Angliya chempionatining 2-turi doirasida "Chelsi" o‘z maydonida "Lester"ni qabul qildi.
Uchrashuvning 7-daqiqasida londonliklar mehmon himoyachilarining qo‘pol xatosidan foydalanib hisobni ochishdi. Ndidi ehtiyotsizlik oqibatida to‘pni Meyson Mauntga oldirib qo‘ydi. "Chelsi"ning yosh yarim himoyachisi jarima maydonchasiga yorib kirib, darvozani ishg‘ol qildi.
Lempard shogirdlari tanaffusga qadar o‘yin taqdirini hal qilib qo‘yishlari mumkin edi, ammo ular ikkita qulay imkoniyatdan foydalana olishmadi.
Ikkinchi taymda esa xavfli vaziyatlar yaratish bo‘yicha ustunlik "tulkilar" tomonida bo‘ldi. Ular o‘zlari yaratgan vaziyatlarning biridan foydalanishdi. Bahsning 67-daqiqasida to‘p burchakdan o‘yinga kiritildi. Vilfred Ndidi havodagi kurashda himoyachilardan ustun keldi va darvozani ishg‘ol qildi.
Shu tariqa, "Chelsi" mavsumdagi dastlabki ochkosini qo‘lga kiritgan bo‘lsa, "Lester"ning ochkolari 2taga yetdi.
Angliya premyer-ligasi, 2-tur
Chelsi – Lester 1:1 (1:0, 0:1)
Gollar: 1:0 – 7 Maunt, 1:1 – 67 Ndidi.
Chelsi – Arrisabalaga, Kristensen, Zuma, Emerson, Aspilikueta, Maunt, Kante, Pulishich (Villian, 71), Jorjinyo (Kovachich, 71), Pedro, Jiru (Abraxam, 61).
Lester – Shmeyxel, Seyundjyu, Evans, Fuks, Rikardu Pereyra, Tilemans, Meddison, Ndidi, Chouduri (Prat, 73), Peres (Olbrayton, 80), Vardi.
Ogohlantirish: Jorjinyo (37).