozorov «Navbahor»ni boshqarayotganda, Shohjahonga imkoniyat berdi. Biroq ishonch oqlanmadi. Abbosov ayni vaqtda «Zomin» klubining muhim futbolchilaridan biri sanaladi.
Jamshid Boltaboyev
2013 yili o‘smirlar o‘rtasidagi jahon chempionatida O‘zbekiston termasi o‘z guruhida 4 ochko bilan ikkinchi o‘rinni egallab turgandi. So‘nggi turda Xorvatiyaga qarshi o‘yindagi g‘alaba bizni birinchi o‘rin bilan navbatdagi bosqichga olib chiqardi. O‘sha bahsda final hushtagi yangrashiga oz qolganda, Jamshid Boltaboyev raqib darvozasini chiroyli tarzda ishg‘ol qilib, jamoamizga g‘alaba keltirgandi. Keyinchalik «Paxtakor»da o‘z o‘rnini topishga intilgan Jamshidga ko‘p hollarda jarohat pand berdi. Shunday bo‘lsada, Samvel Babayan uni 2016 yili Osiyo chempionati-U-23ga olib ketdi. Markaziy yarim himoyachi o‘sha musobaqada qanot himoyasida o‘ynashga majbur bo‘lgandi. Baribir, jarohat o‘z ta’sirini o‘tkazmay qolmadi. Ikki yil katta futboldan uzoqda bo‘lgan Boltaboyevni qishki transferlar paytida Sergey Lushan «So‘g‘diyona»ga taklif qildi.
Javohir Sohibov
Milliy jamoada Aziz Haydarovga munosib o‘rinbosar sifatida qaralgan Javohirga ham jarohatlar xalal berdi. O‘z vaqtida «Paxtakor»ning tayanch zonasida almashtirib bo‘lmas futbolchiga aylangandi. Sohibov 2014 yili Myanmada o‘tkazilgan yoshlar o‘rtasidagi Osiyo chempionatida sardorlik bog‘ichi ostida jamoadoshlarini maydonga olib tushgandi. Raqib hujumini buzib, sheriklarini oldinga boshlash qobiliyatiga ega Sohibov ham joriy mavsum boshida Boltaboyev kabi «So‘g‘diyona» chorlovini qabul qildi.
Ko‘rib turganingizdek, iqtidorini o‘z vaqtida namoyon etolmagan futbolchilarimiz bisyor. Umid qilamizki, hozirgi olimpiya termasi vakillari boshiga yuqoridagi futbolchilarning qismati tushmaydi. Ha, ular yaxshi o‘ynashyapti, chakki emas, ammo oldingi yillarda ham shunday bo‘lgan. Muhimi, iqtidorli yoshlarimiz barqarorlikni saqlab qolib, imkon qadar jarohatlardan uzoq yurishsin. Bu borada tajribaliroq sanalgan akalaridan maslahat olishsa, o‘zlariga foyda bo‘ladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
